ថ្មីនេះ ក្រុមហ៊ុន Counterpoint បានបញ្ចេញនូវរបាយការណ៍ថ្មីមួយ ដែលមានការបង្ហាញនូវដំណើរការរបស់ក្រុមហ៊ុន Huawei, Apple និងក្រុមហ៊ុនជាច្រើនទៀត ទាក់ទងនឹងការលក់ស្មាតហ្វូនរបស់ខ្លួនកំឡុងថ្ងៃទី 11.11 ដែលជាព្រឹត្តិការណ៌ប្រចាំឆ្នាំដ៏ធំនៅក្នុងប្រទេសចិនសម្រាប់ឆ្នាំ 2024 នេះ។ របាយការណ៌ក្រុមហ៊ុននេះ បានបញ្ជាក់ថា ស្មាតហ្វូនត្រកូល Mate របស់ Huawei គឺទទួលបាននូវភាពទាក់ទាញយ៉ាងខ្លាំងក្លាជាងគេ ខណៈដែលក្រុមហ៊ុន Apple គឺមានការលក់ធ្លាក់ចុះ។

គួរបញ្ជាក់ផងដែរថា ជារៀងរាល់ឆ្នាំ ប្រទេសចិន បានរៀបចំនូវព្រឹត្តិការណ៍ 11.11 នេះជាមួយនឹងការលក់នៅក្នុងតម្លៃពិសេសតាំងពីមួយខែមុននេះ។ តាមរបាយការណ៍មុននេះ បានបញ្ជាក់ថា ក្រុមហ៊ុន Huawei និង Apple នៅតែស្ថិតនៅក្នុងការប្រជែងជាមួយនឹងស្មាតហ្វូន Flagship ទាំង 10 នៅក្នុងបញ្ជីនៃស្មាតហ្វូននេះ។ បន្ទាប់ពីព្រឹត្តិការណ៍ 11.11 នៅក្នុងប្រទេសចិននេះ ក្រុមហ៊ុន Counterpoint ក៏បង្ហាញនូវលទ្ធផលនៃការប្រកួតប្រជែងរវាងក្រុមហ៊ុនកំពូលៗមួយចំនួននៅក្នុងទីផ្សាររបស់ប្រទេសចិន។

ក្រុមហ៊ុនស្រាវជ្រាវទីផ្សារបញ្ជាក់ថា ក្រុមហ៊ុន Huawei ពិតជារីករាយជាមួយនឹងកំណើនដ៏ខ្លាំងក្លានៅក្នុងការលក់ 11.11 ឆ្នាំ 2024 នេះ ដោយសារតែតួរលេខនៃការលក់មានការកើនឡើងចំនួន 7% បើធៀបទៅនឹងឆ្នាំមុននេះ ខណៈពេលដែលក្រុមហ៊ុន Apple មានការធ្លាក់ចុះ 2 ខ្ទង់ផងដែរ។ ក្រុមហ៊ុន Counterpoint បាននិយាយថា ក្រុមហ៊ុន Huawei ក៏បានកាត់បន្ថយទៅលើតម្លៃនៃស្មាតហ្វូន Pura 70 និង Mate 60 ដែលធ្វើអោយក្រុមហ៊ុននេះ មានកំណើនដ៏ខ្លាំងក្លា។ ស្មាតហ្វូន Nova 13 Series វិញ ក៏លក់ដាច់ខ្លាំងផងដែរ ពីព្រោះថាស្មាតហ្វូននេះ បំពាក់នូវបន្ទះឈីប Kirin 5G chip និងមុខងារកាមេរ៉ា AI។

ទន្ទឹមនឹងនេះ បើទោះបីជាការលក់ក្រុមហ៊ុន Apple គឺមានការធ្លាក់ចុះ 2 ខ្ទង់ក៏ដោយ ស្មាតហ្វូន iPhone 16 Pro និងPro Max នៅតែជាស្មាតហ្វូនដែលលក់ដាច់ខ្លាំងបំផុតនៅក្នុងថ្ងៃ 11.11 នេះផងដែរ។ ក្រៅពីក្រុមហ៊ុន Huawei និង Apple នោះ ក្រុមហ៊ុន OPPO មានការកើនឡើង 6% នៅក្នុងការលក់ទៅលើស្មាតហ្វូន A series, Reno 12 និង Find X8។ ក្រុមហ៊ុន Vivo ក៏មានការកើនឡើង 5% បើធៀបទៅនឹងឆ្នាំមុននេះនេះគឺដោយសារតែការលក់ទៅលើស្មាតហ្វូន Y series, X200 និង  iQOO ផងដែរ៕