ថ្មីៗនេះ មានការទម្លាយថា ស្មាតហ្វូនស៊េរីថ្មីរបស់ក្រុមហ៊ុន Huawei ម៉ូដែល P60 Series អាចនឹងបង្ហាញខ្លួននៅក្នុងត្រីមាសទី 1 ឆ្នាំ 2023 ខាងមុខនេះហើយស្មាតហ្វូននេះ ក៏នឹងមានការដំណើរការជាមួយនឹងបន្ទះឈីប Snapdragon ជំនាន់ថ្មីផងដែរ។ យោងតាមអ្នកទម្លាយ Classmateguan បាននិយាយថា ស្មាតហ្វូន Huawei P60 series នឹងបង្ហាញខ្លួននៅក្នុងត្រីមាសទី 1 នៅក្នុងឆ្នាំ 2023 នេះ។

អ្នកទម្លាយរូបនេះ បានទម្លាយថា ស្មាតហ្វូន Huawei P60 Series នឹងមានបន្ទះឈីប Qualcomm Snapdragon 8 Gen 2 ប៉ុន្តែបានត្រឹមតែការប្រើប្រាស់កម្រិត 4G ប៉ុណ្ណោះ។ ស្មាតហ្វូននេះត្រូវគេទម្លាយទៀតថា ក៏នឹងមានម៉ូដែលស្តង់ដារដែលប្រើប្រាស់នូវអេក្រង់រាបស្មើផងដែរ។ ស្មាតហ្វូននេះ នឹងក្លាយជាស្មាតហ្វូនលំដាប់ថ្នាក់ប្រណិតដំបូងបំផុតរបស់ក្រុមហ៊ុននេះ ដែលនឹងមានប្រព័ន្ធប្រតិបត្តិការ HarmonyOS 3.1។ ក្រុមហ៊ុនHuawei បានតេស្តទៅលើកម្មវិធី software ដែលមានការអភិវឌ្ឍនៅក្នុងទម្រង់ developer beta ហើយនៅក្នុងខែមករា ក៏នឹងមានប្រភេទ public beta សម្រាប់ធ្វើតេស្តផងដែរ។

ប្រភពខាងលើបន្តថា ក្រុមហ៊ុន Huawei នេះនឹងប្រកាសចេញជាផ្លូវការនូវប្រព័ន្ធប្រតិបត្តិការ HarmonyOS 3.1 នៅក្នុងអំឡុងខែមីនា និងខែមេសាខាងមុខនេះ ហើយប្រព័ន្ធនេះនឹងប្រើប្រាស់នៅលើស្មាតហ្វូន P60 Series មុនគេ។ សូមជំរាបថា មកដល់ពេលនេះ ក៏មានរូបភាពជាច្រើនរបស់ស្មាតហ្វូននេះដែលបង្ហាញខ្លួននៅលើអនឡាញផងដែរ ហើយស្មាតហ្វុននេះ នឹងមានកាមេរ៉ាខាងក្រោយ 4 គ្រាប់ និងមានការប្រើប្រាស់អេក្រង់ Pill shape hole punch។ ក្រុមហ៊ុន Huawei នៅមិនទាន់មានការប្រកាសជាផ្លូវការនៃការបង្ហាញវត្តមានរបស់ស្មាតហ្វូន P60 series នៅឡើយទេ៕