ស្មាតហ្វូនអេក្រង់បត់ដែលកំពុងមានភាពពេញនិយមខ្លាំងនៅលើទីផ្សារបច្ចុប្បន្ន គឺមានការឌីស្សាញគន្លឹះត្រចៀកបត់អេក្រង់ចូលក្នុងដូចជា Samsung Galaxy Z Fold 5 ជាដើម។ យ៉ាងណាមិញបើតាមការលើកឡើងពីអ្នកវិភាគល្បីឈ្មោះផលិតផល Apple មួយរូប គឺលោក  Jeff Pu បានបង្ហើបថា សម្រាប់ផលិតផលទូរស័ព្ទអេក្រង់បត់ដំបូងរបស់ Apple គឺអាចនឹងមានការឌីស្សាញផ្ទុយគ្នាជាមួយ Galaxy Z Fold Series របស់ Samsung ពោល គឺអាចនឹងបត់អេក្រង់់ចេញមកក្រៅដូចជាអ្វីដែល Huawei បានធ្វើនៅលើ Mate Xs 2 កាលពីប៉ុន្មានឆ្នាំមុនដែរ។ ប្រភពដដែលបានបញ្ជាក់ថា iPhone អេក្រង់បត់ដំបូងរបស់ Apple នឹងមានអេក្រង់ទំហំ 7.9-inch ជាមួយការឌីស្សាញបត់ចេញក្រៅដូចនឹង Huawei Mate Xs 2។

Huawei គឺជាក្រុមហ៊ុនដំបូងគេតែមួយគត់ដែលមានការឌីស្សាញស្មាតហ្វូនអេក្រង់បត់អេក្រង់ចេញមកក្រៅ ដោយក្នុងនោះអេក្រង់ម្ខាងបត់ចេញមកធ្វើអេក្រង់អេក្រង់ខាងក្រៅ ឬ Cover-Display និងម្ខាងទៀតស្ថិតនៅខាងក្នុង។ ប៉ុន្តែការឌីស្សាញការបត់អេក្រង់ចេញក្រៅ ឬ Outward-display នេះ គឺមានការប្រឈមជាច្រើនជាងការបត់អេក្រង់ផ្អោបចូលក្នុង Inward-display ប៉ុន្តែ វាក៏ផ្តល់ឲ្យតួររបស់ទូរស័ព្ទមានកម្រាស់ស្តើងងាយស្រួលកាន់នៅពេលបត់អេក្រង់ផងដែរ។ ជាងនេះទៅទៀត ការរចនាអេក្រង់បត់ចេញក្រៅ ក៏ផ្តល់ឲ្យមានភាពងាយស្រួលក្នុងការប្រើប្រាស់នូវប្រព័ន្ធកាមេរ៉ាក្រោយសម្រាប់ការថតរូប និងវីដេអូសែលហ្វីបានក្នុងកម្រិតគុណភាពខ្ពស់ថែមទៀតផង។

បើតាមការបញ្ជាក់ពីលោក Jeff Pu បានឲ្យដឹងថា Apple ទំនងជានឹងមានលទ្ធភាពក្នុងការបញ្ចេញ iPhone Fold នៅពេលណាមួយក្នុងឆ្នាំ 2026 ឬក៏ក្នុងពេលដំណាលគ្នានៃការបង្ហាញវត្តមានរបស់ iPhone 18 Series។ បន្ថែមពីលើព័ត៌មាននៃការបង្ហាញវត្តមាន iPhone Fold ក្រុមហ៊ុនបិតាបច្ចេកវិទ្យារបស់អាមេរិកនេះ ត្រូវបានគេរាយការណ៍ថា បាននឹងកំពុងដំណើរការអភិវឌ្ឍន៍ផលិតម៉ាស៊ីនកុំព្យូទ័រ Macbook ដែលមានអេក្រង់បត់ផងដែរ។ Foldable Macbook ត្រូវបានគេនិយាយថា នឹងបំពាក់អេក្រង់បត់បានទំហំ 20.3-inch ហើយសង្វាក់នៃការផលិតទ្រង់ទ្រាយធំអាចនឹងត្រូវចាប់ផ្តើមធ្វើឡើងនៅចុងឆ្នាំ 2025។ ប្រភពព័ត៌មានមួយចំនួនផ្សេងទៀតបាននិយាយថា សម្រាប់ការចេញលក់ Foldable Macbook អាចនឹងត្រូវពន្យាពេលរហូតដល់ឆ្នាំ 2027៕