យោងតាមព័ត៌មាន កាលពីសប្តាហ៍មុននេះ បានបញ្ជាក់ថា realme ដែលមានលេខកូដ RMX3700 ត្រូវបានវិញ្ញាបនបត្រ 3C នៅក្នុងប្រទេសចិន អនុម័តទទួលស្គាល់ថាជាស្មាតហ្វូនថ្មីដែលនឹងអាចចេញលក់នៅលើទីផ្សារបានហើយ។ ពាក្យចចាមអារ៉ាមជាច្រើ បានទម្លាយថា ស្មាតហ្វូននេះ គឺជាស្មាតហ្វូន realme GT Neo 5 SE ( ឬ GT Neo 5 Lite) នៅពេលដែលស្មាតហ្វូននេះមានវត្តមាននៅលើទីផ្សារ។

នៅថ្ងៃនេះ ស្មាតហ្វូននេះ ក៏ត្រូវបានគេឃើញនៅលើ databaseរបស់ MIIT របស់ប្រទេសនេះ ដែលនេះ មានន័យថា ស្មាតហ្វូននេះអាចនឹងបង្ហាញខ្លួនជាផ្លូវការនៅចុងខែនេះ ឬនៅក្នុងខែមេសា។ ជាធម្មតា វិញ្ញាបនបត្រ MIIT នេះ មិនបានទម្លាយនូវព័ត៌មានច្រើនអំពីលក្ខណៈសម្បត្តិរបស់ស្មាតហ្វូន realme GT Neo 5 SE នោះទេ។ ប៉ុន្តែ ការបែកធ្លាយថ្មីមួយចេញពី Digital Chat Station ក៏បានបង្ហាញអំពីលក្ខណៈសម្បត្តិរបស់ស្មាតហ្វូននេះផងដែរ។

ស្មាតហ្វូន realme GT Neo 5 SE នេះ នឹងមានអេក្រង់ទំហំ 6.74-អ៊ីង OLED ជាមួយនឹងកម្រិតភាពច្បាស់ 2722x1240 pixels និង refresh rate 144Hz ។ ស្មាតហ្វូននេះ នឹងមានបន្ទះឈីប Snapdragon 7 Plus Gen 1 និង 5,500mAh ជាមួយនឹងបច្ចេកវិទ្យា 100W charging ។

បន្ថែមពីនេះទៀតនោះ ស្មាតហ្វូន GT Neo 5 SE នេះ ត្រូវបានគេទម្លាយថា នឹងមានកាមេរ៉ាខាងមុខទំហំ 16-Megapixel ហើយនិងមានកាមេរ៉ាខាងក្រោយទំហំ 64-megapixel, 8-megapixel ultra-wide lensនិង 2-megapixel macro។ ស្មាតហ្វូននេះប្រើប្រាស់នូវ ColorOS 13 និង Android 13 OS ។ ស្មាតហ្វូន GT Neo 5 SE អាចនឹងបង្ហាញខ្លួននៅក្នុងខែមេសានៅក្នុងប្រទេសចិន ជាមួយនឹងតម្លៃ 2,000 Yuan (~$286) ៕