លក្ខណៈសម្បត្តិស្មាតហ្វូនអេក្រង់បត់ Samsung Galaxy Z Fold 6 ត្រូវបានបង្ហាញនៅលើបញ្ជី GeekBench

បើតាមព័ត៌មានថ្មីៗកន្លងទៅនេះ បានទម្លាយថា ស្មាតហ្វូនបត់បានជំនាន់ថ្មីរបស់ក្រុមហ៊ុន Samsung អាចនឹងបង្ហាញខ្លួននៅក្នុងពេលឆាប់ៗនេះហើយ។ ប្រភពខាងលើនេះ បន្តថា ស្មាតហ្វូនបត់បានម៉ូដែលថ្មីរបស់ក្រុមហ៊ុននេះ អាចនឹងមានម៉ូដែល Galaxy Z Fold 6 និង Galaxy Z Flip 6។ នៅពេលនេះ នៅមុនការប្រកាសជាផ្លូវការនេះ នៅលើបញ្ជី Benchmark ថ្មីមួយ បានទម្លាយអំពីលក្ខណៈសម្បត្តិជាច្រើនរបស់ស្មាតហ្វូន Galaxy Z Fold 6 នេះហើយ។ 

នៅពេលនេះ ស្មាតហ្វូនបត់បាន Galaxy Z Fold 6 ដែលជាសមិទ្ធិផលថ្មីរបស់ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ បានបង្ហាញខ្លួននៅលើ GeekBench ជាមួយនឹងលេខកូដ SM-F956U។ សម្រាប់ ‘U’ នៅលើស្មាតហ្វូនអេក្រង់បត់បានថ្មីនេះ គឺជាម៉ូដែលសម្រាប់ version នៅក្នុងសហរដ្ឋអាមេរិក។ បើមើលទៅលើលទ្ធផលនៃ Benchmark នេះ ស្មាតហ្វូននេះ មានពិន្ទុចំនួន 1,964 នៅក្នុងការតេស្ត Single-core និងពិន្ទុ 6,619 នៅក្នុងការតេស្ត Multi-core។ 

បន្ថែមពីនេះទៀតនោះ នៅលើស្មាតហ្វូនអេក្រង់បត់ថ្មីនេះ គឺមានការបំពាក់នូវមានបន្ទះឈីប  Qualcomm Snapdragon 8 Gen 3 SoC គាំទ្រជាមួយនឹងរ៉េមទំហំ 12GB ។ នៅលើ GeekBench នេះក៏មានបញ្ជាក់ទៀតថា ស្មាតហ្វូនបត់បានថ្មីនេះដំណើរការនូវប្រព័ន្ធប្រតិបត្តិការ Android 14 OS ផងដែរ។ នៅលើរបាយការណ៍ជាច្រើនមុននេះ បានបញ្ជាក់អំពីលក្ខណៈសម្បត្តិ និងពណ៌របស់ស្មាតហ្វូន Galaxy Z Fold 6 នេះ ថែមទៀត។ ស្មាតហ្វូនអេក្រង់បត់បានថ្មីនេះ អាចនឹងជាពណ៌  Navy (Blue), Silver Shadow, Light Pink, Crafted Black និង White យ៉ាងស្រស់ស្អាត។

ស្មាតហ្វូនអេក្រង់បត់បានថ្មី Galaxy Z Fold 6 នេះ នឹងមាន 3 ទំហំគឺ 256GB, 512GB និង 1TB។ ទំហំថ្មរបស់ស្មាតហ្វូន Galaxy Z Fold 6 ក៏បានទម្លាយនាពេលថ្មីៗនេះផងដែរ។ របាយការណ៍មុននេះ បានបញ្ជាក់ថា ស្មាតហ្វូននេះ នឹងមានថាមពលថ្មទំហំ  4,400mAH ដែលទ្រទ្រង់ទៅលើបច្ចេកវិទ្យាសាកថ្មលឿន 25W wired fast charging ថែមទៀតផង។ វាក៏ទ្រទ្រង់នូវ 15W wireless charging និង 4.5W reverse wireless charging ផងដែរ៕