គិតចាប់តាំងពីក្រុមហ៊ុន Apple បានប្រកាសថា នឹងនាំយកនូវបច្ចេកវិទ្យា AI មកប្រើប្រាស់នៅលើ iPhone 16 Series មក បានធ្វើអោយគូរប្រជែងជាច្រើនរបស់ខ្លូន ជាពិសេស ក្រុមហ៊ុន Samsung គឺនៅមិនសុខនោះទេ ដោយសារតែក្រុមហ៊ុនទាំងពីរនេះ គឺជាគូរប្រជែងគ្នាស្វិតស្វាញជាទីបំផុត ទៅលើការនាំចេញស្មាតហ្វូនថ្នាក់ប្រណិតទៅកាន់ទីផ្សារសកល។ ដូច្នេះសម្រាប់វត្តមានរបស់ស្មាតហ្វូនជំនាន់ថ្មី Galaxy S25 Series នៅឆ្នាំក្រោយនេះ ក្រុមហ៊ុនបច្ចេកវិទ្យាយក្សកូរ៉េខាងត្បួងមួយនេះ ត្រូវតែធ្វើយ៉ាងណាអោយស្មាតហ្វូនថ្មីនេះ ក្លាយជាស្មាតហ្វូនដែលមានប្រសើរជាងគេបំផុតទៅលើ AI performance។

យោងតាមរបាយការណ៌ដែលចេញផ្សាយនាពេលថ្មីៗនេះ បាននិយាយថា ក្រុមហ៊ុនបច្ចេកវិទ្យាយក្សកូរ៉េខាងត្បួងមួយនេះ គឺនឹងមានការប្រើប្រាស់នូវបន្ទះឈីប Snapdragon តែមួយប៉ុណ្ណោះនៅលើ Galaxy S25 series។ នៅថ្ងៃនេះ មានចែកចាយនូវព័ត៌មានថ្មីមួយពី Hankyung ដោយបាននិយាយថា សម្រាប់ស្មាតហ្វូនជំនាន់ថ្មី Galaxy S25, Galaxy S25+ និង Galaxy S25 Ultra ដែលដាក់លក់នៅលើទីផ្សារសកល គឺនឹងមានការប្រើប្រាស់នូវបន្ទះឈីប Snapdragon 8 Gen 4 ទាំងអស់។

សូមជំរាបថា ការប្រើប្រាស់បន្ទះឈីបខ្លាំង ត្រូវបានគេចាត់ទុកថា គឺជាចំណុចពិសេសបំផុតរបស់ក្រុមហ៊ុន Samsung ពីព្រោះថា  ក្រុមហ៊ុនបច្ចេកវិទ្យាយក្សកូរ៉េខាងត្បួងមួយនេះ ចង់ផ្តល់អោយអ្នកប្រើប្រាស់ស្មាតហ្វូនលំដាប់ថ្នាក់ Flagship របស់ Galaxy ជំនាន់ថ្មីៗ ទទួលបាននូវភាពពេញចិត្តពេញថ្លើមទៅលើសមត្ថភាពនៃការប្រើប្រាស់ ជាពិសេស គឺកម្លាំងម៉ាស៊ីនតែម្តង។ សម្រាប់បន្ទះឈីប Snapdragon 8 Gen 4 ដែលក្រុមហ៊ុន Qualcomm គ្រោងនឹងធ្វើការប្រកាសចេញនាពេលដ៏ខ្លីខាងមុខនេះ ត្រូវបានគេនិយាយថា គឺនឹងមានសមត្ថភាពខ្ពស់ជាងមុនដល់ទៅ 30% ហើយនិងមានការពង្រឹងទៅលើបច្ចេកវិទ្យា AI ហើយនិង GPU performance ថែមទៀតផង។

សម្រាប់សមត្ថភាព Snapdragon 8 Gen 4 នេះ ត្រូវបានគេបញ្ជាក់ថា គឺអាចប្រជែងបាន A18។ សូមជំរាបថា ពេលនេះ ក្រុមហ៊ុនចិន Huawei និង Xiaomi ក៏មិនណយដែរ ដោយពេលនេះ ក្រុមហ៊ុនធំៗទាំងពីរ បានចាប់ផ្តើមធ្វើការងារទៅលើ បច្ចេកវិទ្យា AI គឺមានពង្រឹងកាន់តែខ្លាំងទៅលើបន្ទះឈីបដូចគ្នា។