Jetour គឺម៉ាកយីហោរថយន្តប្រណិតមួយដែលស្ថិតនៅក្រោមក្រុមហ៊ុន Chery។ ហើយនៅពេលនេះ Jetour ត្រូវបានគេដឹងថា ត្រៀមធ្វើការប្រកាសចេញឡានប្រភេទ Pick up ដំបូងរបស់ខ្លួនដើម្បីធ្វើការប្រគូតប្រជែងទីផ្សារជាមួយក្រុមហ៊ុនរួមស្រុកដូចជា GWM និង BYD ជាដើម។ ជាការពិតណាស់ បើតាមរូបភាពដែលគេប្រមាញ់បានថ្មីៗនេះ គឺបានបង្ហាញពីគំរូឌីស្សាញរូបរាងផ្លូវការណ៍របស់ឡាន Pick up ដំបូងរបស់ Jetour។ តាមប្រភពបានបញ្ជាក់ថា Jetour Pick up ដំបូងចេញពីម៉ាកយីហោនេះ មានឈ្មោះថា Jetour Zongheng F700 Pick up។

រូបភាពដែលគេប្រមាញ់បាននេះ បានបង្ហាញឲ្យឃើញថា Zongheng F700 មាន DNA ឌីស្សាញដូចគ្នានឹង Zongheng G700 ដែលជាប្រភេទ SUV ដែរ គឺមានការឌីស្សាញបែបជ្រុងៗ ឬ Square-edged design។ ឡាន Pick up ថ្មីនេះ ត្រូវបានគេរំពឹងថា ក៏នឹងមានម៉ូឌែលប្រើប្រព័ន្ធម៉ាស៊ីន Hybrid ផងដែរ ប៉ុន្តែ មិនទាន់មានព័ត៌មានលក្ខណៈសម្បត្តិលម្អិតអំពីរថយន្ត Pick up ថ្មីនេះ នោះទេ។ Jetour Zongheng F700 ត្រូវបានចាត់ចូលក្នុងថ្នាក់ប្រភេទឡាន mid-size Pick up ហើយនឹងក្លាយជាដៃគូប្រគូតប្រជែងជាមួយនឹងម៉ូដែល GWM Cannon Pickup ដែលទើបបង្ហាញវត្តមានលក់នៅលើទីផ្សារប្រទេសចិនថ្មីៗនេះ។

តាមរូបភាពថតចេញពីផ្នែកកាប៊ីនខាងក្នុងរបស់ F700 គឺមានការរៀបចំតុបតែងដូចគ្នានឹងម៉ូដែល G700 SUV ដែរ ដោយក្នុងនោះមានអេក្រង់កម្សាន្តប្រភេទថាច់ស្គ្រីននៅកណ្តាលតាប់ឡូមានទំហំធំដល់ 15.6-inch និងអេក្រង់ទ្រវែងនៅជាប់នឹងកញ្ចក់ដំបូលខាងមុខមានទំហំធំដល់ទៅ 35.4-inch ជាប្រភេទ Panoramic display ដែលអាចអេក្រង់នេះមានមកជាមួយអេក្រង់បង្ហាញព័ត៌មាន និងអេក្រង់បង្ហាញមុខងារកម្សាន្តផ្សេងៗ។

យោងទៅលើប្រភពព័ត៌មានបែកធ្លាយបានឲ្យដឹងថា Jetour Zongheng F700 Pick up នឹងគាំទ្រដំណើរការដោយប្រព័ន្ធបច្ចេកវិទ្យា Kunpeng CDM-O plug-in hybrid system របស់ Jetour ផ្ទាល់ ដែលដំណើរការនៅលើម៉ាស៊ីន 2.0TD និងគាំទ្រដោយប្រព័ន្ធម៉ូទ័រអគ្គិសនីមួយ ឬពីរ ឬបី ជាមួយកញ្ចប់ថ្មប្រភេទ Dual-layer battery ដែលគាំទ្រនូវប្រព័ន្ធបច្ចេកវិទ្យាសាកភ្លើងចូលល្បឿនលឿនថែមទៀតផង។ Jetour Zongheng F700 off-road Pick up ថ្មីនេះ ត្រូវបានគេព្យាករណ៍ថា អាចនឹងមានតម្លៃខ្ទង់ប្រហែល $46,300៕