ក្រោយពីបានបង្ហាញខ្លួននៅក្នុងព្រឹត្តិការណ៍ 2024 Beijing Auto Show រួចមកពេលនេះរថយន្តអគ្គិសនីប្រភេទ Sedan ដ៏ប្រណិតរបស់ក្រុមហ៊ុន Hongqi
ម៉ូដែល Guoya បានបើកទទួលការកក់ទុកមុនសម្រាប់អតិថិជននៅជុំវិញពិភពលោក។ រថយន្តប្រណិតមួយនេះ បានជ្រកនៅក្រោមស្លាកយីហោរថយន្តប្រណិត Hongqi Golden Sunflower។ Hongqi Guoya ត្រូវបានគេស្គាល់ដំបូងថាជាម៉ូដែល Hongqi L1។
ក្រៅតែពីម៉ូដែល Guoya នេះទៅ នៅក្នុងស្លាកយីហោ Golden Sunflower របស់ Hongqi នៅមានម៉ូដែលរថយន្តប្រណិតមួយចំនួនផ្សេងទៀតរួមមាន Guoyao (国耀), Guoli (国礼), និង Guoyue (国悦)ជាដើម។ Golden Sunflower គឺជាម៉ាកយីហោរថយន្តដែលមានតម្លៃថ្លៃ និងប្រណិតបំផុតរបស់ក្រុមហ៊ុន Hongqi។ Hongqi Guoya មានការឌីស្សាញឡើងតាមលំនាំនៃភាសារចនាបែប L-Concept ជាមួយផ្ទៃខាងមុខបំពាក់នូវផ្ទាំងប៉ាណាដែលមានការឌីស្សាញបែបទឹកធ្លាក់ waterfall grille យ៉ាងប្រណិត ដែលេរចនាផលិតឡើងដោយ chrome material និងចង្កៀងបំភ្លឺ Headlight រាងមូលបន្តិចនៅសងខាង រួមនឹងរូបសញ្ញាសំគាល់របស់ក្រុមហ៊ុន Hongqi នៅចំកណ្តាល ដែលអាចលាក់ចូលក្នុង និងបង្ហាញចេញក្រៅបាន។
ចង្កៀងខាងមុខរបស់ Hongqi Guoya ប្រើប្រាស់នូវបច្ចេកវិទ្យាអំពូលភ្លើងប្រភេទ DLP (Digital Light Processing) ដែលអាចដំណើរការដំឡើង និងទម្លាក់ភ្លើងដោយស្វ័យប្រវត្តតម្រូវបានតាមស្ថានភាពផ្លូវ ឬក៏ឧបសគ្គផ្សេងៗដូចជាមានមនុស្សដើរឆ្លងផ្លូវជាដើម។ រថយន្តអគ្គិសនីប្រភេទ Luxury Sedan EV មួយនេះមានប្រវែងបណ្តោយ 5,353mm X ទទឹង 1,998mm X កម្ពស់ 1,511mm, និងគម្លាតរវាងកង់មុខទៅកង់ក្រោយ 3,260mm។ Hongqi Guoya មានជ្រើសម៉ូដែល 4 កៅអី និង 5 កៅអី ជាមួយទំហំយ៉ាន់កង់ 19-inch និង 20-inch។
Hongqi Guoya មានជម្រើសប្រើម៉ាស៊ីនហៃព្រីដចំនួនពីរផ្សេងគ្នា គឺជម្រើសម៉ាស៊ីន 3.0T Plug-in Hybrid និង 4.0T Plug-in-Hybrid System ហើយទាំងពីរជម្រើសដំណើរការជាមួយប្រព័ន្ធ 8AT ដូចគ្នា។ ដោយម៉ូដែលម៉ាស៊ីន 3.0T អាចផលិតថាមពលបាន 290kW ខណៈម៉ូដែលម៉ាស៊ីន 4.0T អាចផលិតថាមពកំលាំងបាន 360kW។ ហើយទាំងពីរម៉ូដែលនេះ ក៏ប្រើប្រាស់នូវកញ្ចប់អាគុយអគ្គិសនីប្រភេទ Ternary Lithium ដូចគ្នា គ្រាន់តែ Hongqi មិនទាន់បានប្រាប់ឲ្យដឹងពីទំហំថាមពលនៃកញ្ចប់អាគុយនៅឡើយទេក្នុងពេល។
ចូលមកការរៀបចំតុបតែងផ្នែកខាងក្នុងវិញ គឺមានភាពប្រណិតនិយមតែម្តង ដោយក្នុងនោះមានដូចជាការបំពាក់នូវអេក្រង់ Digital LCD Instrument រចនាស៊ុមជុំវិញបែបកោង និងអេក្រង់កម្សាន្តទំហំធំនៅចំកណ្តាល និងដៃចង្កូតរចនាជារង្វង់អក្សរ O រំលេចជាមួយនិមិត្តសញ្ញាម៉ាក Golden Sunflower នៅកណ្តាល។ បន្ថែមពីនេះ ក៏មានការឌីស្សាញតុបតែងឡើងជាមួយប្រភេទឈើប្រណិត ស្បែកទន់ប្រណិតជាមួយជម្រើសពណ៌រសលាយផ្កាឈូក និងពណ៌សលាយផ្កាឡាវ៉ែនឌឺដ៏ប្រណិតត្រជាក់ត្រជាក់ភ្នែកថែមទៀតផង។ សម្រាប់ម៉ូដែលកៅអី 4 គឺកៅអីអ្នកដំណើរខាងក្រោយមានជាមួយកន្លែកដាក់ដៃ ឬហៅថា Armrest និងកន្លែងដាកកែវទឹកនៅកណ្តាល។
បន្ថែមពីនេះក៏មានអេក្រង់ថាច់ស្ក្រីនសម្រាប់ចុចបញ្ជាមុខងារមួយចំនួនស្ថិតនៅកណ្តាលពីមុខ Armrest សម្រាប់កំណត់បញ្ជាមុខងារកំដៅកៅអី, ម៉ាស្សា រួមនឹងម៉ាស៊ីនត្រជាក់ថែមទៀតផង។ សម្រាប់មុខងារពិសេសទំនើបផ្សេងទៀតមានដូចជាមុខងារបង្ហាញលើកញ្ចក់ដំបូលមុខ AR-HUD, មុខងារស្កែនមុខ មុខងារបញ្ជាដោយសំឡេង, មុខងារ gesture multi-mode interaction mode, មុខងារបញ្ជាប្រព័ន្ធភ្លើងឆ្លាតវៃ intelligent ambient light adjustment រួមនឹងមុខងារ និងបច្ចេកវិទ្យាប្រើប្រាស់ទំនើបៗយ៉ាងសម្បូរបែបជាច្រើនទៀត។ ទោះជាយ៉ាងណា Hongqi មិនទាន់បានបញ្ជាក់ពីតម្លៃលក់ និងកាលបរិច្ឆេទចេញលក់រថយន្ត Sedan ដ៏ប្រណិតរបស់ខ្លួននៅឡើយទេក្នុងពេលនេះ៕
