vivo X Fold+ នឹងបំពាក់បច្ចេកវិទ្យាសាកកម្លាំង 80W Fast Charging និងបន្ទះឈីប Snapdragon 8+ Gen 1

vivo នឹងប្រកាសសម្ពោធស្មាតហ្វូនបត់បានជំនាន់ថ្មីម៉ូដែល vivo X Fold+ នៅសប្តាហ៌ក្រោយនេះហើយ ស្របពេលដែលនៅថ្ងៃនេះ ក៏មានការបញ្ចេញនូវគំរូបភាពស្មាតហ្វូនផ្លូវការជាមួយនិងជម្រើសពណ៌ក្រហមថែមទៀតផង។ នៅពេលនេះ ស្មាតហ្វូននេះត្រូវបានគេឃើញថា បានប្រទះឃើញនៅលើវិបសាយ AnTuTu រួចហើយ ដោយមានការបង្ហាញថា គឺបំពាក់នូវបន្ទះឈីប Snapdragon 8+ Gen 1 ស្របពេលដែលនៅពេលនេះ នៅលើបណ្តាក Weibo ក្រុមហ៊ុននេះ ក៏បានបង្ហោះនូវព័ត៌មានជាច្រើនរបស់ស្មាតហ្វូននេះថែមទៀតផង។ 

នៅលើបណ្តាញសង្គមនេះ ក៏មាការបញ្ជាក់ច្បាស់ថា ស្មាតហ្វូនបត់បានជំនាន់ថ្មីម៉ូដែលថ្មីនេះ នឹងបំពាក់នូវបច្ចេកវិទ្យាសាកកម្លាំង 80W Fast Charging ខណៈដែលស្មាតហ្វូនម៉ូដែល X Fold ប្រើប្រាស់ត្រឹមតែកម្លាំង 66W តែប៉ុណ្ណោះ។  យោងតាមក្រុមហ៊ុន vivo បានបញ្ជាក់អោយដឹងថា នៅលើស្មាតហ្វូន X Fold+នេះ គឺមានកម្មវិធីច្រើនជាង 5,000 ដែលធ្វើការយ៉ាងរលូនជាមួយនិងស្បែកកម្មវិធី OriginOS Ocean version។ 

សូមជំរាបផងដែរថា ស្មាតហ្វូនបត់បានដំបូងគេរបស់ក្រុមហ៊ុន vivo គឺនៅមិនទាន់មានការប្រកាសចេញលក់នៅលើទីផ្សារខាងក្រៅប្រទេសចិននោះទេ ហើយសម្រាប់ម៉ូដែលថ្មី ដែលមានការទម្លាយចេញនៅថ្ងៃនេះ ក៏នៅមិនទាន់មានបញ្ជាក់ថា នឹងមានលក់នៅលើទីផ្សារសកលដូចគ្នាផងដែរ ខណៈដែលស្មាតហ្វូនបត់បានដំបូងគេរបស់ក្រុមហ៊ុន vivo នេះ បានបង្ហាញខ្លួនកាលពីខែមេសាកន្លងទៅ មានតម្លៃ CNY8,999 ប្រហែល $1,270។