ថាមពលថ្ម Reno 8 Pro អាចប្រើបានដល់ទៅ 4 ឆ្នាំ នេះបើយោងតាមការបញ្ជាក់ពីវិញ្ញាបនបត្រ TUV សម្រាប់ប្រសិទ្ធិភាព

ក្រុមហ៊ុនបច្ចេកវិទ្យា OPPO ទើបតែប្រកាសចេញនូវស្មាតហ្វូន Reno 8 និង  Reno 8 Pro កាលពីខែកក្កដាឆ្នាំ 2022 កន្លងទៅនេះនៅក្នុងប្រទេសឥណ្ឌា។ ស្មាតហ្វូនជំនាន់ថ្មីទាំងពីរនេះ គឺត្រូវបានប្រកាសដាក់លក់នៅលើទីផ្សារសកលរួចរាល់ហើយផងដែរ។ ជាមួយនិងវត្តមានរបស់ស្មាតហ្វូននេះ រោងចក្ររបស់ក្រុមហ៊ុន OPPO នៅក្នុងតំបន់ Noida ប្រទេសឥណ្ឌានេះ ក៏មានការបង្ហាញអំពីការផលិតទៅលើស្មាតហ្វូន Reno 8 series ផងដែរ។

បើតាមព័ត៌មាននោះ ស្មាតហ្វូនទាំងពីរនេះ នឹងមានការ upgrade ទៅលើ Android OS រយៈពេល 2 ឆ្នាំរហូតដល់ត្រីមាសទី 2 ឆ្នាំ 2024 នេះ ហើយក៏មានការអាប់ដេតសុវត្ថិភាពរយៈពេលដល់ទៅ 4 ឆ្នាំ ទៀតផង។ បន្ថែមពីនេះទៀតនោះ ស្មាតហ្វូនជំនាន់ថ្មីទាំងពីរនេះ ក៏មានការទទួលបាននូវវិញ្ញាបនបត្រ  TUV Rheinland សម្រាប់ពង្រឹងទៅលើសមត្ថភាពប្រើប្រាស់ថាមពលថ្មផងដែរ។ សូមជំរាបថា TUV Rheinland គឺជាស្ថាប័នអ្នកជំនាញជាសកលដែលធ្វើតេស្តទៅលើថាមពលថ្មដែលផ្តោតទៅលើភាពធន់ ភាពជឿជាក់ និងសុវត្ថិភាព។ 

បន្ទាប់ពីការតេស្តទៅលើថ្ម Lithium និងប្រព័ន្ធ Battery Health Management (BHM) system នៅលើស្មាតហ្វូន Reno 8 Pro នេះ រួចរាល់ ស្ថាប័ននេះបានបញ្ជាក់ថា ប្រព័ន្ធ Battery Health Engine (BHE) របស់ក្រុមហ៊ុន OPPO គឺអនុញ្ញាតអោយស្មាតហ្វូននេះ អាចរក្សាថាមពលថ្មបានដល់ទៅ 80% បន្ទាប់ពី 1600 charge cycles ហើយនឹងធន់ដល់ទៅ 4 ឆ្នាំ។ បើមើលទៅលើស្តង់ដារអន្តរជាតិនោះ គឺមានថាមពលថ្មត្រឹមតែ 60% ប៉ុណ្ណោះ បន្ទាប់ពី 300 charge cycles។ ស្មាតហ្វូន Reno 8 Pro នេះ មានថាមពលថ្ម 4,500mAh ដែលទ្រទ្រង់នូវ  80W charging ។

ស្មាតហ្វូន Reno 8 Pro មានអេក្រង់ 6.7-អ៊ីង កម្រិត FHD+ ល្បឿន 120Hz display និងប្រើប្រាស់បន្ទះឈីប Dimensity 8100-Max អមដំណើរដោតរ៉េមទំហំ 12GB និងមានអង្គចងចាំនៅក្នុងម៉ាស៊ីនទំហំ 256GB។ ស្មាតហ្វូននេះមានកាមេរ៉ាខាងមុខទំហំ 32-megapixel (Sony IMX709) និងមានកាមេរ៉ាខាងក្រោយទំហំ 50-megapixel (Sony IMX766) រួមជាមួយនឹងប្រព័ន្ធស្កេនក្រយ៉ៅដៃក្រោមអេក្រង់ផងដែរ៕