នៅទីបំផុតតុលាការរដ្ឋកាលីហ្វ័រញ៉ាសហរដ្ឋអាមេរិកបានចេញសេចក្តីសម្រេចលើករណីរបស់លោក Xiaolang Zhang អតីតបុគ្គលិក Apple ហើយ ដោយតុលាការបានសម្រេចកាត់ទៀតបុរសរូបនេះឲ្យជាប់ពន្ធនាគាររយៈពេល 3 ឆ្នាំ ប៉ុន្តែត្រូវអនុវត្តន៍ទោសនៅក្នុងពន្ធនាគាររយះពេល 3 ខែ និងតម្រូវឱ្យបង់ប្រាក់ការចំពោះការធ្វើឲ្យបែកធ្លាយឯកសារសំងាត់ និងការខូចខាតចំនួន 146,984 ដុល្លារអាមេរិកទៅឲ្យក្រុមហ៊ុន Apple។
សូមរំលឹកថា ករណីមានការបែកធ្លាយនូវឯកសារសំងាត់ទាក់ទងនឹងបច្ចេកវិទ្យារថយន្តអគ្គិសនីស្ថិតក្នុងគម្រោង Project Titan របស់ Apple បានកើតឡើងតាំងពីឆ្នាំ 2018 មកម្ល៉េះ ហើយក្រុមស៊ើបការសំងាត់របស់សហរដ្ឋអាមេរិកដែលហៅថា FBI និង Apple បានចាប់ផ្តើមសហការគ្នាស៊ើបអង្កេតលើបញ្ហានេះ រហូតឈានដល់ការរកឃើញថា លោក Xiaolang Zhang ទំនងជាបានលួចឯកសារអាថ៌កំបាំងទាក់ទងនឹងពាណិជ្ជកម្មរបស់ក្រុមហ៊ុនទាក់ទងនឹង Project Titan ដែលជាគម្រោងការធំរបស់ Apple ដែលត្រូវបានគេដឹងថាជាគម្រោងសំដៅទៅលើការផលិតបច្ចេកវិទ្យារថយន្តអគ្គិសនី (EV) ឆ្លាតវៃនាពេលអនាគតរបស់ Apple ។
លោក Xiaolang Zhang ដែលជាអតីតបុគ្គលិកបម្រើការនៅក្នុងគម្រោងការមហិមារបស់ Apple បានចាកចេញពីសហរដ្ឋអាមេរិក ហើយត្រលប់ទៅប្រទេសចិនវិញ ហើយបានចូលរួមជាមួយក្រុមហ៊ុន XMotors ដែលជាក្រុមហ៊ុន Start-up របស់ចិន ដែលធ្វើការលើបច្ចេកវិទ្យារថយន្តស្វយ័ត ឬរថយន្តបើកបរដោយខ្លួនឯង។
ដែលនេះជាពេលដែល Apple បានកត់សម្គាល់ពីអាកប្បកិរិយាគេចវេះរបស់លោក Zhang ជាលើកដំបូង និងចាប់ផ្តើមមានការសង្ស័យ។ ក្រោយមកភ័ស្តុតាងអំពីសកម្មភាពរបស់លោក Zhang បានលេចឡើងពីសកម្មភាពតាមរយះបណ្តាញរបស់គាត់នៅក្រុមហ៊ុន Apple និងឧបករណ៍ Apple របស់គាត់ដែលគាត់បានប្រើនាអំឡុងពេលបំពេញការងារនៅក្នុងក្រុមហ៊ុន Apple។ លោក Xiaolang Zhang បានធ្វើការជាវិស្វករលើផលិតផលផ្សេងៗនៅក្នុង Project Titan។ ក្រោយការរកឃើញ និងបង្ហាញភស្តុតាង ចុងក្រោយលោក Zhang ក៏បានសារភាពកំហុសរបស់ខ្លួន ហើយការកាត់ទោសក៏បានសម្រេចធ្វើឡើងនៅពេលនេះ៕