ក្រុមហ៊ុនផលិតគ្រឿងអេឡិចត្រូនិចរបស់ប្រទេសជប៉ុន Sharp ទើបតែបានធ្វើការប្រកាសចេញស្មាតហ្វូនស៊េរីថ្មីរបស់ខ្លួនដែលម៉ូដែលនូវសែនស័រកាមេរ៉ាគោលធំដល់ 1-inch រួមជាមួយសែនស័រកាមេរ៉ា Telephoto ធំទំហំ 1/1.56” ខ្នាត 65mm។ ស្មាតហ្វូនស៊េរីថ្មីនេះ គឺជាម៉ូដែល Aquos R9 Pro ដែលជាម៉ូដែលបន្តពី Aquos R9 ដែលបានប្រកាសចេញកាលពីអំឡុងខែឧសភា ឆ្នាំ 2024។
ស្មាតហ្វូនជំនាន់ថ្មី Sharp Aquos R9 Pro នឹងត្រូវចេញលក់លើកដំបូងនៅទីផ្សារប្រទេសជប៉ុនក្នុងខែធ្នូ ឆ្នាំ 2024 ហើយបន្ទាប់មកនឹងពង្រីកទីផ្សារទៅកាន់ប្រទេសឥណ្ឌូនេស៊ី សិង្ហបុរី និងតៃវ៉ាន់។ Sharp Aquos R9 Pro ដំឡើងមកជាមួយកញ្ចប់សែនស័រកាមេរ៉ាក្រោយទំហំ 50.3MP ចំនួន 3 គ្រាប់ ដែលជាប្រព័ន្ធបច្ចេកវិទ្យាកាមេរ៉ា Vario-Summicron camera system ដែលអភិវឌ្ឍន៍ផលិតដោយក្រុមហ៊ុន Leica។
ប្រព័ន្ធសែនស័រកាមេរ៉ាក្រោយរបស់ Aquos R9 Pro រួមមាន 65mm telephoto lens មាន aperture f/2.6 ប្រើប្រាស់សែនស័រទំហំ 1/1.56” ជាមួយមុខងារ Dolby Vision និង Optical Image Stabilization (OIS) សម្រាប់ការថតវីដេអូ។ លែននេះ មានសមត្ថភាពអាចពង្រីប្លង់ថត optical magnification បាន 2.8x និងdigital-zoom បាន 20x។
សម្រាប់សែនស័រគោលទំហំ 50.3-inch វិញប្រើប្រាស់សែនស័រខ្នាតធំបំផុតដល់ 1/0.98-inch ដែលធំជាងសែនស័រ 1-inch ដែលប្រើនៅលើកំពូលស្មាតហ្វូន Android មួយចំនួនក្នុងពេលបច្ចុប្បន្ន។ លែនរបស់កាមេរ៉ាគោលមានទំហំ 23mm (86°) ភ្ជាប់ដោយ aperture f/1.8 គាំទ្រមុខងារ OIS។ សម្រាប់លែនកាមេរ៉ាចុងក្រោយជា Ultrawide ខ្នាត 13mm មាន Aperturef/2.2 ហើយលែននេះ ក៏គាំទ្រមុខងារថតរូប Macro ផងដែរ។
បន្ថែមពីនេះនៅស៊ុមខាងស្តាំរបស់ Sharp Aquos R9 Pro ក៏មានប៊ូតុង physical shutter key សម្រាប់ប្រើប្រាស់ជាមួយកាមេរ៉ាថតរូបផងដែរដូចជាចុចសង្កត់ជាប់ដើម្បីបើកដំណើរការកាមេរ៉ាថតរូប និងចុចបន្តិចដើម្បីធ្វើការ focus លើប្លង់ថតជាដើម។
Sharp Aquos R9 Pro បំពាក់បន្ទះឈីប Qualcomm Snapdragon 8s Gen 3 ភ្ជាប់ជាមួយរ៉េមទំហំ 12GB និងម៉េមូរីទំហំ 512GB។ ក្នុងម៉ាស៊ីនរបស់ Sharp Aquos R9 Pro មានរៀបចំនៅប្រព័ន្ធបំពងសារធាតុត្រជាក់vapor chamber cooling system ដើម្បីជួយកាត់បន្ថយការឡើងកម្តៅដែលបំភាយចេញតាមកងរង្វង់កាមេរ៉ា។
ស្មាតហ្វនជំនាន់ថ្មីនេះ បំពាក់អេក្រង់ទំហំ 6.7-inch គាំទ្រកម្រិតបង្ហាញ QHD+ ក្នុងទំហំរីសូលូស៊ិន 1,440 x 3,120px ជាប្រភេទអេក្រង់ Pro IGZO OLED panel ដែលគាំទ្របច្ចេកវិទ្យា variable fresh rate display ចាប់ពី 1Hz ដល់ 240Hz ព្រមទាំងគាំត្របច្ចេកវិទ្យាស្កែនក្រយ៉ៅម្រាមដៃក្រោយមអេក្រង់ Ultrasonic fingerprint reader។
ស្មាតហ្វូនជំនាន់ថ្មីនេះ បានដំឡើងមកជាមួយប្រតិបត្តិការ Android 14 ចេញពីប្រអប់ និងគាំទ្រការធ្វើបច្ចុប្បន្នភាព Android រយះពេល 3 ឆ្នាំ ឬបីជំនាន់ និងប្រព័ន្ធសុវត្ថិភាពរយះពេល 5 ឆ្នាំ។ Aquos R9 Pro មានប្រព័ន្ធការពារទឹក និងធូលីកម្រិត IP68, ប្រព័ន្ធបច្ចេកវិទ្យា Wi-Fi7 និងបច្ចេកវិទ្យា Bluetooth 5.4។
ស្មាតហ្វូននេះមានថ្មទំហំ 5,000mAh គួរឲ្យស្តាយសម្រាប់បច្ចេកវិទ្យាសាកភ្លើងមិនទាន់ត្រូវបានក្រុមហ៊ុនបញ្ជាក់ឲ្យដឹងនៅឡើយទេ។ បន្ថែមពីនេះ វាក៏ភ្ជាប់នូវបច្ចេកវិទ្យា AI មកជាមួយផងដែរ ដូចជាមុខងារបកប្រែសារសំឡេង translate voicemail ក៏ដូចជាមុខងារសង្កេបអត្ថបទ Summarized text ជាដើម។ សម្រាប់តម្លៃវិញ Sharp Aquos R9 Pro នឹងមានតម្លៃខ្ទង់ប្រហែល $1,235 នៅពេលចេញលក់ក្នុងទីផ្សារប្រទេសជប៉ុន៕
