និយាយពីស្មាតហ្វូន Pixel 8a គឺមានការបែកធ្លាយព័ត៌មានជាច្រើនរួចមកហើយដោយក្នុងនោះថែមទាំងមានការបញ្ចេញនូវរូប រាងការឌីស្សាញនានាផងដែរ។ នៅថ្ងៃនេះ ក្រុមហ៊ុន Google បានបញ្ចេញនូវរូបភាពផ្សព្វផ្សាយផ្លូវការបស់ស្មាតហ្វូននេះថែម ទៀតហើយ។ បើតាមការទម្លាយ Paras តាមរយៈ PassionateGeekz គឺបានបញ្ជាក់ថា ស្មាតហ្វូននេះ មានវត្តមាននៅហាង មួយដែលមានឈ្មោះថា Canadian Retailer ហើយថែមទាំងមានតម្លៃផងដែរ។
ដូចអ្វីដែលគ្រប់គ្នាបានឃើញនៅលើរូបភាពនេះអញ្ចឹង! ស្មាតហ្វូន Pixel 8a ដែលមានទំហំ 128GB នឹងមានតម្លៃ CA$ 708.99 ខណៈដែលទំហំ 256GB នឹងមានតម្លៃ CA$ 792.99។ ប្រៀបធៀបជាមួយនិង Pixel 7a ដែលបង្ហាញវត្តមានមុននេះ គឺដាក់លក់ជាមួយតម្លៃ CA$ 599 នៅលើស្មាតហ្វូន 128GB។ Pixel 8a តម្លៃខ្ពស់ជាង 10%។ ប៉ុន្តែនៅលើបញ្ជីហាងនេះ មិនមានការបញ្ជាក់ពីលក្ខណៈសម្បត្តិទូទៅដែលប្រើប្រាស់នៅលើស្មាតហ្វូននេះនៅឡើយទេ។
សូមជំរាបថា ការឌីស្សាញរូបរាងស្មាតហ្វូន Pixel 8a មានការបែកធ្លាយជាច្រើនរួចមកហើយ។ ស្មាតហ្វូននេះមានរូបរាង ប្រហែលគ្នាជាមួយម៉ូដែល Pixel 8 ដោយមានការឌីស្សាញម៉ូឌុលកាមេរ៉ាដូចគ្នាជាមួយនិងជំនាន់មុនដែរ។ ស្មាតហ្វូននេះ នឹងមានជម្រើសពណ៌ច្រើន Obsidian, Porcelain, Bay និងពណ៌ Mint។ សម្រាប់ភាពខុសគ្នាខ្លាំងនៅលើស្មាតហ្វូន Pixel 8a គឺមានអេក្រង់ល្បឿន 120Hz refresh rate ដែលជាម៉ូដែលដំបូងគេបំផុតរបស់ Pixel A-series phone ដែលមានល្បឿនអេក្រង់ថ្មីនេះ។ បន្ទះអេក្រង់នេះ អាចនឹងមានទំហំ 6.1-អ៊ីង OLED panel គាំទ្រនូវពន្លឺ 1400-nit peak brightness។
ដូចគ្នាជាមួយនិង Pixel 8 អញ្ចឹង! នៅលើស្មាតហ្វូន Pixel 8a នឹងមានការបំពាក់នូវបន្ទះឈីប Google Tensor G3 ប៉ុន្តែល្បឿនមិនដូចគ្នាទេ។ ស្មាតហ្វូននេះមានរ៉េមទំហំ 8GB និងប្រើប្រាស់បន្ទះឈីប Titan M security ថែមទៀតផង។ ស្មាតហ្វូននេះ នឹងដំណើរការនៅលើ Android 14។ ស្មាតហ្វូននេះ មានកាមេរ៉ាដូចគ្នាជាមួយនិង Pixel 7a អញ្ចឹងដែរ គឺមានកាមេរ៉ាគោលទំហំ 64MP និងគ្រាប់ទីពីរមានទំហំ 13MP ultrawide និងមានកាមេរ៉ាមុខទំហំ 13MP។ នៅលើកាមេរ៉ាស្មាតហ្វូននេះ ក៏អាចនឹងមានការបំពាក់នូវមុខងារពិសេសដូច Pixel 8 អញ្ចឹងដែរ ក្នុងនោះមានដូចជា Best Take និង Magic Eraser។
