ការបង្ហាញវត្តមានរបស់ iPhone បត់របស់ Apple ប្រហែលជានឹងមានរយះពេលប៉ុន្មានឆ្នាំខាងមុខទៀតនេះ ប៉ុន្តែ ក្រុមហ៊ុនបិតាបច្ចេកវិទ្យា Cupertino របស់សហរដ្ឋអាមេរិកមួយនេះត្រូវបានគេដឹងថា អាចនឹងមានការដាក់បង្ហាញនៅ iPad បត់អេក្រង់ (Foldable iPad) មុនការបង្ហាញវត្តមានរបស់ iPhone បត់ (Foldable iPhone) នេះបើតាមរបាយការណ៍ដែលបានចេញផ្សាយកាលពីពេលថ្មីៗនេះ។
ទោះជាយ៉ាងណាក៏ដោយ Apple ក៏មិនបានបោះបង់ទៅលើការអភិវឌ្ឍន៍ផលិតស្មាតហ្វូនអេក្រង់បត់ Foldable iPhone របស់ខ្លួននោះឡើយ ផ្ទុយទៅវិញ ក្រុមហ៊ុនបិតាបច្ចេកវិទ្យាមួយនេះត្រូវបានគេដឹងថា កំពុងស្ថិតក្នុងដំណាក់កាលដំបូងនៃការអភិវឌ្ឍន៍គំរូ iPhone ដែលអាចបត់បាន ឬ Foldable iPhone នេះបើតាមការចេញផ្សាយដោយបណ្តាញសារព័ត៌មាន The Information។ ហើយគំរូដើមនៃ Foldable iPhone ដំបូងត្រូវបានគេរាយការណ៍ថា មានការរចនាពីរដែលស្រដៀងគ្នានឹងស្មាតហ្វូនអេក្រង់បត់ Galaxy Z Flip របស់ Samsung។
យោងតាមរបាយការណ៍បាននិយាយថា Apple កំពុងធ្វើការលើ Foldable iPhones ដែលមានកម្រាស់ត្រឹមតែពាក់កណ្តាលដូចម៉ូដែល iPhone បច្ចុប្បន្ន ដែលធ្វើឲ្យ Foldable iPhone មិនមានកម្រាស់ក្រាស់ពេកនៅពេលដែលបត់។ បន្ថែមពីនេះ ក្រុមហ៊ុននេះ ក៏កំពុងស្វែងរកគំនិតច្នៃប្រឌិតថ្មីដើម្បីបន្ថែមអេក្រង់ខាងក្រៅសម្រាប់ទូរស័ព្ទបត់អេក្រង់របស់ខ្លួនផងដែរ។ ទោះជាយ៉ាងណាក៏ដោយ បញ្ហាប្រឈមមួយចំនួនក៏កើតមានឡើងផងដែរ ដូចជាការប្រើប្រាស់ថ្ម និងការប្រើប្រាស់បច្ចេកវិទ្យាអេក្រង់បត់ដែលជាហេតុធ្វើឲ្យក្រុមវិស្វកររបស់ Apple ពិបាកក្នុងការសម្រេចគោលដៅក្នុងការផលិត Foldable iPhone បាន។
ទោះបីជាមានបញ្ហាប្រឈមទាំងនេះក៏ដោយ Apple ត្រូវបានគេនិយាយថា បានពិភាក្សាអំពីការបញ្ជាទិញគ្រឿងបន្លាស់ជាមួយក្រុមហ៊ុនផលិតនៅអាស៊ីសម្រាប់ iPhone ដែលអាចបត់បានទាំងពីររបស់ខ្លួនរួចហើយ។ យ៉ាងណាមិញ មានការលើកឡើងថា គម្រោងក្នុងការផលិត Foldable iPhone នេះអាចត្រូវបានលុបចោល ប្រសិនបើការផលិតមិនស្របតាមស្តង់ដាររបស់ Apple ចង់បាន។
ដោយឡែកសម្រាប់ Foldable iPad ត្រូវបានគេដឹងថា Apple កំពុងតែផ្តោតយកចិត្តទុកដាក់ខ្លាំងក្នុងការអភិវឌ្ឍន៍ ហើយ Foldable iPad នឹងមានអេក្រង់អេក្រង់ទំហំ 8 អ៊ីង ដែលជាទំហំប្រហាក់ហែលគ្នានឹង iPad mini។ សម្រាប់បញ្ហាប្រឈមដែល Apple ត្រូវដោះស្រាយសម្រាប់ Foldable iPad គឺការធ្វើយ៉ាងណាមិនធ្វើឲ្យមានស្នាមផ្នត់នៅត្រង់កន្លែងបត់ ដើម្បីធ្វើឲ្យអេក្រង់ Foldable iPad មើលទៅរាបស្មើរ និងអាចគាំទ្រការប្រើប្រាស់ជាមួយនឹង Apple Pencil បាន៕
