Doogee S119 គឺជាស្មាតហ្វូនកំពូលធន់ស៊េរីថ្មីរបស់ក្រុមហ៊ុនផលិតស្មាតហ្វូនម៉ាក Doogee។ ស្មាតហ្វូនកំពូលធន់កំពូលរឹងមាំស៊េរីថ្មីនេះ មានការរចនាបថដ៏ទាក់ទាញជាមួយនឹងការបំពាក់អេក្រង់រាងមូលដូចមុខនាឡិកានៅខាងក្រោយស្ថិតនៅជាមួយកញ្ចប់ លែនកាមេរ៉ាខាងក្រោយ។
អេក្រង់ខាងក្រោយមូលដូចមុខនាឡិកាដៃនេះ គឺមានទំហំ 1.32-inch បង្ហាញរូបភាពបានកម្រិត 360×360px ហើយអេក្រង់នេះអាចប្រើក្នុងការបង្ហាញសារជូនដំណឹងផ្សេងៗ ទទួលការហៅទូរស័ព្ទចូល គ្រប់គ្រងទៅលើការចាក់តន្ត្រី ក៏ដូចជាធ្វើការកំនត់ការបង្ហាញពេលវេលាដូចនាឡិកាដៃស្មាតវ៉ចជាមួយជម្រើសពុម្ពអក្សរ និងពណ៌តាមការចូលចិត្តបានថែមទៀតផង។
ងាកមកអេក្រង់ខាងមុខរបស់ Doogee S119 វិញ គឺមានទំហំ 6.72-inch គាំទ្រកម្រិតបង្ហាញ Full-HD+។ ចូលមកផ្នែកកំលាំងម៉ាស៊ីនវិញ Doogee S119 ដំណើរនៅលើបន្ទះឈីប MediaTek MT8788 octa-core ខ្នាត 12nm ភ្ជាប់ដោយរ៉េមទំហំ 8GB LPDDR4 ជាមួយមុខងារពង្រីកទំហំរ៉េម Virtual-RAM Expanded បានដល់ទំហំ 24GB ដើម្បីជួយបង្កើនសមត្ថភាពក្នុងការប្រើប្រាស់។ ស្មាតហ្វូនកំពូលធន់រឹងមាំមួយនេះមានអង្គផ្ទុកទិន្នន័យក្នុងម៉ាស៊ីនស្រាប់ដល់ 512GB និងអាចបន្ថែមម៉េមូរីបានដល់ 2TB ហើយនិងដំណើរការដោយប្រតិបត្តិការ Android 14 ចេញពីប្រអប់ស្រាប់។
Doogee S119 មានកាមេរ៉ាក្រោយ 3 គ្រាប់ភ្ជាប់ដោយកាមេរ៉ាគោលទំហំ 108MP+ ទំហំ 20MP ជាសែនស័រ night vision សម្រាប់ជំនួយដល់ការថតរូបនៅទីតាំងខ្សោយពន្លឺ រួមនឹងកាមេរ៉ា Ultra-wide 120 ដឺក្រេទំហំ 5MP។ ចំនែកកាមេរ៉ាមុខសម្រាប់សែលហ្វីវិញ គឺមានទំហំ 16MP។ ស្មាតហ្វូនកម្រិតថវិកាស៊េរីថ្មីមួយនេះមានថ្មទំហំយក្សដល់ 10.200mAh និងគាំទ្របច្ចេកវិទ្យាសាកភ្លើងល្បឿនលឿន 33W Wired Fast charging។
Doogee S119 មានប្រព័ន្ធការពារទឹក និងធូលីកម្រិត IP68, IP69K, និងទទួលបានវិញ្ញាណបនបត្របញ្ជាក់ពីភាពធន់កម្រិត MIL-STD-810H certifications ថែមទៀតផង ដែលនេះ គឺបានបញ្ជាក់ច្បាស់ថា Doogee S119 គឺពិតជាមានភាពធន់និងការទឹក និងដីចូល ហើយនិងការធ្លាក់ជាដើម។
ស្មាតហ្វូននេះមានរន្ធដាក់ស៊ីមកាត និងម៉េមូរីកាតបន្ថែមចំនួនបី ដែលអាចដាក់ស៊ីមបានពីរ និងម៉េមូរីបន្ថែមមួយក្នុងពេលតែមួយ។ Doogee S119 គាំទ្រប្រព័ន្ធសេវាកម្រិត 4G LTE, មានប្រព័ន្ធ Bluetooth, Wi-Fi និង GPS។ Doogee S119 មានដាក់លក់នៅលើគេហទំព័ររបស់ក្រុមហ៊ុនជាផ្លូវការណ៍ជាមួយតម្លៃចាប់ខ្ទង់ $339.99៕
