ក្រុមហ៊ុន Huawei ត្រូវបានគេដឹងថា នឹងមានការប្រកាសចេញកំពូលស្មាតហ្វូនជំនាន់ថ្មី P70 Seriesនៅប្រទេសចិនក្នុងពេលឆាប់ៗខាងមុខនេះ។ សម្រាប់គុណសម្បត្តិសំខាន់ៗមួយចំនួននៅលើ Huawei P70 Series ត្រូវបានប្រភពព័ត៌មានចចាមអារ៉ាមជាច្រើនបានធ្វើការទម្លាយចេញជាហូរហែរ ហើយនៅពេលនេះក៏មានប្រភពព័ត៌មានថ្មីមួយទៀតបានទម្លាយពីសែនស័រកាមេរ៉ាគោលដែលត្រូវប្រើនៅលើ Huawei P70 ដែលនឹងមកដល់នាពេលខាងមុខនេះ។
Huawei ត្រូវបានគេដឹងថា មានការផ្តោតជាសំខាន់ទៅលើការប្រើប្រាស់ប្រព័ន្ធកាមេរ៉ានៅលើកំពូលស្មាតហ្វូនជំនាន់ថ្មី P70 Series របស់ខ្លួនឲ្យមានប្រសិទ្ធិភាពកាន់តែខ្លាំង។ បើតាមប្រភពពីក្រុមហ៊ុនផ្គត់ផ្គង់ដែលជាដៃគូរបស់់ Huawei បានធ្វើការបង្ហើបពីសែនស័រកាមេរ៉ាគោល ឬ Primary Camera Sensor ដែលត្រូវប្រើនៅលើ P70។ ប្រភពបានបញ្ជាក់ដូច្នេះថា Huawei នឹងប្រើនូវសែនស័រថ្មីរបស់ក្រុមហ៊ុន OmniVision ស៊េរី OV50H ធ្វើជា Primary Sensor សម្រាប់ P70។ ដោយសែនស័រថ្មីនេះមានទំហំ 50MP ខ្នាត 1/1.3-inch និងមានសមត្ថភាពផលិតសាច់រូបភាពបានដល់កម្រិត 1.2μm។
ស្របជាមួយគ្នានេះបើតាមការលើកឡើងនៅលើគណនី Digital Chat Station ក៏បានបញ្ជាក់ដូចគ្នានេះដែរ ថា Huawei P70 គឺជាស្មាតហ្វូនកំពូលដំបូងរបស់ Huawei ដែលប្រើប្រាស់សែនស័រ OmniVision OV50H ធ្វើជា Primary Sensor កាមេរ៉ាក្រោយ។ DCS ក៏បានបញ្ជាក់ទៀតថា Huawei P70 នឹងប្រើប្រាស់នូវកញ្ចប់កាមេរ៉ាក្រោយទំហំ 50MP ទាំងបីគ្រាប់ ដោយក្នុងនោះរួមមាន OV50H ទំហំ 50MP Primary+ 50MP Ultrawide+ 50MP Periscope Telephoto ដែលមានសមត្ថភាពអាចធ្វើបាន 4X Optical-zoom និងប្រើសម្រាប់ថតរូបភាពបែប Macro ថែមទៀតផង។
Huawei P70 នឹងបំពាក់នូវបច្ចេកវិទ្យាអេក្រង់កោងគែមទាំងបួន Quad-Curved Display ទំហំ 6.7-inch ជាអេក្រង់ OLED Panel ដែលត្រូវបានគេដឹងថាផ្គត់ផ្គង់ដោយក្រុមហ៊ុនផលិតក្នុងប្រទេសចិនដូចជា BEO, CSOT, Visionox និង Tianma ជាដើម៕
