យោងតាមព័ត៌មានថ្មីដែលបង្ហាញនៅលើបញ្ជី Geekbench នៅថ្ងៃនេះ បានបញ្ជាក់ថា Galaxy Tab S11 Ultra ដែលជាថេប្លេតជំនាន់ថ្មីក្រុមហ៊ុន Samsung នឹងមានការប្រើប្រាស់នូវបន្ទះឈីបចុងក្រោយបំផុតរប់សក្រុមហ៊ុន MediaTek។ នៅលើបញ្ជីនេះ បានបង្ហាញថាថេប្លេតថ្មីនេះ មានលេខម៉ូដែល SM-X936B ហើយនឹងប្រើប្រាស់នូវបន្ទះឈីប MediaTek Dimensity 9400+។ សូមជំរាបថា មុននេះ មានការទម្លាយចេញនូវថេប្លេតជំនាន់ថ្មី Tab S11+ ផងដែរ ដោយថេប្លេតនេះមិនប្រើប្រាស់ បន្ទះឈីប Snapdragon ដូចគ្នា។

សម្រាប់បន្ទះឈីប Dimensity 9400+ គឺមានការប្រើប្រាស់នូវស្ថាបត្យកម្ម 1+3+4 core គាំទ្រជាមួយនឹងល្បឿន 3.73GHz។ ឈីបនេះមាន 12-core Immortalis-G925 GPU និងមានការទ្រទ្រង់ទៅលើ 59 TOPS ដែលផ្តោតទៅលើការងារ AI និង multitasking ថែមទៀតផង។ បើមើលទៅលើពិន្ទុ CPU បង្ហាញថា ថេប្លេត Tab S11 Ultra នេះ មានពិន្ទុ 2,675 នៅក្នុងការតេស្ត Single-Core និងពិន្ទុ 8,039 នៅក្នុងការតេស្ត Multi-Core ដែលមានការបង្កើនពីស្មាតហ្វូន Tab S10 Ultra ដែលមានពិន្ទុ 2,200 នៅក្នុងការតេស្ត Single-Core និងពិន្ទុ 7,500 នៅក្នុងការតេស្ត multi-core។ ស្មាតហ្វូននេះ មានរ៉េម 12GB LPDDR5X RAM ហើយវាក៏ដំណើរការនូវ Android 16 ជាមួយនឹង  Samsung’s One UI 8។

ថេប្លេតជំនាន់ថ្មីនេះ ត្រូវបានគេទម្លាយមុននេះ មានអេក្រង់ទំហំ 14.8-អ៊ីងប្រភេទអេក្រង់ AMOLED display គាំទ្រជាមួយនឹងកម្រិតភាពច្បាស់ 2.9K resolution និងល្បឿន 120Hz refresh rate។ ថេប្លេតនេះ មានថាមពលថ្មទំហំ 11,374mAh ដែលមានការបង្កើនពីម៉ូដែលឆ្នាំមុនដែលមានទំហំថ្ម 11,200mAh។ តាមដំណឹងចុងក្រោយនេះ បញ្ជាក់ថា ក្រុមហ៊ុន Samsung បានត្រៀមខ្លួនសម្រាប់ព្រឹត្តិការណ៍ Unpacked នៅថ្ងៃទី 9 ខែកក្កដាខាងមុខនេះ សម្រាប់វត្តមានស្មាតហ្វូន  Z Fold7 និង Z Flip7 ខណៈពេលដែលថេប្លេត Galaxy Tab S11 series អាចនឹងបង្ហាញខ្លួននៅក្នុងខែកញ្ញា ឬតុលាដូចទៅនឹងឆ្នាំមុន។

ជាមួយនឹងបន្ទះឈីបដ៏ខ្លាំងក្លាទៅលើលក្ខណៈសម្បត្តិ និង Android version ចុងក្រោយបំផុត នឹងធ្វើអោយថេប្លេត Galaxy Tab S11 Ultra នេះ មានសមត្ថភាពអាចប្រកួតប្រជែងបានជាមួយនឹង iPad Pro របស់ក្រុមហ៊ុន Apple និងថេប្លេត Flagship ជាច្រើនទៀតនៅលើទីផ្សារផងដែរ៕