Samsung Galaxy S24 Ultra ត្រូវគេរាយការណ៌ថា នឹងក្លាយជាស្មាតហ្វូនដែលប្រើប្រាស់ S Pen ដ៏ល្អបំផុត!

ប៉ុន្មានថ្ងៃនេះ មានរូបភាពជាច្រើនសន្លឹករបស់កំពូលស្មាតហ្វូន Samsung Galaxy S24 Ultra ត្រូវបានគេទម្លាយចេញនៅ នៅលើអ៊ីនធឺណិតហើយ នៅក្នុងនោះប្រភពខាងលើនេះ ក៏មានការទម្លាយថា ស្មាតហ្វូនលំដាប់ថ្នាក់ប្រណិត flagship នេះ នឹងបង្ហាញវត្តមាននៅក្នុងខែមករា ឆ្នាំ 2024 ខាងមុខនេះផងដែរ។ ស្មាតហ្វូនជំនាន់ថ្មីនេះ ត្រូវបានគេទម្លាយថា គឺស្មាតហ្វូនល្អបំផុត ដែលមិនធ្លាប់បានជួបនោះទេនៅក្នុងរយៈពេលប៉ុន្មានឆ្នាំនេះ។

បើមើលទៅលើស្មាតហ្វូនជំនាន់មុន Samsung Galaxy S23 Ultra ដែលបានបង្ហាញវត្តមាននាពេលកន្លងមក គឺមានការឌីស្សាញជាមួយនិងអេក្រង់រាបស្មើ ប៉ុន្តែសម្រាប់ស្មាតហ្វូនជំនាន់ថ្មី Samsung Galaxy S24 Ultra ដែលមានវត្តមានៅឆ្នាំក្រោយនេះ គឺនឹងបោះបង់នូវអេក្រង់គែមកោងហើយ។ ស្មាតហ្វូន Galaxy S24 Ultra នឹងក្លាយជាស្មាតហ្វូនដែលដំណើរការនៅលើ S Pen ដំបូងបំផុត នៅក្នុងត្រកូលស្មាតហ្វូន Flagship ដែលមានអេក្រង់រាបស្មើ និងផ្តល់នូវបទពិសោធន៍ល្អបំផុតជាមួយនឹង S Pen។

គួរបញ្ជាក់ផងដែរថា ស្មាតហ្វូន Galaxy S24 Ultra នឹងមានការពង្រឹងច្រើន ទៅលើបទពិសោធន៍នៃការប្រើប្រាស់ S Pen ឬការពង្រឹងទៅលើកម្រិត latency កាន់តែត្រឹមត្រូវ និងរឹតែប្រសើរជាងមុនថែមទៀតផង។ មកដល់ពេលនេះ នៅមិនទាន់មានព័ត៌មានច្រើននោះទេ ប៉ុន្តែយើងនឹងដឹងអំពីព័ត៌មានរបស់ស្មាតហ្វូន Galaxy S24 Ultra នៅក្នុងពេលដ៏ខ្លីខាងមុខទៀតជាក់ជាមិនខាន៕