នៅថ្ងៃនេះ នាយកប្រតិបត្តិរបស់ក្រុមហ៊ុន Apple លោក Tim Cook បានបង្ហើបថា ក្រុមហ៊ុន Apple គឺមានការផ្តោតខ្លាំងទៅលើបច្ចេកវិទ្យា AI នៅក្នុងឆ្នាំនេះ។ ការលើកឡើងនេះ ត្រូវបានធ្វើឡើងនៅក្នុងព្រឹត្តិការណ៍នៃការជួបជាមួយនឹងម្ចាស់ភាគហ៊ុនជាច្រើនរបស់ Apple ដោយពេលនោះលោកនាយកប្រតិបត្តិរូបនេះ បានចែករំលែកថា ក្រុមហ៊ុន Apple គឺផ្តោតទៅលើបច្ចេកវិទ្យា AI ដោយសារតែវាអាចមានសមត្ថភាពក្នុងការផ្លាស់ប្តូរទៅលើវិធីដែលយើងធ្វើរឿងជាច្រើន និងការដោះស្រាយទៅលើបញ្ហាជាច្រើនបានលឿនជាងមុននៅក្នុងវិធីសាស្រ្តថ្មីៗថែមទៀតផង។

ខណៈពេលដែលក្រុមហ៊ុនបច្ចេកវិទ្យាយក្សធំៗដូចជា Microsoft និង Google ចាបផ្តើមបំពាក់នូវ AI ទៅលើផលិតផលជាច្រើនរបស់ខ្លួននោះ ក្រុមហ៊ុន Apple បានចាប់ផ្តើមគិតថា ពេលនេះ គួរតែដល់ពេលផងដែរ។ លោក Cook បាននិយាយថា ផលិតផលជាច្រើនរបស់ក្រុមហ៊ុន Apple នឹងកាន់តែឆ្លាតវៃជាមួយនឹងបច្ចេកវិទ្យា AI ហើយក្រុមហ៊ុនមានគម្រោងក្នុងការបង្ហាញនូវបច្ចេកវិទ្យា AI ដ៏អស្ចារ្យនេះនៅក្នុងពេលឆាប់ៗនេះ។ លោកមានមោទនភាពនៃវិធីសាស្រ្តដែលកុំព្យូទ័រជាច្រើនរបស់ក្រុមហ៊ុន Apple មានសមត្ថភាព AI ដ៏ខ្លាំងក្លាកម្រិតខ្ពស់បំផុតនោះ។

ក្រុមហ៊ុន Apple នៅតែបន្តក្នុងការរក្សាទុកនូវគម្រោងផែនការ AI របស់ពួកគេអោយស្ថិតនៅក្នុងភាពអាថ៌កំបាំងបំផុតមុនការប្រកាសជាផ្លូវការនោះ។ ក្រុមហ៊ុននេះថ្មីៗនេះក៏មានគម្រោងផ្តោតទៅលើរថយន្តអគ្គិសនីឆ្លាតវៃនិងបញ្ជាជាមួយនឹងបច្ចេកវិទ្យា AI ។ យើងនឹងរង់ចាំព័ត៌មានជាច្រើនបន្ថែមទៀតអំពីរឿងនេះ៕