ថ្មីៗនេះ ក្រុមហ៊ុន Nothing ទើបតែបញ្ចេញនូវព័ត៌មានថ្មីនៃកាសស្តាប់ឥតខ្សែស៊េរីថ្មីរបស់ខ្លួនម៉ូដែល Nothing Ear (3) TWS earbuds ហើយក្រៅពីកាសនេះ ក៏មានការបង្ហាញថា ក្រុមហ៊ុននេះ ក៏នូវមានផលិតផលជាច្រើនទៀតផងដែរ ដែលស្ថិតនៅក្នុងការអភិវឌ្ឍ។ យោងតាមការបញ្ជាក់ចេញ ពីរបាយការណ៍មួយរបស់ 91mobiles Hindi នោះ បានអោយដឹងថា នៅពេលនេះ ក្រុមហ៊ុន Nothing បានធ្វើការនៅលើស្មាតហ្វូន Nothing Phone3 ដែលថែមទាំងមានការបំពាក់នូវបន្ទះឈីប Snapdragon 8-series ជំនាន់ថ្មីថែមទៀតផង។
បើតាមការបញ្ជាក់ចេញពីប្រភពឧស្សាហកម្មបច្ចេកវិទ្យានេះ បានអោយដឹងថា ស្មាតហ្វូន Nothing Phone 3 នេះគឺមានការបំពាក់នូវបន្ទះឈីប Snapdragon 8s Gen 3។ បន្ទះឈីបនេះ ត្រូវបានគេឃើញថា បានប្រើប្រាស់នៅលើស្មាតហ្វូន Xiaomi Civi 4 Pro ដែលបង្ហាញខ្លួនជាផ្លូវការកាលពីខែមុននេះ នៅក្នុងប្រទេសចិន កាលពីពេលថ្មីៗនេះដែរ។ សូមជំរាបថា បន្ទះឈីប Snapdragon 8s Gen 3 នេះ ត្រូវបបានប្រើប្រាស់នៅលើស្មាតហ្វូនមួយចំនួននៅក្នុងប្រទេសចិនរួចហើយ ដែលក្នុងនោះ រួមដូចជា Redmi Turbo 3, Realme GT Neo 6 និង iQOO Z9 Turbo ជាដើម។
សូមជំរាបថា កាលពីមុននេះ មានរបាយការណ៍មួយចំនួនបានបញ្ជាក់ថា ស្មាតហ្វូន Nothing Phone 3 ថ្មីនេះ នឹងមានតម្លៃចន្លោះពី Rs 40,000 (~$480) និង Rs 45,000 (~$540) សម្រាប់ទីផ្សារប្រទេសឥណ្ឌា។ ស្មាតហ្វូន Phone 3 នេះ ត្រូវបានគេព្យាករណ៌ថា អាចនឹងបង្ហាញខ្លួននៅក្នុងខែកក្កដាខាងមុខនេះ។ ស្មាតហ្វូនNothing Phone 3 នេះនឹងប្រកួតប្រជែងជាមួយនឹងស្មាតហ្វូន Poco F6 នេះ នៅក្នុងទីផ្សារសកលផងដែរ៕
