យោងតាមព័ត៌មានថ្មីដែលចេញផ្សាយនៅពេលថ្មីៗនេះ បានបង្ហាញថា OPPO បានត្រៀមខ្លួនប្រកាសចេញនូវស្មាតហ្វូនជំនាន់ថ្មីរបស់ខ្លួន Reno12 series នៅក្នុងប្រទេសចិន នៅថ្ងៃទី 23 ខែឧសភាខាងមុខនេះហើយ។ ថ្មីៗនេះ ក្រុមហ៊ុនបច្ចេកវិទ្យាយក្សចិនមួយនេះ ក៏មានការទម្លាយចេញនូវព័ត៌មាន និងការឌីស្សាញរូបរាងរបស់ស្មាតហ្វូន Reno12 ផងដែរ។
នៅថ្ងៃនេះ នៅលើបញ្ជី TENAA បានបន្តបញ្ចេញនូវព័ត៌មានពេញលេញរបស់ស្មាតហ្វូនថែមទៀតហើយ។ នៅលើបញ្ជីខាងលើនេះ ថែមទាំងមានការបញ្ជាក់ថា ស្មាតហ្វូននេះ នឹងប្រើប្រាស់នូវបន្ទះឈីប Dimensity 8250 ហើយនិងមានបន្តប្រើប្រាស់ថាមពលថ្ម ហើយនិងអេក្រង់ដែលមានទំហំដូចគ្នាជាមួយនិង Reno11 អញ្ចឹង។
OPPO Reno12 នឹងមានអេក្រង់ទំហំ 6.7 អ៊ីង កញ្ចក់ OLED display បង្ហាញចេញបាន Full HD+ ប៉ុន្តែនៅលើបញ្ជីនេះ មិនមានការបង្ហាញរូបភាពអេក្រង់ស្មាតហ្វូនថ្មីនេះនៅឡើយទេ។ មានការទម្លាយថា ស្មាតហ្វូននេះ នឹងមានអេក្រង់គែមកោង និងមានភាពងាយស្រួលកាន់ប្រើនៅក្នុងដៃម្ខាង។ ស្មាតហ្វូននេះមានកម្រ៉ាស់ត្រឹមតែ 7.25mm និងមានទម្ងន់ 179grams ដែលស្រាលជាងគេនៅក្នុងស្រឡាយស្មាតហ្វូនថ្នាក់កណ្តាល ដែលមានទម្ងន់ជាមធ្យម 200grams។
នៅលើស្មាតហ្វូននេះ នឹងដំណើរការនៅលើបន្ទះឈីបកម្រិត 4nm ដែលជាប្រភេទ solid CPU ដែល core មួយគ្រាប់មានសមត្ថភាពរត់បានល្បឿន 3.1GHz និង 3 Cores ទៀតរត់បានល្បឿន 3.0GHz ហើយនិងមានការពង្រឹងសមត្ថភាពខ្លាំងទៅលើ GPU។
OPPO Reno12 នឹងមានការប្រើប្រាស់នូវកាមេរ៉ាមុខទំហំ 50MP ខណៈដែលកាមេរ៉ាក្រាយមានចំនួន 3 គ្រាប់ ដោយកាមេរ៉ាគោលមានទំហំ 50MP និងគ្រាប់ទីពីរមានទំហំ 8MP ultrawide ខណៈដែលគ្រាប់ទីបីមានទំហំ 50MP telephoto ដែលហ៊្សូមបាន 2x optical zoom។ ស្មាតហ្វូននេះ នឹងមានថ្មទំហំ 5,000mAh ហើយនិងមានការតម្លើងនូវស្បែកមុខកម្មវិធី ColorOS 14 ដែលផ្អែកលើប្រព័ន្ធប្រតិបត្តិការ Android 14 ក៏ដូចជាមុខងារ IR blaster រួមនិងប្រព័ន្ធស្កែនម្រាមដៃនៅលើអេក្រង់ថែមទៀតផង។
OPPO Reno12 នឹងបង្ហាញវត្តមានជាមួយនិងជម្រើសទំហំ 12GB-256GB, 12GB-512GB, 16GB-256GB និងទំហំ 16GB-512GB ហើយនិងមានជម្រើសពណ៌យ៉ាងតិចមានចំនួន 3 ពណ៌។
