កាលពីពេលថ្មីៗនេះលោក Zhou Yan ដែលជាអ្នកចាក់ការទូទៅនៃក្រុមហ៊ុនម៉ាករថយន្ត MG របស់សម្ព័ន្ធក្រុមហ៊ុន SAIC បានបង្ហើបថា MG នឹងដាក់បង្ហាញរថយន្តស៊េរីថ្មីចំនួន 2 ម៉ូដែលនៅឆ្នាំ 2025 ដែលមួយជារថយន្តប្រភេទ Sedan ដំណើរការដោយអគ្គិសនីសុទ្ធ និងមួយទៀតជាប្រភេទរថយន្ត SUV ខ្នាតធំ 5 កៅអីដំណើរការដោយប្រព័ន្ធ Plug-in Hybrid។  យ៉ាងណាមិញលោក Zhou មិនបានបញ្ជាក់ថា រថយន្តទាំងពីរនេះ នឹងមានដាក់លក់នៅទីផ្សារសកលក្រៅពីទីផ្សារប្រទេសចិននៅឡើយទេ។

កាលពីដើមខែនេះ លោក Zhou បាននិយាយនៅលើប្រព័ន្ធផ្សព្វផ្សាយសង្គមថា ម៉ូឌែលថ្មីរបស់ MG ដែលចេញលក់នៅឆ្នាំក្រោយ នឹងត្រូវបានបំពាក់ដោយថ្មអគ្គិសនីប្រភេទ semi-solid state batteries។ បច្ចុប្បន្ននេះ ស្រឡាយរថយន្តអគ្គិសនីរបស់ MG មានរថយន្តប្រភេទ Supercar ម៉ូដែល EXE181 electric hypercar និង Cyberster electric roadster រួមជាមួយរថយន្តប្រភេទ Sedan ចំនួន 4 គ្រឿងមានដូចជា MG5, MG6, MG5 Scorpio, និងរថយន្ត hatchback ម៉ូដែល MG7 និង MG4 EV ក៏ដូចជាប្រភេទ SUV ដែលមានចំនួនបីម៉ូដែល គឺ MG One, MG ZS, និង MG ES5។

លើសពីនេះ យោងតាមរបាយការណ៍របស់ប្រព័ន្ធផ្សព្វផ្សាយក្រៅប្រទេស ក្រុមហ៊ុន MG ត្រូវបានគេរំពឹងថា នឹងដាក់លក់រថយន្តប្រភេទ SUV-7 កៅអីនៅលើទីផ្សារប្រទេសអូស្ត្រាលីក្នុងឆ្នាំ 2025 ដែលនឹងមានឈ្មោះថា "MG QS" ដែលអាចជាបងប្អូនរបស់ Roewe RX9 ដែលរថយន្ត SUV-7 កៅអីថ្មីនេះ អាចនឹងប្រើប្រាស់ម៉ាស៊ីនប្រភេទ Hybrid 1.5T។

MG មានដើមកំណើតនៅចក្រភពអង់គ្លេសដែលត្រូវបានបង្កើតឡើងក្នុងឆ្នាំ 1924។ ហើយក្នុងឆ្នាំ 2005  MG ត្រូវបានទិញដំបូងដោយក្រុមហ៊ុន Nanjing Automobile Group របស់ប្រទេសចិន។ បន្ទាប់មកនៅឆ្នាំ 2007 សម្ព័ន្ធក្រុមហ៊ុន SAIC បានទិញយកក្រុមហ៊ុន Nanjing Automobile ។ ដូចនេះ MG ត្រូវបានបញ្ចូលជាផ្លូវការទៅក្នុងសម្ព័ន្ធក្រុមហ៊ុន SAIC ហើយបានក្លាយជាម៉ាកយីហោរថយន្តផ្លូវការណ៍ក្នុងស្រុករបស់ប្រទេសចិន។

ទិន្នន័យបង្ហាញថាការលក់របស់ MG នៅក្នុងទីផ្សារពិភពលោកកំពុងកើនឡើងជាលំដាប់។ ប៉ុន្តែ ផ្ទុយទៅវិញ ការលក់នៅប្រទេស ចិនកំពុងធ្លាក់ចុះពីមួយឆ្នាំទៅមួយឆ្នាំ។ ចាប់ពីឆ្នាំ 2019 ដល់ឆ្នាំ 2023 ការលក់ប្រចាំឆ្នាំនៅលើទីផ្សារសកលរបស់ MG មានចំនួន 298,000, 310,000, 470,000, 660,000 និង 840,000 គ្រឿងក្នុងឆ្នាំរៀងៗគ្នា ដែលធ្វើឲ្យម៉ាករថយន្ត MG ជាប់ចំណាត់ថ្នាក់ទីមួយក្នុងការនាំចេញរថយន្តម៉ាកតែមួយរបស់ប្រទេសចិន ក្នុងរយៈពេលប្រាំឆ្នាំជាប់ៗគ្នា និងមានប្រហែល 70%សម្រាប់ការលក់រថយន្តសរុបរបស់ SAIC។

ក្នុងឆ្នាំ 2023 សម្ព័ន្ធក្រុមហ៊ុន SAIC បានដាក់ចេញ "ផែនការសម្រាប់សកម្មភាពបីឆ្នាំលើកការអភិវឌ្ឍន៍រថយន្តដំណើរការដោយថាមពលថ្មីហៅថា (New Energy Vehicles)" ដើម្បីជម្រុញការលក់របស់ខ្លួនឲ្យបានដល់គោលដៅនៃការលក់ប្រចាំឆ្នាំចំនួន 3.5 លានគ្រឿងសម្រាប់រថយន្ត NEVs នៅឆ្នាំ 2025៕