មកដល់ពេលនេះ សម្រាប់ការបង្ហាញត្តមារបស់ស្មាតហ្វូនអេក្រង់បត់បានជំនាន់ថ្មីរបស់ក្រុមហ៊ុន Samsung ដែលមានដូចជា Galaxy Z Fold 6 និង Galaxy Z Flip 6 គឺកាន់តែកៀកហើយបន្ទាប់ពីការប្រកាសជាផ្លូវការរបស់ស្មាតហ្វូន S-Series ហើយស្របពេលជាមួយគ្នានេះ ស្មាតហ្វូនអេក្រង់បត់បាននេះ ក៏មានការបែកធ្លាយនូវព័ត៌មានថ្មីៗមួយចំនួន រួមជាមួយនិងការចុះបញ្ជីនៅលើស្ថាប័នជាច្រើនផងដែរ។
នៅថ្ងៃនេះ វិញ្ញាបនបត្រសុវត្ថិភាពក្នុងប្រទេសកូរ៉េខាងត្បូង ក៏បានបង្ហាញនូវព័ត៌មានថាមពលថ្មរបស់ស្មាតហ្វូននេះផងដែរ។ នៅលើបញ្ជីនេះក៏មានការបង្ហាញរូបភាពថាមពលរបស់ Galaxy Z Fold 6 ដោយបញ្ចូលទាំងព័ត៌មាន វិញ្ញាបនបត្រសុវត្ថិភាពក្នុងប្រទេសកូរ៉េខាងត្បូងនេះផងដែរ។ នៅលើបញ្ជីនេះបញ្ជាក់ថា ថាមពលថ្មនៅលើ Galaxy Z Fold 6 គឺមានលេខម៉ូដែល EB-BF956ABY និង EB-BF957ABY ខណៈដែលម៉ូដែល Z Flip 6 គឺមានលេខម៉ូដែល EB-BF741ABY និង EB-BF742ABY។
ជាមួយគ្នានៅលើបញ្ជីរបស់ស្ថាប័ន BIS របស់ប្រទេសឥណ្ឌា ក៏មានការបញ្ជាក់ពីថាមពលថ្មសម្រាប់ស្មាតហ្វូនអេក្រង់បត់បាន Z Fold 6 ជាមួយនិងលេខម៉ូដែល EB-BF956ABY ហើយនិងថាមពលថ្ម Z Flip 6 គឺមានលេខម៉ូដែល EB-BF741ABE និង EB-BF742ABE.
គួរបញ្ជាក់ថា យោងតាមការទម្លាយនាពេលថ្មីៗនេះ បានអោយដឹងថា Samsung Galaxy Z Fold 6 នឹងមានអេក្រង់បត់បានខាងក្នុងទំហំ 7.6-អ៊ីង ខណៈដែលអេក្រង់ខាងក្រៅមានទំហំ 6.2-អ៊ីង និងមានការឌីស្សាញរន្ធមួយគ្រាប់នៅចំកណ្តាលនៃអេក្រង់។ សម្រាប់ស្មាតហ្វូនអេក្រង់បត់បាន Galaxy Z Flip 6 ត្រូវបានគេទម្លាយថា មានការឌីស្សាញស្រដៀងគ្នាជាមួយនិងជំនាន់មុនដែរ។ ស្មាតហ្វូនថ្មីនេះនៅតែបន្តឌីស្សាញអេក្រង់ខាងក្រៅជាមួយស្ទីលដូចជា folder icon មានទំហំ 3.4 អ៊ីង។
