ក្រុមហ៊ុន Huawei ត្រូវបានគេមើលឃើញថា បានធ្វើអោយមានការភ្ញាក់ផ្អើលទៅលើទីផ្សារស្មាតហ្វូនប្រទេសចិនម្តងទៀតសម្រាប់ត្រីមាសទី 1 ឆ្នាំ 2025 នេះ ខណៈពេលដែលក្រុមហ៊ុន Apple នាពេលនេះថ្មី បានធ្លាក់ចូលទៅកាន់ចំណាត់ថ្នាក់ទាបជាងគេវិញ។ មកដល់ពេលនេះ បើទោះបីជាមានសម្ពាធពីសហរដ្ឋអាមេរិកក៏ដោយ ក៏ក្រុមហ៊ុន Huawei នៅតែបង្ហាញពីភាពខ្លាំងដដែល ដោយថ្មីៗនេះ វត្តមានរបស់ស្មាតហ្វូន Pura X បានធ្វើអោយទីផ្សារស្មាតហ្វូនរបស់ក្រុមហ៊ុន Huawei មានការងើបឡើងវិញមិនធម្មតានោះទេ។
តាមការបញ្ជាក់ពី TechInsights នៅថ្ងៃនេះ បានចែករំលែកនូវរបាយការណ៍មួយសម្រាប់ទីផ្សារស្មាតហ្វូននៅក្នុងត្រីមាសទី 1ឆ្នាំ 2025 នេះ នៅក្នុងប្រទេសចិន ជាមួយនឹងកាបង្ហាញពីក្រុមហ៊ុនកំពូលទាំង 5 ដែលក្នុងនោះមានក្រុមហ៊ុន Huawei និងApple ផងដែរ។ ក្រុមហ៊ុនទាំងពីរនេះ បានធ្វើបានល្អនៅលើទីផ្សារខុសត្រង់ថាមួយនៅចំណាត់ថ្នាក់ខ្ពស់បំផុត និងមួយទៀតនៅចំណាត់ថ្នាក់ទាបបំផុត។ នៅក្នុងរបាយការណ៍នេះ បានបន្ថែមថា ក្រុមហ៊ុន Huawei បានលក់ស្មាតហ្វូនបានចំនួន 13.7 លានគ្រឿងសម្រាប់ត្រីមាសទី 1 ឆ្នាំនេះ។ ក្រុមហ៊ុននេះ កាន់កាប់បាន 20% នៃចំណែកទីផ្សារ។ បើមើលទៅលើកំណើននោះ ក្រុមហ៊ុននេះមានការកើនឡើង 30.9% ធៀបទៅនឹងឆ្នាំមុននេះ។
ក្រុមហ៊ុន Xiaomi ត្រូវបានជាប់ចំណាត់ថ្នាក់លេខ 2 នៅលើទីផ្សារដែលមានការនាំចេញស្មាតហ្វូនចំនួន 13.3 លានគ្រឿង និងចំណែកទីផ្សារចំនួន 19.4% ។ ក្រុមហ៊ុន OPPO ជាប់ចំណាត់ថ្នាក់លេខ 3 ដែលមានការនាំចេញស្មាតហ្វូនចំនួន 10.7 លានគ្រឿង និងចំណែកទីផ្សារចំនួន 15.6% ។ ក្រុមហ៊ុន vivo ជាប់ចំណាត់ថ្នាក់លេខ 4 ។
សម្រាប់ក្រុមហ៊ុន Apple ដែលជាគូរប្រជែងខ្លាំងជាងគេនោះ គឺបានធ្លាក់ទៅកាន់ចំណាត់ថ្នាក់លេខ 5 ដែលខុសប្លែកពីត្រីមាសទី 4 ឆ្នាំ 2024 ដែលក្រុមហ៊ុននេះជាប់ចំណាត់ថ្នាក់លេខ 2 ។ ក្រុមហ៊ុន Apple លក់ស្មាតហ្វូនបានចំនួន 8.7 លានគ្រឿងនៅក្នុងទីផ្សាររបស់ចិន និងមានកំណើន 12.6% ធៀបទៅនឹងឆ្នាំមុននេះ។ បើមើលទៅលើទីផ្សារសរុបនោះ ការនាំចេញស្មាតហ្វូនរបស់ចិនគឺមានការកើនឡើងចំនួន 9% ធៀបទៅនឹងឆ្នាំមុនេះដែលមានចំនួនដល់ទៅ 68.7 លានគ្រឿង៕
