កាលពីឆ្នាំ 2019 កន្លកងទៅនេះ ក្រុមហ៊ុនបច្ចេកវិទ្យា Xiaomi បានដាក់ពាក្យស្នើរនូវប៉ាតង់ថ្មីរបស់ខ្លួនទៅកាន់ស្ថាប័ន CNIPA ដែលជាប្រភេទស្មាតហ្វូនដែលអាចបត់បានចេញក្រៅ មានលក្ខណៈស្រដៀងគ្នាទៅនឹងស្មាតហ្វូនបត់បានម៉ូដែល Mate X Series របស់ក្រុមហ៊ុនបច្ចេកវិទ្យា Huawei អញ្ចឹងដែរ។ បន្ទាប់ពីឆ្លងកាត់រយៈពេល 3 ឆ្នាំកន្លងមក អ្នកអភិវឌ្ឍកម្មវិធី Kuba Wojciechowski (@Za_Raczke) ក៏បានចែករំលែកនូវរូបភាពពិតៗជាច្រើនរបស់ស្មាតហ្វូននេះដែលមានភ្ជាប់ជាមួយនឹងគំរូរបស់ស្មាតហ្វូនបត់បាននេះផងដែរ។

ដូចអ្វីដែលយើងបានឃើញនៅពេលនេះអញ្ចឹង! ទម្រង់នៃការឌីស្សាញដែលមានការដាក់ស្នើទៅលើប៉ាតង់នេះ គឺមានបង្ហាញយ៉ាងច្បាស់ពីគំរូស្មាតហ្វូនបត់បាននេះ។ ស្មាតហ្វូនបត់បានជំនាន់ថ្មីរបស់ក្រុមហ៊ុនបច្ចេកវិទ្យា Xiaomi ថ្មីនេះ គឺមានកាមេរ៉ាខាងក្រោយ 4 គ្រាប់ ភ្លើង LED Flash ផងដែរ។ ស្មាតហ្វូនបត់បានថ្មីនេះអាច នឹងប្រើប្រាស់នូវថាមពលថ្មភ្លោះដែលមានថាមពលថ្មសរុបគឺ 3,500 mAh។

ស្មាតហ្វូនបត់បានថ្មីនេះ ត្រូវបានគេរំពឹងថា អាចនឹងប្រើប្រាស់នូវបន្ទះឈីប Qualcomm’s Snapdragon 855 និង X50 modem សម្រាប់ការទ្រទ្រង់ទៅលើបច្ចេកវិទ្យា 5G ផងដែរ។ លោក Wojciechowski ក៏បានចែករំលែកថា ស្មាតហ្វូននេះមានភាពធន់ក្នុងការប្រើប្រាស់ និងការឌីស្សាញយ៉ាងល្អបំផុតក្នុងការប្រើប្រាស់។ នាពេលខាងមុខនេះ ក្រុមហ៊ុន OEM ជាច្រើនក៏មានគម្រោងក្នុងការប្រកាសបង្ហាញនូវស្មាតហ្វូនដែលអាចបត់បានចេញទៅខាងក្រៅផងដែរ៕