ក្រុមហ៊ុន Samsung ត្រូវបានគេរាយការណ៍ថា នឹងបង្ហាញនូវកញ្ចក់ OLED ថ្មីសម្រាប់ស្មាតហ្វូន Galaxy S26 Ultra នៅឆ្នាំក្រោយនេះ ដែលបច្ចេកវិទ្យាថ្មីនេះ នឹងផ្តោតទៅលើបច្ចេកវិទ្យា AI នៅក្នុងការជួយការពារនូវឯកជនភាពរបស់អ្នកប្រើប្រាស់។ ស្មាតហ្វូនថ្មីនេះ នឹងប្រើប្រាស់នូវបច្ចេកវិទ្យា Flex Magic Pixel Technology ដែលអភិវឌ្ឍដោយក្រុមហ៊ុន Samsung Display។ ក្រុមហ៊ុនផលិតអេក្រង់នេះ ក៏បានបង្ហាញនូវបច្ចេកវិទ្យានេះ នៅក្នុងព្រឹត្តិការណ៍ MWC 2025 និងនៅក្នុងព្រឹត្តិការណ៍ K-Display 2025 នៅក្នុងឆ្នាំនេះផងដែរ។

តាមរយៈនៃការផ្លាស់ប្តូរជាច្រើនដ៏សំខាន់នេះ ត្រូវគេរំពឹងថា នឹងបង្ហាញនៅឆ្នាំក្រោយនេះ។ សម្រាប់ស្មាតហ្វូននៅឆ្នាំក្រោយនេះនឹងមានឈ្មោះហៅថា Galaxy S26 Pro ខណៈពេលដែលម៉ូឌែល  “+” នឹងជំនួសដោយស្មាតហ្វូន Galaxy S26 Air ខណៈពេលដែលស្មាតហ្វូន Ultra នឹងក្លាយជាស្មាតហ្វូនកំពូលនៅក្នុងត្រកូលស្មាតហ្វូននេះ។

របាយការណ៍ជាច្រើនចេញពីប្រទេសកូរ៉េបញ្ជាក់ថា បច្ចេកវិទ្យា Flex Magic Pixel Technology របស់ក្រុមហ៊ុន Samsung Display នេះកំពុងតែចាប់ផ្តើមការផលិតទ្រង់ទ្រាយធំ។ អេក្រង់នេះ អាចនឹងប្រើប្រាស់នៅលើស្មាតហ្វូនGalaxy S26 Ultra និងស្មាតហ្វូនបត់បានសម្រាប់ឆ្នាំ 2026 ផងដែរ។

បច្ចេកវិទ្យាអេក្រង់នេះ គឺប្រើប្រាស់នូវ AI ដើម្បីគ្រប់គ្រងទៅលើ OLED Panels មើលគ្រប់មុំតែម្តង។ ប្រសិនបើអ្នកបើកនូវកម្មវិធីធនាគារនៅលើស្មាតហ្វូនGalaxy S26 Ultra របស់អ្នកដែលមានព័ត៌មានសម្ងាត់នោះ បច្ចេកវិទ្យា AI នឹងធ្វើការកែប្រែទៅលើ ភិចសែលជាច្រើននេះដោយស្វ័យប្រវត្តិដើម្បីកំណត់ទៅលើកម្រិតនៃមុំមើលឃើញ ដូចនេះមិនមានអ្នកណាម្នាក់អាចមើល ទៅលើព័ត៌មានរបស់អ្នកបានទេ។

បច្ចេកវិទ្យានេះប្រហែលជាស្រដៀងគ្នាទៅនឹងការប្រើប្រាស់នូវកញ្ចក់ការពារឯកជនភាព ដែលជាធម្មតាត្រូវដាក់តម្លើងនៅលើស្មាតហ្វូនរបស់ពួកគេនោះ។ Flex Magic Pixel នឹងផ្តល់នូវគុណសម្បត្តិជាច្រើន ដើម្បី ធានាថាអ្នកនឹងទទួលបាននូវសមត្ថភាពពេញលេញនៃការប្រើប្រាស់ និងការការពារឯកជនភាពរបស់អ្នកបានកម្រិតខ្ពស់ បំផុត៕