ក្រុមហ៊ុនផលិស្មាតហ្វូនធំៗរបស់ប្រទេសចិនជាច្រើន បាននឹងកំពុងសំឡឹងទៅរកគោលដៅថ្មីសម្រាប់ការប្រើប្រាស់ថ្មប្រភេទ Silicon-carbo battery ដើម្បីបង្កើននូវប្រសិទ្ធិភាពថាមពលថ្មក្នុងការបំពេញតម្រូវការឲ្យបន្ទះឈីបកំពូលជំនាន់ថ្មី និងប្រសិទ្ធិភាពអាយុកាលថ្មឲ្យកាន់ប្រើប្រាស់បានយូរសម្រាប់ស្មាតហ្វូនកំពូលរបស់ខ្លួនជាមួយនឹងរចនាតួរខ្លួនឲ្យមានកម្រាស់ស្តើង។

បច្ចេកវិទ្យាថ្មថ្មីនេះ ត្រូវបានប្រើដំបូងគេដោយក្រុមហ៊ុនផលិតស្មាតហ្វូន Honor ដោយបានបំពាក់នូវលើស្មាតហ្វូនអេក្រង់បត់ដែលមានកម្រាស់ស្តើងបំផុតត្រឹម 4.7mm របស់ខ្លួន គឺ Honor Magic V2។ ស្របពេលជាមួយគ្នានេះ ក្រុមហ៊ុន Samsung ក៏ត្រូវបានគេរាយការណ៍ថា ក៏ត្រៀមប្រើនូវបច្ចេកវិទ្យាថ្មថ្មីនេះនៅលើកំពូលស្មាតហ្វូនជំនាន់ក្រោយរបស់ខ្លួនផងដែរ។

ក្រុមហ៊ុន Samsung ត្រូវបានគេដឹងថា បាននឹងកំពុងធ្វើការនៅលើបច្ចេកវិទ្យាថ្ម Silicon-carbon battery tech។ តាមរយះការចេញផ្សាយដោយបណ្តាញសារព័ត៌មានកូរ៉េខាងត្បូង FNNews បាននិយាយថា កំពូលស្មាតហ្វូនជំនាន់ថ្មី Galaxy S26 Ultra ដែលចេញនៅដើមឆ្នាំក្រោយនេះ នឹងបំពាក់ថ្មទំហំ 7,000mAh។ សម្រាប់កំពូលស្មាតហ្វូនរបស់ក្រុមហ៊ុនចិនបច្ចុប្បន្ន គឺ Nubia Red Magic 10 Pro គឺមានថ្មទំហំ 7,050mAh និងម៉ូដែល Redmi Turbo 4 Pro ដែលនឹងបង្ហាញខ្លួននាពេលខាងមុខត្រូវបានគេដឹងថា នឹងមានថ្មទំហំ 7,500mAh។

បច្ចុប្បន្ន Samsung បានធ្វើការដុសខាតទៅស្បែកមុខកម្មវិធី One UI7 សម្រាប់កំពូលស្មាតហ្វូនរបស់ខ្លួន ដែលជួយឲ្យការប្រើប្រាស់ថ្មមានរយះពេលយូរជាងជំនាន់មុន បើទោះបីជារក្សាទំហំថាមពលថ្មដូចគ្នានឹងជំនាន់មុនក៏ដោយ។ ហើយប្រសិនបើព័ត៌មានចចាមអារាមជុំវិញការប្រើប្រាស់បច្ចេកវិទ្យាថ្ម Si/C battery កើតមានពិតប្រាកដមែននោះ គឺវានឹងធ្វើឲ្យថាមពលថ្មរបស់កំពូលស្មាតហ្វូន Galaxy S26 Series មានប្រសិទ្ធិភាពកាន់ប្រើប្រាស់បានកាន់តែយូរ។

ជាមួយគ្នានេះ បើតាមប្រភពព័ត៌មានបានបញ្ជាក់ថា Samsung Galaxy S26 Ultra ក៏នឹងគាំទ្របច្ចេកវិទ្យាសាកភ្លើងល្បឿនលឿនកំលាំង 65W Wired Fast Charging ធៀបនឹងកំលាំង 45W នៅលើ Galaxy S25 Ultra បច្ចុប្បន្ន ដើម្បីបន្ថយពេលវេលាក្នុងការ សាកភ្លើងឲ្យថ្មទំហំ 7,000mAh បានឆាប់ពេញ៕