ក្រឡេកមើលទៅលើប្រព័ន្ធកាមេរ៉ាថតរូបថ្មីៗនៅលើស្មាតហ្វូនថ្នាក់ប្រណិតនាពេលបច្ចុប្បន្ននេះឃើញថា ស្មាតហ្វូនរបស់ក្រុមហ៊ុន Huawei គឺនៅតែជាម៉ូដែលខ្លាំងជាងគេនៅលើ DxOMAX នេះគឺដោយសារតែក្រុមហ៊ុននេះបានប្រើប្រាស់នូវបច្ចេកវិទ្យាកាមេរ៉ា variable aperture។ សូមជំរាបថា កាមេរ៉ា Variable aperture នេះ ធ្លាប់បានប្រកាសអោយប្រើប្រាស់ដំបូងគេដោយក្រុមហ៊ុន Samsung ទៅលើស្មាតហ្វូន Galaxy S9 series នៅក្នុងឆ្នាំ 2018 ប៉ុន្តែក្រុមហ៊ុន Huawei ក៏បានបន្តអភិវឌ្ឍទៅមុខជានិច្ចទៅលើបច្ចេកវិទ្យានេះ។

យោងតាមរបាយការណ៌ថ្មីៗនេះ បាននិយាយថា នៅក្នុងពេលបច្ចុប្បន្ននេះ ក្រុមហ៊ុនបច្ចេកវិទ្យាយក្សរបស់ចិននេះនៅមិនទាន់មានគូប្រជែងទៅលើបច្ចេកវិទ្យាថតរូបភាពនេះនៅឡើយទេ។ ថ្មីៗនេះ អ្នកទម្លាយ DigitalChatStation ក៏ទើបតែចែករំលែកទៅលើបច្ចេកវិទ្យា variable aperture ដែលបច្ចុប្បន្ននេះមានតែក្រុមហ៊ុន Huawei តែមួយគត់ដែលបំពាក់នៅលើស្មាតហ្វូនជាច្រើនរបស់ខ្លួន។ អ្នកទម្លាយរូបនេះ បានបន្ថែមថា ស្មាតហ្វូនជំនាន់ថ្មី Huawei Mate 80 series នឹងប្រើប្រាស់ទៅលើបច្ចេកវិទ្យានេះ។ បើតាមការបញ្ជាក់ពីអ្នកជំនាញកាមេរ៉ាបាននិយាយថា Variable aperture មានតួនាទីក្នុងការបង្កើនទៅលើពន្លឺចូលទៅក្នុង shutter ដែលអ្នកប្រើប្រាស់អាចធ្វើការផ្លាស់ប្តូរនូវ Apertures ផ្សេងៗគ្នាដើម្បីថតរូបភាព។

គួរបញ្ជាក់ថា មួយរយៈចុងក្រោយនេះ ក្រុមហ៊ុន Samsung បានផ្អាកការប្រើប្រាស់ទៅលើបច្ចេកវិទ្យានេះប្រហែលជាដោយសារតែការប្រើប្រាស់នូវបច្ចេកវិទ្យានេះ នឹងបង្កើនទៅលើតម្លៃនៃការផលិតរបស់ស្មាតហ្វូនរបស់ខ្លួន។ ក្រុមហ៊ុនជាច្រើនទៀតដូចជា Honor និង Xiaomi ក៏បានស្រាវជ្រាវទៅលើបច្ចេកវិទ្យាកាមេរ៉ា variable នេះផងដែរ ប៉ុន្តែក្រោយមក ក្រុមហ៊ុនទាំងនេះ ក៏ផ្អាកទៅលើបច្ចេកវិទ្យានេះសិន។ សម្រាប់ក្រុមហ៊ុន Huawei បានប្រើប្រាស់នូវបច្ចេកវិទ្យានេះ ទៅលើស្មាតហ្វូន Mate 50 Pro និងបន្តក្នុងការប្រើប្រាស់នូវបច្ចេកវិទ្យានេះទៅលើស្មាតហ្វូនត្រកូល Mate បន្ថែមទៀត ជាពិសេស គឺទៅលើស្មាតហ្វូន Mate 80 series ថ្មីតែម្តង៕