បែកធ្លាយនូវបន្ទះឈីប ហើយនិងប្រព័ន្ធកាមេរ៉ាដែលនឹងមានការប្រើប្រាស់លើ Galaxy S25 Ultra

យោងតាមការទម្លាយព័ត៌មានថ្មីរបស់ Digital Chat Station នៅថ្ងៃនេះ បានបង្ហាញចេញជាថ្មីថែមទៀតហើយ ទាក់ទងទៅនឹងកំពូលស្មាតហ្វូនជំនាន់ថ្មី Flagship របស់ក្រុមហ៊ុន Samsung ម៉ូដែល Galaxy S25 Ultra។ ការបែកធ្លាយខាងលើនេះ បានបង្ហាញថា ស្មាតហ្វូនជំនាន់ថ្មី S25 Ultra នឹងក្លាយជាស្មាតហ្វូនដំបូងគេបំផុតរបស់ក្រុមហ៊ុន Samsung ដែលនឹងមានការប្រើប្រាស់នូវបន្ទឈីប Snapdragon 8 Gen 4។ 

និយាយពីប្រព័ន្ធកាមេរ៉ានៅលើស្មាតហ្វូនជំនាន់ថ្មី Galaxy S25 Ultra វិញ គឺនឹងមានការបំពាក់នូវកាមេរ៉ាគោលទំហំ 200-Megapixel គាំទ្រដោយការហ៊្សូមបាន 3x zoom lens និង 5x periscope telephoto lens។ កាមេរ៉ានេះ គឺស្រដៀងគ្នាទៅនឹងកាមេរ៉ាដែលប្រើប្រាស់នៅលើស្មាតហ្វូនជំនាន់ថ្មី Galaxy S24 Ultra អញ្ចឹង។ រីឯកាមេរ៉ាទី 4 វិញ គេនៅមិនទាន់ច្បាស់ទេថា តើក្រុមហ៊ុន Samsung នឹងបង្កើននូវទំហំ Megapixel ទៅលើឡែន zoom នោះទេ។

ការបែកធ្លាយខាងលើនេះ ក៏មានការបញ្ចេញនូវព័ត៌មានរបស់ថាមពលថ្មនៅលើស្មាតហ្វូនជំនាន់ថ្មីនេះផងដែរ ដោយបញ្ជាក់ថា ក្រុមហ៊ុន Samsung នឹងបំពាក់នូវថាមពលថ្ម និងបច្ចេកវិទ្យាសាក ដូចគ្នាជាមួយនិងស្មាតហ្វូនជំនាន់មុនអញ្ចឹងដែរ។ បើតាមពាក្យចចាមអារ៉ាមថ្មីៗនេះ បានបញ្ជាក់ថា Galaxy S25 Ultra នឹងមានការប្រើប្រាស់នូវបន្ទះឈីប 4855mAh ឬអាច 5000mAh ជាមួយនិងការបច្ចេកវិទ្យាសាកកម្លាំង 45W។ បន្ថែមពីនេះស្មាតហ្វូននេះក៏ត្រូវបានគេទម្លាយថា នឹងមានការប្រើប្រាស់នូវបន្ទះឈីប Snapdragon 8 Gen 4 ផងដែរ។ 

Galaxy S25 Ultra ត្រូវបានគេរំពឹងថា នឹងមានការប្រើប្រាស់នូវស្បែកមុខកម្មវិធី One UI 7 និងមានការផ្អែកលើប្រព័ន្ធប្រតិបត្តិការ Android 15។ ជាមួយគ្នានេះ កាលពីខែមុននេះ ក៏មានការទម្លាយថា ស្មាតហ្វូនជំនាន់ថ្មី Galaxy S25 Ultra នឹងក្លាយជាស្មាតហ្វូនដែលមានកម្រ៉ាស់ស្តើងត្រឹមតែ 8.4mm ប៉ុណ្ណោះ ប្រៀបធៀបជាមួយនិង S24 Ultra គឺមានកម្រ៉ាស់ 8.6mm។