យោងតាមសេចក្តីរាយការណ៌ថ្មីៗនេះ បាននិយាយថា Galaxy Z Flip 7 និង Galaxy Z Fold 7 ដែលជាស្មាតហ្វូនអេក្រង់បត់បានជំនាន់ថ្មីរបស់ក្រុមហ៊ុន Samsung គឺនឹងមានការពង្រឹងទៅលើមុខងារជាច្រើន នៅក្នុងនោះមានដូចជា ការឌីស្សាញជាថ្មីឡើងវិញទៅលើគន្លឹះបត់ថ្មី ការប្រើប្រាស់ថាមពលថ្មធំជាងមុន ហើយនិងកាមេរ៉ាទំហំដល់ទៅ 200MP។
នៅថ្ងៃនេះ នៅលើវិញ្ញាបនបត្រ 3C របស់ប្រទេសចិន បានទម្លាយចេញនូវល្បឿនសាកថ្មរបស់ស្មាតហ្វូនថ្មីនេះថែមទៀតហើយ។ នៅក្នុងពេលប៉ុន្មានឆ្នាំនេះ បើទោះបីជាក្រុមហ៊ុនមានការពង្រឹងជាច្រើនទៅលើថាមពលថ្មក៏ដោយ គេនៅមិនទាន់ឃើញថា ក្រុមហ៊ុននេះ មានការពង្រឹងទៅលើល្បឿនសាកល្បឿនលឿននៅលើស្មាតហ្វូនថ្មីៗរបស់ខ្លួនឡើយទេ។
គួរបញ្ជាក់ថា ស្មាតហ្វូនអេក្រង់បត់ Galaxy Z Fold 2 (ចាប់ពីឆ្នាំ 2020) និង Z Flip 4 (ចាប់ពីឆ្នាំ 2022) គឺជាស្មាតហ្វូន Galaxy បត់បានមុនគេ ដែលប្រើប្រាស់នូវបច្ចេកវិទ្យាសាកថ្មលឿន 25W wired charging។ នៅក្នុងការទម្លាយនៅលើ 3C របស់ចិននៅពេលនេះ បានទម្លាយនូវលល្បឿនសាកថ្មសម្រាប់ស្មាតហ្វូនអេក្រង់បត់បានថ្មីចំនួន 2 របស់ក្រុមហ៊ុន Samsung ដែលមានលេខកូដ SM-F7660 និង SM-F9660 ហើយក៏មានភ្ជាប់ជាមួយនឹងឆ្នាំងសាក EP-TA800 charger ផងដែរ។ ស្មាតហ្វូនថ្មីនេះ មានល្បឿននៃការសាកត្រឹមតែ 25W (9V/2.77A) ប៉ុណ្ណោះ។
ស្មាតហ្វូនអេក្រង់បត់ថ្មីទាំង 2 នេះ ត្រូវគេជឿជាក់ថា គឺជាស្មាតហ្វូនអេក្រង់បត់បាន Galaxy Z Flip 7 និង Galaxy Z Fold 7 ។ ស្មាតហ្វូនជំនាន់ថ្មី Galaxy Z Flip 7 នឹងមានថាមពលថ្មទំហំ 4,300mAh (ការបង្កើនពីទំហំ 4,000mAh) ខណៈពេលដែលស្មាតហ្វូន Galaxy Z Fold 7 អាចនឹងមានថាមពលថ្មទំហំ 4,400mAh ។ ស្មាតហ្វូន Z Flip 7 នឹងមានអេក្រង់បត់ខាងក្នុងទំហំ 6.85-អ៊ីង និងអេក្រង់ខាងក្រៅទំហំ 4-អ៊ីង ហើយស្មាតហ្វូន Galaxy Z Fold 7 មានអេក្រង់ទំហំ 8.2-អ៊ីង និងអេក្រង់ខាងក្រៅទំហំ 6.5-អ៊ីង៕
