Ming-Chi Kuo ទម្លាយថា Galaxy S25 Series នឹងមានការប្រើប្រាស់បន្ទះឈីប Snapdragon 8 Gen 4 នៅគ្រប់ទីផ្សារ

បន្ទាប់ពីការប្រកាសចេញនូវស្មាតតហ្វូនជំនាន់ថ្មី Galaxy S24 Series រួចមក ក្រុមហ៊ុន Samsung ត្រូវបានគេមើលឃើញថា បានងាកមកផ្តោតខ្លាំងទៅលើស្មាតហ្វូនអេក្រង់បត់បានជំនាន់ថ្មីរបស់ខ្លួនវិញម្តង។ Galaxy Z Fold 6 និង Z Flip 6 នឹងក្លាយជាស្មាតហ្វូនអេក្រង់បត់បានជំនាន់ថ្មីរបស់ក្រុមហ៊ុននេះ ដែលគ្រោងនឹងបង្ហាញវត្តមានជាផ្លូវការនៅទីក្រុងប៉ារីស នៅថ្ងៃទី 10 ខែកក្កដាខាងមុខនេះហើយ។ ទាក់ទងស្មាតហ្វូនជំនាន់ថ្មីរបស់ក្រុមហ៊ុន Samsung នេះ នៅថ្ងៃនេះ មានការទម្លាយថា ក្រុមហ៊ុននេះបាននឹងកំពុងតែធ្វើការនៅលើស្មាតហ្វូនជំនាន់ថ្មី Galaxy S25 series ថែមទៀតហើយ។

យោងតាមការទម្លាយរបស់អ្នកវិភាគ Ming-Chi Kuo ដែលបានចែកចាយព័ត៌មាននៅថ្ងៃនេះ បានបង្ហាញថា ហ្វេនៗរបស់ក្រុមហ៊ុន Samsung នឹងមានការពេញចិត្ត។ លោក Kuo បានបញ្ជាក់ថា វត្តមានរបស់ស្មាតហ្វូនជំនាន់ថ្មី Samsung Galaxy S25 series នៅឆ្នាំក្រោយនេះ នឹងមានការប្រើប្រាស់នូវបន្ទះឈីបជំនាន់ថ្មី Qualcomm Snapdragon 8 Gen 4 នៅលើទីផ្សារទូទាំងពិភពលោក។ គួរបញ្ជាក់ថា មុននេះធ្លាប់មានព័ត៌មានថា ក្រុមហ៊ុន Samsung ក៏នឹងមានការប្រើប្រាស់នូវបន្ទះឈីប Exynos ដែលអភិវឌ្ឍដោយខ្លួនឯងនៅលើស្មាតហ្វូន Galaxy S series សម្រាប់ទីផ្សារមួយចំនួនផងដែរ។ គួរបញ្ជាក់ថាវត្តមានរបស់ 60% របស់ស្មាតហ្វូន Galaxy S24 series ដែលដាក់លក់ឆ្នាំនេះ គឺប្រើប្រាស់នូវបន្ទះឈីប Exynos 2400។

សម្រាប់ឆ្នាំនេះ អាចនឹងមានភាពខុសគ្នាពីឆ្នាំមុន ដោយសារតែបន្ទះឈីប Exynos 2500 ទំនងជាមិនអាចមានការប្រើប្រាស់នៅលើស្មាតហ្វូន Samsung ជំនាន់ថ្មីនោះទេ។ លោក Kuo បានបញ្ជាក់បន្ថែមទៀតថា ការប្រើប្រាស់នូវបន្ទះឈីប Qualcomm Snapdragon 8 Gen 4 នឹងមានតម្លៃកើនឡើងចន្លោះពី 25%-30%។ ភ្ជាប់គ្នាជាមួយនិងបញ្ហាខាងលើនេះមានសេចក្តីរាយការណ៌ថា សង្វាក់ផលិតកម្មទៅលើបន្ទះឈីបំជំនាន់ទីពីរ Samsung 3nm គឺមានការធ្លាក់ចុះដល់ទៅ 20% ផងដែរ នេះកត្តានេះ បានធ្វើអោយក្រុមហ៊ុន Samsung ងាកមកបង្កើននូវការបញ្ចេញទិញពីក្រុមហ៊ុន TSMC វិញ។ មកដល់ពេលនេះ គេនៅមិនទាន់ដឹងថា ក្រុមហ៊ុន Samsung អាចនឹងមានការគ្រប់គ្រងទៅលើតម្លៃរបស់ Galaxy S25 series បានឬយ៉ាងណានោះទេ។