កំពូលឡាន Pick up របស់អាមេរិក Ford F-150 Lightning ជំនាន់ថ្មីម៉ូដែល EREV ឬ Extended Range Electric Vehicle ត្រូវបានបញ្ជាក់ជាផ្លូវការណ៍ថា នឹងមានវត្តមាននៅក្នុងទីផ្សារប្រទេសអូស្ត្រាលីផងដែរ។ ដូចគ្នានឹង F-150 Lightning EV ដែលជាជំនាន់ដំបូងដែរ ដោយ F-150 Lightning ជំនាន់ថ្មីប្រភេទ EREV គឺមិនស្ថិតក្នុងគម្រោងក្នុងការផលិតរបស់ Ford សម្រាប់ទីផ្សារអូស្ត្រាលីនោះទេ ប៉ុន្តែ ជារថយន្តដែលត្រូវបាននាំចូល ដែលធ្វើការកែតម្រូវថ្មីទៅជាប្រភេទចង្កូតស្តាំ និងចែកចាយដោយក្រុមហ៊ុន AusEV។
F-150 Lightning EREV ថ្មីនេះ នឹងត្រូវបានក្រុមហ៊ុនធ្វើការកែកុងថ្មីពីម៉ូដែល F-150 Lightning EV ដែលដំណើរដោយប្រើថាមពលអគ្គិសនីសុទ្ធ ដោយត្រូវប្រើប្រាស់ប្រព័ន្ធម៉ូទ័រអគ្គិសនីមួយ បំពាក់កញ្ចប់ថ្មតូចជាង និងបំពាក់បន្ថែមនូវម៉ាស៊ីនដែលដើរតួរជាម៉ាស៊ីនសាកភ្លើងសម្រាប់មុខងារ Range-extender។ បើតាមការបញ្ជាក់ពីក្រុមហ៊ុន Ford កន្លងមកបានឲ្យដឹងថា F-150 Lightning EREV ថ្មី គឺមានលទ្ធភាបអាចបើកបរបានចម្ងាយសរុបដល់ 1,125km នៅពេលសាកភ្លើង និងចាក់សាំងពេញម្តង។ ក្រុមហ៊ុន AusEV ដែលជាអ្នកចាយចាយ F-150 Lightning EV បច្ចុប្បន្ន បានបញ្ជាក់ផ្លូវការណ៍ថា ក្រុមហ៊ុនខ្លួននឹងនៅបន្តធ្វើការចែកចាយ F-150 Light EREV ជំនាន់ថ្មីសម្រាប់ទីផ្សារអូស្ត្រាលីដដែល។
AusEV គឺក្រុមហ៊ុនបានបង្កើតឡើងដោយផ្តោតលើប្រតិបត្តិការដោយផ្តោតលើការរុករករ៉ែ និងឧស្សាហកម្មធុនធ្ងន់ ជាមួយនឹងបណ្តាញទីតាំងគាំទ្រការលក់ចំនួន 19 នៅទូទាំងរដ្ឋ Queensland, New South Wales, Northern Territory និង Western Australia ព្រមទាំងមានសេវាកម្មតាមរយៈមជ្ឈមណ្ឌលសេវាកម្ម mycar ថែមទៀតផង។ កំពូលរថយន្ត Pick up របស់ Ford មួយនេះត្រូវបានគេរំពឹងថា នឹងចូលទីផ្សារផ្លូវការណ៍នៅអំឡុងឆ្នាំ 2027។ ទន្ទឹងនឹងការត្រៀមចេញម៉ូដែល EREV ជំនាន់ថ្មីនេះ ក្រុមហ៊ុន Ford USA ត្រូវបានគេរាយការណ៍បានបញ្ចប់ការផលិតម៉ូដែល F-150 Lightning EV កាលពីចុងឆ្នាំ 2025។
Ford F-150 Lightning EREV ជំនាន់ថ្មីត្រូវបានគេដឹងថា នឹងបន្តការប្រើប្រាស់មុខងារសំខាន់ៗមួយចំនួនដែលមាននៅលើម៉ូដែល F-150 Lightning EV ក្នុងនោះមានដូចជាមុខងារ សាកភ្លើងបន្តសម្រាប់ប្រើឧបករណ៍អេឡិចត្រូនិចផ្សេងៗ (V2L) ជាដើម។កត្តាដែលជម្រុញការសម្រេចចិត្តរបស់ Ford ក្នុងការផ្លាស់ប្តូរពីម៉ូដែល F-150 ដែលប្រើប្រាស់ថាមពលអគ្គិសនីទាំងស្រុងទៅជាម៉ូដែល Hybrid បានកើតឡើងបន្ទាប់ពីតម្រូវការរថយន្តអគ្គិសនីមានការថយចុះនៅក្នុងទីផ្សាររបស់រថយន្ត F-150 Lightning EV នៅសហរដ្ឋអាមេរិក។ ទន្ទឹមនឹងនេះគូប្រជែងរបស់ Ford គឺ RAM ក៏បានធ្វើការផ្លាស់ប្តូរពី Ram 1500 EV ដែលប្រើប្រាស់ថាមពលអគ្គិសនីទាំងស្រុង ទៅជាម៉ូដែល Ram 1500 EREV ផងដែរ៕
