ថ្មីៗនេះ ក្រុមហ៊ុន Honor បានបញ្ជាក់ថា ស្មាតហ្វូនស៊េរីថ្មី Honor 400 Series នឹងបង្ហាញខ្លួនជាផ្លូវការនៅក្នុងព្រឹត្តិការណ៍មួយនៅថ្ងៃទី 22 ខែឧសភា ឆ្នាំ 2025 នេះ។ ស្មាតហ្វូនជំនាន់ថ្មីនេះ មាន 2 ម៉ូដែលគឺ Honor 400 និង Honor 400 Pro។ នៅមុនការប្រកាសជាផ្លូវការនេះ ក្រុមហ៊ុននេះ ក៏បានទម្លាយនូវវីដេអូពាណិជ្ជកម្មថ្មីដែលមានការបញ្ជាក់អំពីលក្ខណៈសម្បត្តិរបស់ស្មាតហ្វូន Honor 400 Pro នេះ ផងដែរ។
នៅក្នុងវីដេអូផ្សព្វផ្សាយនេះ បានបង្ហាញថា ស្មាតហ្វូន Honor 400 Series នេះ គឺមានកាមេរ៉ាទំហំ 200MP AI ដែលនេះ គឺជាការ Upgrade ដ៏ធំពីកាមេរ៉ាទំហំ 50MP ធៀបទៅនឹងស្មាតហ្វូនជំនាន់មុននេះ។ អ្នកទម្លាយនេះ ក៏បានទម្លាយអំពីការឌីស្សាញផ្នែកខាងក្រោយរបស់ស្មាតហ្វូនទាំងពីរនេះ ថែមទៀតដែលមានការទម្លាយអំពីកាមេរ៉ា 2 គ្រាប់នៅលើស្មាតហ្វូន Honor 400 និងកាមេរ៉ា 3 គ្រាប់នៅលើស្មាតហ្វូន Honor 400 Pro។
លក្ខណៈសម្បត្តិជាច្រើនទៀតរបស់ស្មាតហ្វូននេះនៅមិនទាន់ទម្លាយនៅឡើយទេ ប៉ុន្តែការបែកធ្លាយជាច្រើនទម្លាយថា ស្មាតហ្វូន Honor 400 នេះ គឺមានអេក្រង់ទំហំ 6.55-អ៊ីង កម្រិត 1.5K AMOLED display ជាមួយនឹងកម្រិតភាពច្បាស់ 120Hz refresh rate និងពន្លឺ 5,000nits។ ស្មាតហ្វូននេះ ដំណើរការនូវបន្ទះឈីប Snapdragon 7 Gen 3 ជាមួយនឹងរ៉េមទំហំ 8GB និងម៉េមូរីទំហំ 512GB និង 256GB។ កាមេរ៉ារបស់ស្មាតហ្វូននេះមានទំហំ 200MP និងកាមេរ៉ាទី 2 មានទំហំ 12MP Ultrawide Lens និងកាមេរ៉ាខាងមុខទំហំ 50MP។ ស្មាតហ្វូននេះ មានថាមពលថ្មទំហំ 5,300mAh ជាមួយនឹងបច្ចេកវិទ្យាសាកកម្លាំង 66W fast charging ជាមួយនឹងតម្លៃ €499។
សម្រាប់ស្មាតហ្វូន Honor 400 Pro មានអេក្រង់ទំហំ 6.7-អ៊ីង កម្រិត 1.5K និងជាកញ្ចក់ AMOLED និងបន្ទះឈីប Snapdragon 8 Gen 3។ ស្មាតហ្វូននេះ មានរ៉េមទំហំ 12GB និងអង្គចងចាំទំហំ 512GB។ កាមេរ៉ាខាងក្រោយរបស់ស្មាតហ្វូននេះ គឺមានទំហំ 200MP គាំទ្រជាមួយនឹងមុខងារ OIS និងមួយគ្រាប់ទៀតទំហំ 50MP telephoto lens ខណៈដែលគ្រាប់ទីបីមានទំហំ 12MP ultrawide។ ស្មាតហ្វូននេះ ក៏នឹងមានកាមេរ៉ាខាងមុខទំហំ 50MP selfie ផងដែរ។ សម្រាប់ប្រព័ន្ធសុវត្ថិភាពវិញ នៅលើស្មាតហ្វូន មានបច្ចេកវិទ្យាការពារទឹក និងធូលី IP68/IP69 និងមានថាមពលថ្មទំហំ 5,300mAh នឹងមានទ្រទ្រង់ទៅលើបច្ចេកវិទ្យាសាកកម្លាំង 100W fast charging ផងដែរ។ ស្មាតហ្វូនម៉ូដែល Pro នេះ នឹងមានតម្លៃប្រហែលជា €799 ៕
