ក្រុមហ៊ុនផលិតស្មាតហ្វូន Xiaomi បានរំកឹលខ្លួនឡើងមកឈរនៅចំណាត់ថ្នាក់លេខ 3 ជាក្រុមហ៊ុនដែលលក់ម៉ូនីទ័របានច្រើនបំផុតក្នុងទីផ្សារប្រទេសចិន នេះបើតាមការបញ្ជាក់ក្នុងរបាយការណ៍របស់ Runto Technology។ យុទ្ធសាស្ត្ររបស់ Xiaomi គឺការផ្តោតទៅលើផលិតភាពនៃការផលិត និងការលក់ផលិតផលសម្រាប់ការប្រើប្រាស់នៅក្នុងការិយាល័យ ទន្ទឹមនឹងកំណើននៃការលក់ម៉ូនីទ័រក្នុងប្រទេសចិនបានកើនឡើងប្រមាណ 0.8% ជាមួយចំនួនដែលលក់បានសរុបប្រមាណ 4.95 លានគ្រឿងនៅត្រីឆមាសដំបូងក្នុងឆ្នាំ 2024 នេះ។
AOC គឺជាក្រុមហ៊ុនដែលនាំមុខគេក្នុងទីផ្សារលក់ម៉ូនីទ័រក្នុងប្រទេសចិននាឆមាសដំបូងក្នុងឆ្នាំនេះ ប៉ុន្តែ ការលក់របស់ក្រុមហ៊ុននេះ គឺមានការធ្លាក់ចុះបើធៀបនឹងរយះពេលដូចគ្នានៃឆ្នាំមុន។ AOC បានផ្តោតទៅលើការលក់ម៉ូនីទ័រដែលមានអេក្រង់ទំហំ 27-inch QHD របស់ខ្លួន ខណៈម៉ូដែល AOC Q27G2S/D គឺជាម៉ូដែលដ៏ពេញនិយម និងលក់ដាច់បំផុតរបស់ក្រុមហ៊ុន។
ចំនែកក្រុមហ៊ុន HKC ដែលត្រូវបានគេស្គាល់ថាជា ក្រុមហ៊ុនផលិតផលិតផល Gaming-centric បានឈរនៅចំណាត់ថ្នាក់លេខ 2 ក្នុងទីផ្សារលក់ម៉ូនីទ័ររបស់ប្រទេសចិន។ ក្រុមហ៊ុននេះ ក៏បានផ្តោតទៅលើការលក់ម៉ូនីទ័រហ្គេមីងដែលមានអេក្រង់ទំហំ 27-inch QHD Gaming Monitor របស់ខ្លួនផងដែរ ដោយម៉ូដែលនេះជម្រុញការលក់សរុបបានដល់ 80% ឯណោះ។
ចំនែក Xiaomi ដែលជាអ្នកគ្រងដំណែងលេខ 3 វិញ គឺបានផ្តោតសំខាន់ទៅលើការលក់ម៉ូនីទ័រដែលមានអេក្រង់ទំហំ 27-inch FHD របស់ខ្លួន។ ហើយម៉ូនីទ័ររបស់ Xiaomi ក៏ទទួលបានប្រជាប្រិយភាពខ្ពស់ពីអ្នកប្រើប្រាស់ដោយសារតែមានគុណភាពផលិតកម្រិតខ្ពស់ អេក្រង់ល្អ និងមានតម្លៃសមរម្យជាងតម្លៃម៉ូនីទ័ររបស់ដៃគូប្រគូត។ Xiaomi បានគ្រប់គ្រងចំនែកទីផ្សារ 33% សម្រាប់ម៉ូនីទ័រដែលមានតម្លៃធូរថ្លៃដែលមានតម្លៃខ្ទង់ $69។
ចំនែកទីផ្សារលក់ម៉ូនីទ័របែប Gaming វិញ គឺជាកត្តាសំខាន់ក្នុងការជម្រុញការលក់ម៉ូនីទ័រប្រទេសចិនឈានឡើងផងដែរ ដោយសារអ្នកប្រើប្រាស់មានតម្រូវការច្រើនសម្រាប់ការប្រើប្រាស់ម៉ូនីទ័រប្រភេទនេះ ដោយសារតែមានការប្រើប្រាស់សម្រាប់ការធ្វើកិច្ចការងារពីចម្ងាយ និងការរៀនតាមបណ្តាញអនឡាញជាដើម។ ទោះជាយ៉ាងណាក្នុងរបាយការណ៍មិនបានបញ្ជាក់តួរលេខនៃការលក់ម៉ូនីទ័ររបស់ក្រុមហ៊ុន Top-3 នោះទេ៕
