ក្រុមហ៊ុន Samsung បានបញ្ចេញគំរូស្មាតហ្វូនអេក្រង់បត់បីបត់ដំបូងរបស់ខ្លួនជាផ្លូវការណ៍ ហើយប្រភពព័ត៌មានចចាមអារាមនៅតែមានការបែកធ្លាយជាបន្តបន្ទាប់ពីស្មាតហ្វូនទំនើបរបស់ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ។ ហើយថ្មីៗនេះ បើតាមប្រភពព័ត៌មានផ្សព្វផ្សាយចេញពីប្រទេសកូរ៉េខាងត្បូងផ្ទាល់ បាននិយាយថា Samsung Galaxy Tri-Fold នឹងមានការឌីស្សាញជាមួយកម្រាស់ស្តើងស្លីម និងប្រើបច្ចេកវិទ្យាថ្មថ្មីដើម្បីជួយកាត់បន្ថយកម្រាស់តួររបស់ទូរស័ព្ទ។
Galaxy Tri-Fold ត្រូវបានគេរំពឹងថា នឹងបង្ហាញវត្តមានផ្លូវការណ៍នៅឆមាសទីពីរនៃឆ្នាំ 2025 នេះ។ សម្រាប់គំរូស្មាតហ្វូនអេក្រង់បត់បីតង់ដំបូងមួយនេះត្រូវបាន Samsung ធ្វើការបង្ហាញចេញនៅក្នុងព្រឹត្តិការណ៍ Galaxy Unpacked កាលពីខែមករា ដើមឆ្នាំនេះ ជាមួយនឹងវែនតាឆ្លាតវៃ Galaxy AR Headset និង AR Glasses។
បើតាមប្រភពព័ត៌មានបានរាយការណ៍ថា Galaxy Tri-Fold គឺជាទូរស័ព្ទដំបូងគេដែលប្រើបច្ចេកវិទ្យាថ្មប្រភេទ silicon-carbo។ ដែលបច្ចេកវិទ្យាថ្មថ្មីនេះ ត្រូវបានគេរំពឹងថា អាចនឹងប្រើនៅលើកំពូលស្មាតហ្វូន Galaxy S26 Series ដែលចេញនៅដើមឆ្នាំក្រោយនេះផងដែរ។ ហើយសម្រាប់ថ្មដែលប្រើនៅលើ Galaxy Tri-Fold អាចនឹងមានទំហំ 5,500mAh ដូចនឹងទំហំថ្មរបស់ Galaxy S26 Ultra ដែរ។
បច្ចេកវិទ្យាកញ្ចប់ថ្មថ្មី Silicon-carbon នេះ នឹងជួយកាត់បន្ថយកម្រាស់តួរខ្លួនរបស់ស្មាតហ្វូនឲ្យមានកាន់តែកម្រាស់ស្តើង។ បច្ចុប្បន្ននេះក្រុមហ៊ុនផលិតស្មាតហ្វូនប្រទេសចិនដូចជា Vivo និង Xiaomi បានប្រើប្រាស់នូវថ្មទំហំធំពី 6,500mAh ទៅ 7,000mAh សម្រាប់ការផលិតស្មាតហ្វូនរបស់ពួកគេ។ ទន្ទឹងនឹងនេះ Samsung ក៏ត្រូវបានគេរំពឹងថា នឹងកាត់បន្ថយកម្រាស់របស់ស្មាតហ្វូនអេក្រង់បត់ជំនាន់ថ្មីរបស់ខ្លួន គឺ Galaxy Z Fold 7 ដែលនឹងមកដល់នៅចុងខែកក្តដា ឆ្នាំនេះ។
ចំពោះការបង្ហាញវត្តមានផ្លូវការណ៍របស់ Galaxy Tri-Fold ត្រូវបានគេរំពឹងថា អាចនឹងធ្វើឡើងនៅចុងខែកក្តដា ដំណាលគ្នាជាមួយនឹងបង្ហាញស្មាតហ្វូនអេក្រង់បត់ Galaxy Z Fold 7 និង Z Flip 7។ បច្ចុប្បន្នស្មាតហ្វូនទំនើបអេក្រង់បត់បីតង់ដំបូងគេក្នុងលោក គឺជា Huawei Mate XT ហើយក៏បាននឹងកំពុងតាំងខ្លាំងជាងអធិរាជស្មាតហ្វូននៅលើទីផ្សារបច្ចុប្បន្ន ចំនែកការបង្ហាញវត្តមានរបស់ Galaxy Tri-Fold របស់ Samsung គឺនឹងកាត់បន្ថយឥទ្ធិពលរបស់ Mate XT ទាំងការឌីស្សាញ អនុភាពប្រើការ និងបច្ចេកវិទ្យាទំនើបចុងក្រោយបង្អស់៕
