ជាមួយនិងការបង្ហាញវត្តមានរបស់បច្ចេកវិទ្យាអេក្រង់ Dynamic Island នៅលើទូរស័ព្ទ iPhone 14 Pro series គឺបានធ្វើអោយមានការចាប់អារម្មណ៌ខ្លាំងមែនទែនសម្រាប់អ្នកប្រើប្រាស់ជាច្រើន ហើយបច្ចេកវិទ្យាថ្មីមួយនេះ ក៏ត្រូវបានគេរំពឹងថា នឹងមានការចម្លងតាមឆាប់ៗនេះផងដែរ ពីបណ្តាក្រុមហ៊ុនស្មាតហ្វូន Android។
យោងតាមដំណឹងចុងក្រោយនៅថ្ងៃនេះ បានបញ្ជាក់ថា មានក្រុមអ្នកអភិវឌ្ឍកម្មវិធីសម្រាប់ Xiaomi MIUI គឺបានធ្វើការងារនៅលើមុខងារថ្មីនេះហើយ ដែលគេងថា គឺមានការឌីស្សាញចេញមកស្រដៀងគ្នាទៅនឹងបច្ចេកវិទ្យាអេក្រង់ Dynamic Island អញ្ចឹងដែរ។ មុខងារថ្មីនេះ គឺនឹងអាចបង្ហាញវត្តមានជាផ្លូវការជាមួយនិងស្មាតហ្វូនស៊េរីថ្មី Redmi K60 នៅក្នុងពេលឆាប់ៗខាងមុខនេះហើយ។
.jpg)
គួរបញ្ជាក់ថា កាលពីម្សិលមិញនេះ នាយកគ្រប់គ្រងក្រុមហ៊ុន Xiaomi ប្រចាំនៅប្រទេសចិន លោក Lu Weibing បានសួរទៅកាន់អ្នកប្រើប្រាស់ដែលជាហ្វេនរបស់ Xiaomi ថា តើគ្រប់គ្នាពិតជាចង់បានមុខងារ Smart Island “really need a Smart Island” មែនទេ? ស្រាប់តែអ្នកប្រើប្រាស់បណ្តាញ Weibo ជាច្រើនបានឆ្លើយតបថា ពួកគេពិតចង់ឃើញក្រុមហ៊ុន Xiaomi នាំយកនូវមុខងារ Dynamic Island មកខ្លាំងណាស់ ស្របពេលដែលមនុស្សមួយចំនួនបដិសេធទៅលើរឿងនេះផងដែរ។
សូមជំរាបថា នៅពេលនេះ ក្រុមអ្នកអភិវឌ្ឍកម្មវិធីសម្រាប់ Xiaomi MIUI គឺបានចាប់ផ្តើមធ្វើការងារសម្រាប់មុខងារថ្មី Dynamic Island នេះរូចហើយសម្រាប់ស្មាតហ្វូនជំនាន់ថ្មី ដោយនៅក្នុងនោះ ពួកគេក៏បានបង្ហាញដំណើរការទៅលើមុខងារជាច្រើនជាមួយនិងបច្ចេកវិទ្យាថ្មីនេះហើយ ក្នុងនោះរួមមានដូចជា music controls និងមុខងារ notifications រួមជាមួយនិងមុខងារជាច្រើនទៀតផងដែរ។ តើគ្រប់គ្នាមានអារម្មណ៌បែបណាដែរ នៅពេលដែល ឃើញមុខងារថ្មីនេះនៅស្មាតហ្វូន Android OEMs?
