ក្រុមហ៊ុន Xiaomi ត្រូវបានគេរំពឹងថា នឹងមានការប្រកាសចេញនូវស្មាតហ្វូនអេក្រង់បត់បានរបស់ខ្លួនចំនួន 2 ម៉ូដែលនៅឆ្នាំ 2024 ខាងមុខនេះ។ សម្រាប់ស្មាតហ្វូនអេក្រង់បត់ Mix Fold 4 អាចនឹងមានវត្តមាននៅត្រីមាសទី 2 ខណៈដែលត្រីមាស 1 ខាងមុខនេះ ក្រុមហ៊ុន Xiaomi ប្រហែលជានឹងមានការបង្ហាញវត្តមានរបស់ស្មាតហ្វូនអេក្រង់បត់ប្រភេទ flip-style foldable phone ដែលមានឈ្មោះថា Xiaomi Mix Flip។ ផ្អែកតាមការបែកធ្លាយថ្មីដែលបង្ហោះនៅលើបណ្តាញ Weibo បានបញ្ជាក់ពីការប្រើប្រាស់នូវបន្ទះឈីបរបស់ស្មាតហ្វូនថ្មីនេះហើយ។

យោងតាមអ្នកទម្លាយដែលមានប្រភពមកពីប្រទេសចិន បានបញ្ជាក់ថា ក្រុមហ៊ុន Xiaomi នឹងមានស្មាតហ្វូនលើសពី 1 ដែលកំពុងតែស្ថិតនៅក្នុងដំណើរការនៃការប្រើប្រាស់នូវបន្ទះឈីប Snapdragon 8 Gen 2។ ការបែកធ្លាយខាងលើនេះ ថែមទាំងបានបញ្ជាក់ថា Redmi K70 ហើយនិងថេប្លេតជំនាន់ថ្មី រួមជាមួយនិងស្មាតហ្វូនអេក្រង់បត់ដែលមានទំហំតូច គឺនឹងមានការបំពាក់នូវបន្ទះឈីបនេះផងដែរ។

សម្រាប់ថេប្លេតនេះ ត្រូវបានអ្នកទម្លាយរូបនេះ បញ្ជាក់ថា អាចជា Xiaomi Pad 7 Pro។ យោងតាមរបាយការណ៌ថ្មីៗនេះ បានបញ្ជាក់ថា Pad 7 Pro នេះ នឹងមានការប្រើប្រាស់អេក្រង់ល្បឿន 144Hz LCD display និងបន្ទះឈីប Snapdragon 8 Gen 2 រួមជាមួយនិងម៉ូឌុលកាមេរ៉ា 4 ជ្រុង ដូចគ្នាជាមួយនិងស្មាតហ្វូនជំនាន់ថ្មី Xiaomi 14 series។ និយាយពីស្មាតហ្វូនអេក្រង់បត់មានរូបរាងតូច ដែលដំណើរការជាមួយបន្ទះឈីប Snapdragon 8 Gen 2 នេះ ត្រូវបានអ្នកទម្លាយរូបនេះ អះអាងថា គឺជា Xiaomi Mix Flip។

សូមជំរាបថា មកដល់ពេលនេះ នៅមិនទាន់មានការទម្លាយព័ត៌មានថ្មីរបស់ស្មាតហ្វូនថ្មីនេះនៅឡើយទេ។ ប៉ុន្តែរបាយការណ៌កន្លងមក គឺមានការបង្ហាញនូវគំរូរូបភាព schematic suggests ដោយបានបង្ហាញថា ស្មាតហ្វូននេះ នឹងមានកាមេរ៉ា 3 គ្រាប់ដែលមានអមមកជាមួយមុខងារ 3x telephoto zoom ថែនទៀតផង។ ជាមួយគ្នានៅលើ IMEI ក៏មានការបង្ហាញចេញនូវលេខម៉ូដែលស្មាតហ្វូននេះដែរគឺ 2311BPN23C។

មានការសន្និដ្ឋានថា Xiaomi Mix Flip អាចនឹងបង្ហាញវត្តមានជាមួយនិង Xiaomi 14 Ultra នៅខែមេសា ឆ្នាំ 2024។ បន្ថែមពីនេះក៏មានការបញ្ជាក់ថា សម្រាប់វត្តមាន Mix Flip ដំបូងគេនេះ គឺប្រហែលជាលក់តែនៅក្នុងប្រទេសចិនតែប៉ុណ្ណោះ។ មកដល់ពេលនេះនៅលើទីផ្សារចិន មានស្មាតហ្វូនអេក្រង់បត់ជាច្រើនដូចជា Honor Magic Flip និង Vivo X Flip 2 ដែលរំពឹងថា នឹងបង្ហាញវត្តមានៅត្រីមាសទី 1 ឆ្នាំ 2024។