យោងតាមសេចក្តីរាយការណ៌ថ្មីចេញពីអ្នកទម្លាយដ៏ល្បីបំផុតរបស់ប្រទេស Digital Chat Station នៅថ្ងៃនេះ បានបញ្ជាក់ថា ក្រុមហ៊ុន OPPO បាននឹងកំពុងតែចាប់ផ្តើមធ្វើតេស្តទៅលើកាមេរ៉ានៅលើស្មាតហ្វូនស៊េរីថ្មីម៉ូដែលប្រណិត Find X10 Series ដែលគ្រោងនឹងបង្ហាញវត្តមាននៅលើទីផ្សារនាពេលឆាប់ៗនេះហើយ។

ផ្អែកតាមពាក្យចចាមអារ៉ាមកន្លងមក បាននិយាយថា Find X10 Pro នឹងមានការបំពាក់នូវកាមេរ៉ាគោលទំហំ 200MP និងមួយគ្រាប់ទៀតដែលជា Periscope Telephoto ក៏មានទំហំ 200MP ផងដែរ។ ឡែនទាំងពីរ នឹងមានការគាំទ្រនូវសិនស័រ 1/1.3" អ៊ីងដូចគ្នា។

សូមជំរាបថា Find X9 Pro ដែលជាស្មាតហ្វូនស៊េរីថ្មី ដែលទើបតែប្រកាសចេញនៅលើទីផ្សារនាខែតុលាកន្លងទៅនេះ គឺមានការបំពាក់នូវកាមេរ៉ាគោលឍទំហំ 50MP និងមានការគាំទ្រដោយសិនស័រ 1/1.28 អ៊ីង ខណៈដែលមួយគ្រាប់ទៀតទំហំ 200MP ជា Periscope telephoto camera គឺមានការគាំទ្រដោយសិនស័រ 1/1.56" អ៊ីង។ ដូច្នេះជាមួយនិងការប្រើប្រាស់នូវសិនស័រថ្មី ហើយនិងកាមេរ៉ាទំហំ 200MP នឹងធ្វើអោយស្មាតហ្វូន Find X10 Pro អាចប្រើប្រាស់កាមេរ៉ា Telephoto បានកាន់តែល្អជាងមុន។

គួរបញ្ជាក់ផងដែរថា ក្រៅតែពីការបង្ហើបនូវព័ត៌មានកាមេរ៉ាទាំងពីរនេះ គិតមកដល់ពេលនេះ គេនៅមិនទាន់ទទួលបាននូវព័ត៌មានលំអិតផ្សេងៗដែលមាននៅលើ OPPO Find X10 series នេះនៅឡើយទេ ខណៈដែលប៉ុន្មានថ្ងៃមុននេះ មានការទម្លាយថា ម៉ូដែលស្តង់ដារ X10 និងម៉ូដែល Pro អាចនឹងមានការប្រើប្រាស់នូវបន្ទះឈីបជំនាន់ថ្មី MediaTek Dimensity 9600 SoC។