ស្មាតហ្វូនអេក្រង់បត់ជំនាន់ថ្មីរបស់ Google គឺ Google Pixel 9 Pro Fold នឹងបង្ហាញវត្តមាននៅថ្ងៃទី 13 ខែសីហា សប្តាហ៍ក្រោយនេះជាមួយនឹង Google Pixel 9 Series រួមនឹងផលិតថ្មីៗមួយចំនួនទៀត។ ហើយនៅមុនថ្ងៃនៃការបង្ហាញវត្តមានមកដល់ ក៏មានការទម្លាយព័ត៌មានបន្ថែមទៀតទាក់ទងទៅនឹងទំហំវិមាត្ររបស់ស្មាតហ្វូនបត់អេក្រង់ជំនាន់ថ្មី Pixel 9 Pro Fold ផងដែរ។
បើតាមប្រភពព័ត៌មានពី Android Headlines បានបង្ហើបថា Google Pixel 9 Pro Fold នឹងមានទំហំវិមាត្ររួម 155.2 x 150.2 x 5.1mm នៅពេលមិនបត់អេក្រង់ និង 155.2 x 77.1 x 10.5mm នៅពេលបត់ មានន័យថា នៅពេលមិនបត់ Pixel 9 Pro Fold គឺមានកម្រាស់ស្តើងត្រឹម 5.1mm និងនៅពេលបត់កម្រាស់កើនឡើងដល់ 10.5mm ដែលស្តើងជាងជំនាន់មុនដែលមានកម្រាស់ 5.8mm នៅពេលមិនបត់ និងពេលបត់មានកម្រាស់ 12.1mm។ ហើយបើធៀបនឹងកម្រាស់របស់ Samsung Galaxy Z Fold 6 ដែលមានកម្រាស់ 5.6mm នៅពេលបត់ និង 12.1mm នៅពេលបត់ គឺកម្រាស់ Pixel 9 Pro Fold គឺស្តើងជាង។
ទាក់ទងនឹងទំនង់វិញ ត្រូវបានប្រភពបញ្ជាក់ថា Google Pixel 9 Pro Fold គឺមានទំហំ 257 ក្រាម ធៀបនឹងទំងន់ជំនាន់ Pixel Fold ជំនាន់ដំបូងដែលមានទំងន់ 283 ក្រាម។ ហើយទំងន់របស់ Pixel 9 Pro Fold គឺធ្ងន់ជាងទំងន់របស់ Honor Magic V3 ដែលមានទំងន់ 226 ក្រាម និងទំងន់របស់ Galaxy Z Fold 6 និង OnePlus Open ដែលមានទំងន់ 239 ក្រាម។
Google Pixel 9 Pro Fold គឺនឹងមានអេក្រង់ខាងក្រៅទំហំ 6.3-inch OLED Display ខ្នាត 20:9 ratio និងអេក្រង់បត់ខាងក្នុងទំហំ 8-inch OLED Display ហើយអេក្រង់ខាងក្រៅ និងខាងក្នុង គឺមានកម្រិតពន្លឺខ្ពស់ដល់ 1,600nits សម្រាប់មាតិកា HDR និងឡើងខ្ពស់អស់ដល់ 2,700nits។ Google Pixel 9 Pro Fold ក៏នឹងបំពាក់បន្ទះឈីបជំនាន់ថ្មីរបស់ក្រុមហ៊ុន គឺ Tensor G4 ផងដែរ៕
