ក្រុមហ៊ុនផលិតរថយន្ត Geely កំពុងព្យាយាមប្រើប្រាស់គ្រប់យុទ្ធសាស្ត្រដែលខ្លួនមានដើម្បីបង្កើនការលក់រថយន្តបន្ថែមទៀត។ ក្រុមហ៊ុននេះ មានបញ្ជីម៉ាកយីហោរថយន្តជាច្រើនរួចទៅហើយដូចជា Volvo, Polestar, Zeekr និងមួយចំនួន។ Meizu ត្រូវបានទិញយកទាំងស្រុងដោយ Geely នៅអំឡុងខែកក្តដា ឆ្នាំ 2022 ហើយភាគហ៊ុនចុងក្រោយរបស់ Meizu ត្រូវបានលក់ដោយស្ថាបនិកក្រុមហ៊ុនផ្ទាល់នៅដើមឆ្នាំ 2023 នេះ។
នៅពេលនេះ បើតាមប្រភពបានទម្លាយថា Geely បាននឹងកំពុងប្រកាសជូលអ្នកជំនាញផ្នែករថយន្តដែលមានបទពិសោធន៍នៅក្នុងការរចនា និងការផលិត ដែលបង្ហាញថា Geely និង Meizu អាចនឹងចាប់ផ្តើមយុទ្ធសាស្ត្រថ្មីសម្រាប់វិស័យឧស្សាហកម្មរថយន្ត មិនមែនត្រឹមតែការដាកតាំងលក់ប៉ុណ្ណោះទេ គឺអាចនឹងឈានដល់ការផលិតរថយន្តនៅក្រោមតំបូលស្លាកយីហោថ្មីមួយ។ កាលពីនៅថ្ងៃទី 9 ខែមករាកន្លងទៅនេះ Meizu បានដាក់ពាក្យស្នើរសុំពាណិជ្ជសញ្ញាអន្តរជាតិដែលមានឈ្មោះថា Wujie Auto ដែលនេះបានបង្ហាញយ៉ាងច្បាស់ថា Meizu នឹងហក់ចូលទៅក្នុងវិស័យឧស្សាហកម្មរថយន្តយ៉ាងពិតប្រាកដ។
អ្វីដែលកាន់តែច្បាស់នោះ គឺ Meizu បានធ្វើការបង្ហាញទីតាំងសាកភ្លើងរថយន្តអគ្គិសនីពី Pandaer ដែលជាស្លាកយីហោមួយផ្សេងរបស់ Meizu ដែលគ្រប់គ្រងដោយក្រុមហ៊ុន Geely។ ការទិញយកក្រុមហ៊ុន Meizu ពី Geely គឺក្រុមហ៊ុនផលិតរថយន្តម៉ាកល្បីមួយនេះចង់ធ្វើការរួមច្របាច់បញ្ចូលគ្នារវាងបច្ចេកវិទ្យាស្មាតហ្វូនដ៏ទំនើបចូលទៅក្នុងបច្ចេកវិទ្យារថយន្ត។ កាលពីអំឡុងខែសីហាឆ្នាំទៅ ក្រុមហ៊ុន Meizu បានដាក់ពាក្យស្នើរសុំអាជ្ញាប័ណ្ណដែលមានការទាក់ទងទៅនឹងសេវាកម្មផលិតផលមួយចំនួនដូចជា “Vehicle Tracing method, Vehicle Terminal and Vehicle និង Server ជាដើម” ដែលសេវាកម្មទាំងអស់នេះត្រូវបានបង្ហាញតាមរយះប្រព័ន្ធប្រតិបត្តិការ Meizu FlymeAuto ដែលជាប្រតិបត្តិការសម្រាប់ប្រើនៅលើយានយន្ត។
ក្រោយមក Meizu បានចាប់ដៃគូយុទ្ធសាស្ត្រជាមួយ ក្រុមហ៊ុន Aisidi ដើម្បីបង្កើតហាង Meizu ( Offline Store) ព្រមទាំងបានធ្វើការលើការកែលម្អសេវាកម្មទាំងអស់របស់ហាង។ ហើយកិច្ចព្រមព្រៀងរវាងក្រុមហ៊ុនទាំងពីរ គឺបានបង្កើតបន្ទប់តាំងបង្ហាញផលិតផលចំនួន 1,000 ហាង ដែលជា Experience Store នៅទូទាំងប្រទេសចិន។ ទោះជាយ៉ាងណាមិនទាន់មានការបញ្ជាក់ណាមួយ ថាតើ Meizu នឹងលែងផលិតស្មាតហ្វូនដូចជា LG នៅឡើយទេ៕
