យោងតាមការបញ្ជាក់នៅក្នុងព័ត៌មានកន្លងមក បាននិយាយថា Samsung បានត្រៀមខ្លួនប្រកាសចេញនូវថេប្លេតជំនាន់ថ្មីលំដាប់ថ្នាក់ប្រណិតរបស់ខ្លួនជាមួយនិងស្មាតហ្វូនម៉ូដែលពិសេស Galaxy S24 FE នៅខែក្រោយនេះហើយ។ នៅមុនការសម្ពោធជាផ្លូវការណ៌ចូលមកដល់ នៅពេលនេ រូបភាពថ្មីរបស់ Galaxy Tab S10 Ultra ត្រូវបានគេទម្លាយចេញជាលើកដំបូងជាមួយនិងគុណភាពខ្ពស់ ហើយនិងមានការឌីស្សាញស៊ីវីល័យជាងជំនាន់មុនថែមទៀតផង។
រូបភាពច្បាស់របស់ថេប្លេត Galaxy Tab S10 Ultra ដែលគេទម្លាយចេញនៅពេលនេះ គឺត្រូវបានចែកចាយដោយអ្នកទម្លាយ Evan Blass (@evleaks)។ រូបភាពថេប្លេតថ្មីនេះ មើលទៅគឺមិនខុសពី Galaxy Tab S9 Ultra នោះទេ។ ថេប្លេតនេះ មានពណ៌ប្រផេះ grey avatar និងមានអេក្រង់ទំហំ 14.6-អ៊ីង ហើយនិងមានការបំពាក់នូវកាមេរ៉ាមុខភ្លោះដូចជំនាន់មុនដដែល។
Galaxy Tab S10 Ultra ត្រូវបានគេរំពឹងថា នឹងមានការបំពាក់នូវបន្ទះឈីប MediaTek Dimensity 9300+ និងជាថេប្លេតដំបូងគេរបស់ក្រុមហ៊ុនកូរ៉េខាងត្បូងមួយនេះដែលបំពាក់នូវបន្ទះឈីប MediaTek នេះផងដែរ។
សម្រាប់ Software វិញ ថេប្លេតនេះ អាចនឹងដំណើរការនៅលើ Android 14 ផ្អែកជាមួយ One UI 6.1.1 ចេញពីប្រអប់ ហើយនិងមានការអាប់ដែត Software ដល់ទៅ 4 ឆ្នាំថែមទៀតផង។ ថេប្លេតនេះមានប្រើប្រាស់នូវកម្លាំងសាក 45W fast charging ដូចជំនាន់មុនដែរ។ មានការព្យាករណ៌ថា ឆ្នាំនេះ នឹងមិនមានវត្តមាន Galaxy Tab S10 នោះទេ គឺមានតែ Galaxy Tab S10+ និង Galaxy Tab S10 Ultra ប៉ុណ្ណោះ។
