Subaru នឹងសហការជាមួយ Toyota ក្នុងការផលិតរថយន្តអគ្គិសនី SUV ចំនួន 3 ស៊េរីបន្ថែមទៀតដែលត្រៀមប្រកាសចេញនៅឆ្នាំ 2026

ក្រុមហ៊ុនផលិតរថយន្តម៉ាក Subaru ត្រូវបានគេដឹងថា បានត្រៀមធ្វើការអភិវឌ្ឍន៍ផលិតរថយន្តអគ្គិសនីថ្មីជាប្រភេទ SUV ចំនួនបីស៊េរីបន្ថែមទៀត ដោយមានការសហការពីក្រុមហ៊ុន Toyota។ រថយន្តអគ្គិសនី SUV ថ្មីទាំងបីស៊េរីរបស់ Subaru នឹងបង្ហញវត្តមាននៅលើទីផ្សារនៅក្នុងឆ្នាំ 2026។

ក្នុងពេលបច្ចុប្បន្ននេះផលិប័ត្រក្នុងទីផ្សាររថយន្តអគ្គិសនីរបស់ Subaru គឺមានរថយន្តអគ្គិសនីតែមួយម៉ូដែលប៉ុណ្ណោះឈ្មោះថា Solterra ដែលជាប្រភទរថយន្ត SUV-EV ត្រូវបានសហការផលិតដោយក្រុមហ៊ុន Toyota។ ដោយមើលឃើញពីតម្រូវការក្នុងការប្រើប្រាស់សម្រាប់រថយន្តអគ្គិសនីកំពុងមានការកើនឡើង Subaru មានគោលបំណងក្នុងការកែប្រែសង្វាក់ផលិតកម្មរថយន្តរបស់ខ្លួនចូលក្នុងសង្វាក់រថយន្តអគ្គិសនី ដើម្បីទាញយកទីផ្សារអ្នកប្រើប្រាស់។

ហើយការសម្រេចចិត្តចាប់ដៃគូសហការផលិតជាមួយក្រុមហ៊ុន Toyota កើតចេញពីការទទួលស្គាល់របស់នាយកប្រតិបត្តិក្រុមហ៊ុន Subaru លោក Atsushi Osaki ដែលមានទស្សនៈថា Toyota គឺជាក្រុមហ៊ុនតែមួយគត់ដែលអាចជួយជ្រំជ្រែងក្នុងដំណើរការផលិតរថយន្តអគ្គិសនីជាពិសេសសម្រាប់ក្រុមហ៊ុនផលិតរថយន្តខ្នាតតូចដូចជា Subaru។

តាមរយៈការសហការជាមួយក្រុមហ៊ុន Toyota ក្រុមហ៊ុន Subaru អាចប្រមូលផ្តុំធនធាន និងកាត់បន្ថយបន្ទុកហិរញ្ញវត្ថុក្នុងការអភិវឌ្ឍន៍ និងផលិតរថយន្តអគ្គិសនីថ្មីរបស់ខ្លួន។ បទពិសោធន៍ដ៏ធំធេងរបស់ក្រុមហ៊ុន Toyota ក្នុងបច្ចេកវិទ្យារថយន្តអគ្គិសនី និងរថយន្តកូនកាត់ (Hybrid-EV) ពិតជានឹងរួមចំណែកដល់ការអភិវឌ្ឍន៍យានយន្តប្រកបដោយប្រសិទ្ធភាព និងជាក្តីសង្ឃឹមបន្ថែមទៀតរបស់ Subaru។

រថយន្ត Subaru EVs ដែលនឹងមកដល់នាពេលខាងមុខនេះ ត្រូវបានគ្រោងផលិតដោយក្រុមហ៊ុន Toyota នៅសហរដ្ឋអាមេរិក។ ការផ្លាស់ប្តូរនេះបង្ហាញពីបំណងប្រាថ្នារបស់ក្រុមហ៊ុន Subaru ក្នុងការពង្រីកវត្តមានម៉ាកេដម៉ាកយីហៅរថយន្តរបស់ខ្លួននៅសហរដ្ឋអាមេរិក និងទាញយកទុនការវិនិយោគលើទីផ្សាររថយន្ត EV ដែលកំពុងមានសន្ទុះកើនឡើងខ្លាំង។

បន្ថែមពីលើរថយន្តអគ្គិសនីថ្មីទាំងបីស៊េរីដែលផលិតដោយក្រុមហ៊ុនតូយ៉ូតា ក្រុមហ៊ុន Subaru មានគម្រោងដ៏មានមហិច្ឆតាក្នុងការដាក់លក់រថយន្តអគ្គិសនីថ្មីចំនួន 4 ស៊េរីនៅឆ្នាំ 2028។ ក្រុមហ៊ុនក៏កំពុងអភិវឌ្ឍសម្រាប់កំនែប្រែរថយន្តកូនកាត់ (Hybrid EV) នៃម៉ូដែលដ៏ពេញនិយមរបស់ខ្លួនផងដែរដូចជាម៉ូដែល Crosstrek និង Forester ដែលបង្ហាញពីវិធីសាស្រ្តពហុភាគីចំពោះការប្រើប្រាស់អគ្គិសនី។ Subaru Solterra ប្រឈមមុខនឹងការរិះគន់ចំពោះល្បឿនសាកថ្មយឺត និងរយះចំងាយខ្លីសម្រាប់ការបើកបរ ដូច្នេះក្រុមហ៊ុនបានប្តេជ្ញាចិត្តដោះស្រាយការខ្វះខាតទាំងនេះនៅក្នុងម៉ូដែលថ្មីរបស់ខ្លួនដែលនឹងមកដល់នាពេលអនាគត៕