Galaxy Z Fold 7 គឺជាស្មាតហ្វូនអេក្រង់បត់បានថ្មីរបស់ក្រុមហ៊ុន Samsung ដែលមិនត្រឹមតែមានការបង្កើនសមត្ថភាពទៅលើផ្នែក Hardware នោះទេ នៅលើស្មាតហ្វូនថ្មីនេះ គឺថែមទាំងមានការផ្តោតខ្លាំងទៅលើការឌីស្សាញរូបរាងថ្មីផងដែរ។ ការឌីស្សាញរូបរាងដ៏ស្តើង និងការប្រើប្រាស់នូវ Hinge បានក្លាយជាចំណុចទាក់ទាញបំផុតរបស់ស្មាតហ្វូនអេក្រង់បត់បានថ្មីនេះ ហើយបើមើលទៅលើកម្លាំងម៉ាស៊ីនវិញ គឺមានភាពខ្លាំងជាងមុនដូចគ្នា ដែលនេះក៏ជាចំណុចសំខាន់ផងដែរ។ នៅពេលនេះ ស្មាតហ្វូន Galaxy Z Fold 7 ដែលបន្ទះឈីប Snapdragon 8 Elite នេះ ត្រូវបានគេតេស្ត នៅលើ AnTuTu ហើយ។
យោងតាមលទ្ធផលនៅលើ AnTuTu បង្ហាញថា ស្មាតហ្វូនអេក្រង់បត់បាន Galaxy Z Fold 7 នេះមានការបង្កើនទៅលើសមត្ថភាពជាខ្លាំងជាមួយនឹងពិន្ទុសរុបដល់ទៅ 2,025,744។ ស្មាតហ្វូននេះ មានពិន្ទុចំនួន 472,258 នៅលើ CPU និង 778,749 នៅក្នុង GPU។ តាមរយៈពិន្ទុនេះបង្ហាញថា ស្មាតហ្វូនអេក្រង់បត់បានថ្មីនេះ គឺមានភាពខ្លាំងក្លាទៅលើផ្នែក multitasking និងក្រាហ្វិកកាត។ សម្រាប់ពិន្ទុនៅលើ Memory និង UX គឺមានពិន្ទុរាងគ្នាគឺ 438,501 និង 336,236។
Galaxy Z Fold 7 នេះត្រូវបានគេបញ្ជាក់ថា អាចប្រជែងនៅលើទីផ្សារបានជាមួយនឹងស្មាតហ្វូនអេក្រង់បត់បាន OPPO Find N5 ដែលមានពិន្ទុ 2,128,857 និង vivo X Fold 5 មានពិន្ទុ 2,072,961។ បើមើលទៅលើស្មាតហ្វូនអេក្រង់បត់បាន Motorola Razr 60 Ultra ដែលដំណើរការនូវបន្ទះឈីប Snapdragon 8 Elite ដូចគ្នានេះដែរ គឺមានពិន្ទុត្រឹមតែ 1,841,572 ប៉ុណ្ណោះ។ ចំនែកស្មាតហ្វូនបត់បានជំនាន់មុនៗដូចជា OnePlus Open វិញ គឺមានពិន្ទុ 1,548,782 ខណៈដែល Google Pixel 9 Pro Fold មានពិន្ទុ 1,219,241 គឺស្ថិតនៅក្នុងកម្រិតមួយនៅទាបនៅឡើយ។
ក្រឡេកទៅមើលនៅលើ Geekbench វិញ ស្មាតហ្វូនអេក្រង់បត់បានថ្មី Galaxy Z Fold 7 នេះមានពិន្ទុ 2,910 នៅក្នុងការតេស្ត single-core និងពិន្ទុ 9,174 នៅក្នុងការតេស្ត multi-core ដែលមានការបង្ហាញនូវកម្លាំង CPU ដ៏ខ្លាំងក្លាជាពិសេសនៅលើការងារ multi-thread tasks ដូចជា video editing, gaming និង multitasking។ បើធ្វើការប្រៀបជាមួយនឹងគូរប្រជែងរបស់វាដូចជា OPPO Find N5 ទទួលបានពិន្ទុ 2,897/8,152) និង Motorola Razr 60 Ultra ទទួលបានពិន្ទុ 1,749/6,792 ខណៈដែល Pixel 9 Pro Fold ទទួលបានពិន្ទុ 1,983/4,791។ និយាយរួមស្មាតហ្វូន Z Fold 7 នេះ គឺមានកម្លាំងម៉ាស៊ីនកាន់តែខ្លាំងក្លាជាមុនជាមួយនឹងបន្ទះឈីប Snapdragon 8 Elite។
