ស្មាតហ្វូនបត់បានចុងក្រោយបំផុតនោះគឺ Galaxy Z Fold 6 ត្រូវបានគេបញ្ជាក់ថា នឹងមានការប្រកាសចេញជាផ្លូវការនៅថ្ងៃទី 10 ខែកក្កដានេះហើយ គឺនៅក្នុងព្រឹត្តិការណ៍ Galaxy Unpacked របស់ក្រុមហ៊ុន Samsung។ ថ្មីៗនេះ បើតាមពាក្យចចាមជាច្រើន បាននិយាយថា វត្តមានរបស់ស្មាតហ្វូនអេក្រង់បត់ថ្មីនេះ ក៏នឹងមានម៉ូដែលស្មាតហ្វូន High-end នៃត្រកូល Fold 6 នេះផងដែរ ដោយសមាជិកថ្មីនេះ គឺនឹងមានកម្រាស់ស្តើងជាងមុន។ ខណៈពេដែលស្មាតហ្វូននេះ នឹងមិនបង្ហាញខ្លួននៅសប្តាហ៍នេះទេ មានរបាយការណ៍ថ្មីំមួយ បានទម្លាយព័ត៌មានអំពីស្មាតហ្វូនថ្មីនេះហើយ ។
យោងតាមការបញ្ជាក់របស់សារព័ត៌មាន TheElec ដែលមានប្រភពចេញពីប្រទេសកូរ៉េខាងត្បូង បានអោយដឹងថា ក្រុមហ៊ុន Samsung បានធ្វើការនៅលើស្មាតហ្វូនអេក្រង់បត់បានមានកម្រ៉ាស់ស្តើងជាង Z Fold 6 ដែលម៉ូដែលនេះ មានអេក្រង់ធំជាងមុន។ របាយការណ៍ដដែលនេះ បានអះអាងទៀតថា ស្មាតហ្វូនថ្មីនេះ នឹងមានអេក្រង់ខាងក្រៅទំហំ 6.5-អ៊ីង និងអេក្រង់ខាងក្នុងទំហំ 8-អ៊ីង ធៀបជាមួយនឹងស្មាតហ្វូន Z Fold 6 គឺមានអេក្រង់ខាងក្នុងទំហំ 7.6-អ៊ីង និងអេក្រង់ខាងក្រៅទំហំ 6.3-អ៊ីង ប៉ុណ្ណោះ ។
ស្មាតហ្វូន Galaxy Z Fold 6 ដែលមានរូបរាងស្លីមជាងមុននេះ គ្រោងនឹងបង្ហាញខ្លួននៅក្នុងត្រីមាសទី 4 ឆ្នាំ 2024 ខាងមុខនេះហើយសម្រាប់ការការផលិតចេញនឹងមានត្រឹមតែ 400,000 ទៅ 500,000 គ្រឿងប៉ុណ្ណោះ។ ស្មាតហ្វូននេះ នឹងបង្ហាញខ្លួននៅក្នុងទីផ្សារមួយចំនួនដែលបានកំណត់ប៉ុណ្នោះ ហើយក្នុងនោះ ក៏មាននៅក្នុងប្រទេសចិនផងដែរ។ គោលដៅរបស់ក្រុមហ៊ុន Samsung គឺការបង្កើតនូវស្មាតហ្វូនបត់បានដែលមានរូបរាងស្តើងជាងម៉ូឌែលជំនាន់មុនៗរបស់វា។ ស្មាតហ្វូននេះនឹងទ្រទ្រង់ទៅលើ S Pen ថែមទៀតផង។
នៅក្នុងរបាយការណ៍ចេញពី TheElec ដដែលនេះ បានបញ្ជាក់ទៀតថា ស្មាតហ្វូនអេក្រង់បត់បានជំនាន់ថ្មី Z Fold 6 Slim នេះ គឺត្រូវបានអភិវឌ្ឍនៅក្នុងត្រីមាសទី 1 ឆ្នាំ 2024។ ស្មាតហ្វូន Z Fold 6 Slim នេះ នឹងមានតម្លៃខ្ពស់ជាងគេផងដែរ។ សូមជំរាបថា យុទ្ធសាស្រ្តរបស់ក្រុមហ៊ុន Samsung នៅពេលនេះ ក៏នឹងផ្តោតទៅលើស្មាតហ្វូនប្រណិតបត់បានសម្រាប់ទៅផ្សារមួយចំនួនដែលបានជ្រើសរើស ខណៈពេលដែលម៉ូដែ Z Fold 6 គឺផ្តោតទៅលើទីផ្សារអន្តរជាតិទូទៅ៕
