លេចធ្លាយលក្ខណៈសម្បត្តិ realme C65 ខណៈដែលការបង្ហាញវត្តមាន នឹងធ្វើឡើងនៅថ្ងៃទី 2 ខែមេសាខាងមុខនេះហើយ

realme ត្រូវបានគេរាយការណ៌ថា នឹងមានការប្រកាសចេញនូវស្មាតហ្វូនជំនាន់ថ្មីរបស់ខ្លូនម៉ូដែល Realme C65 នៅលើទីផ្សារសកលក្នុងពេលឆាប់ៗនេះហើយ។ បន្ទាប់ពីការបែកធ្លាយជាច្រើនរួចមក ក្រុមហ៊ុននេះ បានបញ្ជាក់អោយដឹងថា ស្មាតហ្វូនជំនាន់ថ្មី នឹងមានការប្រកាសចេញនៅលើទីផ្សារប្រទេសវៀតណាមនៅថ្ងៃទី 2 ខែមេសាខាងមុខនេះហើយ។ 

លោក Chase Xu ដែលជាអនុប្រធានក្រុមហ៊ុន realme ក៏បានប្រកាសចេញនូវព័ត៌មានរបស់ស្មាតហ្វូនជំនាន់ថ្មី C65 ថា នឹងបង្ហាញវត្តមាននៅលើទីផ្សារឥណ្ឌូនេស៊ី និងបង់ក្លាដេស ហើយនិងម៉ាឡេស៊ី រួមនិងប្រទេសហ្វីលីពីនផងដែរ។ គួរបញ្ជាក់ថា ថ្មីៗនេះ ក្រុមហ៊ុននេះ ក៏មានការបង្ហោះនូវរូបភាព និងព័ត៌មានរបស់ស្មាតហ្វូន realme C65 ផងដែរ ដោយមានជម្រើសពណ៌ ខ្មៅ និងពណ៌ស្វាយ ហើយនិងពណ៌មាស។ នៅលើរូបភាពក៏មានការបញ្ជាក់ពីការឌីស្សាញរូបរាងរបស់ស្មាតហ្វូន C65 នេះផងដែរ ដែលមើលទៅដូចគ្នាជាមួយ Samsung Galaxy S22 អញ្ចឹង។នៅរូបភាពស្មាតហ្វូននេះបានបង្ហាញថា នៅលើអេក្រង់គឺមានរន្ធមួយគ្រាប់នៅចំកណ្តាល និងមានប៊ូតុង Dynamic ដូច realme 12 5G ផងដែរ។

ទាក់ទងនឹងស្មាតហ្វូននេះ អ្នកទម្លាយ Sudhanshu Ambhore ក៏បានចែករំលែកនូវព័ត៌មានរបស់ស្មាតហ្វូន C65 នេះផងដែរ។ ផ្អែកលើអ្នកទម្លាយ Sudhanshu បាននិយាយថា ស្មាតហ្វូន realme C65 នឹងមានអេក្រង់ទំហំ 6.67-អ៊ីង IPS LCD screen ល្បឿន 90Hz refresh rate និងមានកម្រិតពន្លឺ 625 nits brightness។ ស្មាតហ្វូននេះ នឹងរត់នៅលើបន្ទះឈីប Helio G85 កាមេរ៉ាគោលទំហំ 50MP គាំទ្រនូវ Flicker sensor ហើយនិងមានកាមេរ៉ាមុខទំហំ 8MP។ 

ស្មាតហ្វូនថ្មីនេះ នឹងមានទំហំ 5,000mAh គាំទ្រនូវកម្លាំងសាក 45W fast charging។ នៅលើស្មាតហ្វូននេះ នឹងមានប្រព័ន្ធស្កែនម្រាមដៃនៅចំហៀងតួ ហើយនិងមានបច្ចេកវិទ្យា IP54 rating ការពារការកំពប់ទឹកលើ និងធូលីជ្រាតចូលផងដែរ។