ក្រុមហ៊ុនផលិតស្មាតហ្វូនម៉ាក Tecno ត្រូវបានគេដឹងថា បានត្រៀមខ្លួនក្នុងការប្រកាសចេញស្មាតហ្វូនអេក្រង់បត់ជំនាន់ថ្មីដែលមានដូចជា Tecno Phantom V Fold 2 និង Phantom V2 Flip។ ហើយថ្មីៗនេះម៉ូដែល Phantom V Fold 2 ដែលជា book-style foldable បានបង្ហាញវត្តមាននៅលើបញ្ចីរបស់ស្ថាប័ន Google Play Console និង TUV Rheinland រួចរាល់ហើយ។ ដោយឡែកនៅពេលនេះ មានការទម្លាយព័ត៌មានទាក់ទងនឹងម៉ូដែល Flip-style គឺ Phantom V Flip វិញម្តង។
បើតាមគណនី X (អតិត Twitter) បានបង្ហាញចេញនូវការឌីស្សាញរបស់ Tecno Phantom V2 Flip។ បើតាមរូបភាពបង្ហាញថា Phantom V2 Flip គឺមានអេក្រង់ខាងក្រៅទំហំធំពេញលិញពាក់កណ្តាលដូចស្មាតហ្វូន Flip ក្រុមហ៊ុនមួយចំនួនដែរ គឺមិនដូចជាជំនាន់ Phantom V Flip ដែលមានអេក្រង់ខាងក្រៅតូចរាងជាកងរង្វង់នោះទេ។
ក្នុងរូបភាពបានបង្ហាញឲ្យឃើញថា Phantom V2 Flip គឺមានកាមេរ៉ាពីរគ្រាប់រៀបបញ្ឈរនៅជិតគែមខាងឆ្វេង រួមនឹងអំពូល LED Flash មួយគ្រាប់ នេះបើតាមការបញ្ជាក់បន្ថែមនៅលើគេហទំព័រស្ថាប័ន FCC។ និយាយរួមទៅការឌីស្សាញរបស់ Tecno Phantom V2 Flip គឺមានភាពស្រដៀងគ្នាជាមួយនឹង Xiaomi Mix Flip។ ស្មាតហ្វូនអេក្រង់បត់ជំនាន់ថ្មីនេះ គឺមានស៊ុមជាលោហៈជាមួយការរចនារំលេចដោយស្នាមបន្ទាត់អង់តែងសេវា។
តាមការបង្ហាញនៅលើបញ្ចីរបស់ FCC បានបញ្ជាក់ថា Tecno Phantom V2 Flip គឺមានថ្មចំនួនពីរគ្រាប់ដែលមានទំហំ 3,410mAh និង 1,180mAh ដែលសរុបទំហំថ្មគឺ 4,580mAh ដែលបង្កើនទំហំ 15% ធៀបនឹងថ្មជំនាន់ Phantom V Flip។ បន្ថែមពីនេះនៅលើបញ្ចីរបស់ FCC បានបង្ហាញទៀតថា Phantom V2 Flip គឺគាំទ្របច្ចេកវិទ្យាសាកភ្លើងល្បឿនលឿនកំលាំង 70W Wired Fast Charging, មានរ៉េមទំហំ 8GB និងអង្គផ្ទុកទិន្នន័យទំហំ 256GB។ Phantom V2 Flip នឹងមានកម្រាស់ 8mm នៅពេលមិនបត់ និង 16mm នៅពេលបត់។
តាមការបង្ហាញនៅលើបញ្ចីរបស់ Geekbench បញ្ជាក់ថា Tecno Phantom V2 Flip គឺប្រើបន្ទះឈីប MediaTek Dimensity 8020 ភ្ជាប់ជាមួយរ៉េមទំហំ 8GB ដែលអាចអូសបានពិន្ទុ 814 នៅលើអង្គគណនា Single-core និងពិន្ទុ 2,866 នៅលើអង្គគណនា Multi-core។ ទោះជាយ៉ាងណា ក្រុមហ៊ុន Tecno មិនទាន់បានបញ្ជាក់កាលវេលាផ្លូវការណ៍សម្រាប់ការដាក់បង្ហាញវត្តមានស្មាតហ្វូនអេក្រង់បត់ Phantom V2 Fold និង Phantom V2 Flip របស់ខ្លួននៅឡើយទេ៕
