Apple បានបង្កើនទំហំថ្មរបស់ iPhone 15 Series ធំជាងថ្មជំនាន់មុនមិនដល់ 100mAh នោះទេ

ជាការពិតណាស់ ហើយក៏ជាទម្លាប់មិនល្អរបស់ Apple ដែលបានប្រតិបត្តិជាច្រើនឆ្នាំមកហើយដែរ ដោយនៅថ្ងៃប្រកាសចេញផលិតផលទូរស័ព្ទ iPhone របស់ខ្លួនម្តងៗ គឺមិនបានបង្ហាញលម្អិតទាក់ទងនឹងទំហំនៃថ្មដែលបានប្រើនៅលើ iPhone នោះទេ តួរយ៉ាងដូចជាការបង្ហាញវត្តមានរបស់ iPhone 15 Series កាលពីរាត្រីទី 12 ឈានចូលថ្ងៃទី 13 ខែកញ្ញា ដូច្នោះដែរ គឺ Apple មិនបានបង្ហាញពីទំហំថ្មរបស់បងប្អូន iPhone 15 ទាំងបួនម៉ូដែលនោះទេ ប៉ុន្តែ នៅពេលនេះមានប្រភពមួយបានទម្លាយចេញពីទំហំថ្មរបស់ទូរស័ព្ទ iOS ជំនាន់ថ្មីទាំងបួនម៉ូដែលនេះ។

ប្រភពបានបង្ហាញទំហំថ្មរបស់ iPhone 15 ថាមានទំហំ 3,349mAh ដែលបង្កើនទំហំពី 3,279mAh ពីលើ iPhone 14, រីឯថ្មរបស់ម៉ូដែល iPhone 15 Plus គឺមានទំហំ 4,383mAh កើនពីទំហំ 4,325mAh ពីលើថ្មរបស់ iPhone 14 Plus។ ចំនែកថ្មរបស់ iPhone 15 Pro គឺមានទំហំ 3,274mAh កើនពីទំហំ 3,200mAh ពីលើថ្ម iPhone 14 Pro ខណៈ iPhone 15 Pro Max មានទំហំ 4,422mAh កើនពីទំហំ 4,323mAh ពីលើថ្ម iPhone 14 Pro Max។ ការបង្កើនទំហំថ្មដែលមានកម្រិតថាមពលតិចតួចក្រោម 100mAh នៅលើ iPhone 15 Series គឺផ្តល់ឲ្យការកាន់ប្រើប្រាស់បានប្រសើរជាមុនបន្តិច ប៉ុន្តែ ការប្រើប្រាស់បច្ចេកវិទ្យាអេក្រង់ថ្មី និងបន្ទះឈីបជំនាន់ថ្មី (A17 Pro 3nm នៅលើ iPhone 15 Pro/ Pro Max) ក៏ជួយសន្សំសំចៃការប្រើប្រាស់ថាមពលថ្មបានមួយចំនែកផងដែរ។

សូមបញ្ជាក់ឡើងវិញថា គ្រួសារ iPhone 15 Series ដែលមាន iPhone 15, iPhone 15 Plus, iPhone 15 Pro និង iPhone 15 Pro Max ត្រូវបាន Apple ធ្វើការដាក់សម្ភោធផ្លូវការណ៍កាលពីរាត្រីថ្ងៃអង្គារ ទី 12 កញ្ញា ថ្មីៗនេះ ហើយក្រុមហ៊ុនក៏បានបើកដាក់ឲ្យធ្វើការ Pre-Order ចាប់ពីថ្ងៃប្រកាសចេញផងដែរសម្រាប់បណ្តាលប្រទេសចំនួន 40 នៅជុំវិញពិភពលោក ហើយការនាំចេញអាចនឹងរៀបចំធ្វើឡើងនៅថ្ងែទី 22 សប្តាហ៍ក្រោយនេះ។

ហើយ Apple គ្រោងធ្វើការចេញលក់នៅបណ្តាលប្រទេសចំនួន 21 បន្ថែមទៀតនៅថ្ងៃទី 29 ចុងខែកញ្ញានេះ។ iPhone 15 មានតម្លៃចាប់ពី $799, iPhone 15 Plus មានតម្លៃចាប់ពី $899, iPhone 15 Pro មានតម្លៃចាប់ពី $999 និង iPhone 15 Pro Max មានតម្លៃចាប់ពី $1,199 ឡើងទៅ ហើយតម្លៃអាចនឹងប្រែប្រួលទៅតាមអត្រាប្តូរប្រាក់ និងពន្ធអាករក្នុងបណ្តាប្រទេសនិមួយៗ៕