Apple ធ្វើការស៊ើបអង្កេតទៅលើបញ្ហា 'Ghost Touches' ដែលកើតឡើងនៅលើស្មាតវ៉ច Series 9 និង Ultra 2

នៅក្នុងលិខិតប្រកាសផ្ទៃក្នុងមួយ ដែលមានការចែករំលែកជាមួយនឹងអ្នកផ្តល់សេវាកម្ម ដែលមានការអនុញ្ញាតពីក្រុមហ៊ុន Apple (Apple Authorized Service Providers) នៅក្នុងសប្តាហ៍នេះ បានបញ្ជាក់អោយដឹងថា ក្រុមហ៊ុន Apple បានដឹង និងធ្វើការស៊ើបអង្កេតទៅលើបញ្ហា Touch ដែលកើតឡើងនៅលើស្មាតវ៉ច  Apple Watch Series 9 និង Apple Watch Ultra 2 របស់ខ្លួនហើយ។ 

នៅក្នុងការប្រកាសរបស់ក្រុមហ៊ុនApple នោះ ត្រូវបានគេមើលឃើញថា “អតិថិជនមួយចំនួន បានរាយការណ៍ថា ស្មាតវ៉ច  Apple Watch Series 9 ឬ Apple Watch Ultra 2 មានបញ្ហានៃ touch នៅលើអេក្រង់។” អ្នកប្រើប្រាស់មួយចំនួនបាននិយាយថា បញ្ហានេះ គឺជា "ghost" touches។ បញ្ហានេះ អាចបណ្តាលអោយអេក្រង់នៅលើស្មាតវ៉ច Apple Watch នេះបង្ករនូវសកម្មភាពចម្លែកៗដែលអ្នកប្រើប្រាស់មិនបានដឹងនោះទេ។ បញ្ហានេះ ក៏បានបណ្តាលអោយស្មាតវ៉ច Apple Watch នេះខលដោយមិនអោយអ្នកប្រើប្រាស់ដឹងនោះទេ ហើយពេលខ្លះវាក៏មិនអោយអ្នកប្រើប្រាស់ចុចនៅលើ passcode របស់ស្មាតវ៉ចនេះទេ។

ក្រុមហ៊ុន Apple ណែនាំអោយអតិថិជនធ្វើការអាប់ដេតទៅលើ software ជំនាន់ចុងក្រោយបំផុតនៃ Apple Watch ហើយក្រុមហ៊ុននេះ មានក្តីសង្ឃឹមថា ខ្លួននឹងអាចដោះស្រាយទៅលើបញ្ហានេះ តាមរយៈការអាប់ដេតទៅលើ WatchOS ។ ក្រុមហ៊ុនApple បានណែនាំអ្នកបច្ចេកទេសមិនអោយជួសជុលទៅលើ Apple Watch នោះទេ ខណៈពេលដែលខ្លួនធ្វើការស៊ើបអង្កេតនោះ។ 

អ្នកបច្ចេកទេស ក៏ប្រាប់ទៅកាន់អតិថិជនជាច្រើនរបស់ខ្លួន ដែលមានបញ្ហានេះ បានធ្វើការ restart ទៅលើ Apple watch តាមរយៈការសង្កត់ទៅលើ Digital Crown និង side button នៅក្នុងពេលដូចគ្នារយៈពេល 10 វិនាទីរហូតទាល់តែឡូហ្គោ Apple បង្ហាញ។ គួរបញ្ជាក់ផងដែរថា Apple Watch Series 9 និង Apple Watch Ultra 2 នេះ បានបង្ហាញខ្លួននៅក្នុងខែកញ្ញាឆ្នាំ 2023 កន្លងទៅ៕