នៅទីបំផុត ស្មាតហ្វូន realme GT6 ត្រូវបានទម្លាយចេញដោយក្រុមហ៊ុនហើយ។ ខណៈដែលខែឧសភា នឹងមានបិទបញ្ចប់នៅក្នុងពេលឆាប់ៗនេះ នៅថ្ងៃនេះ មានការបង្ហាញថា ស្មាតហ្វូនម៉ូដែល GT6 ត្រូវបានគេទម្លាយថា នឹងមានការបង្ហាញខ្លួននៅក្នុងទីផ្សារសកលនៅក្នុងខែមិថុនាខាងមុខនេះ។ ទន្ទឹមនឹងនេះផងដែរ លោក Chase Xu ដែលជាអនុប្រធានរបស់ក្រុមហ៊ុនrealme បានបញ្ជាក់អោយដឹងថា ស្មាតហ្វូន realme GT7 Pro នឹងបង្ហាញវត្តមាននៅលើទីផ្សារប្រទេសឥណ្ឌានៅក្នុងឆ្នាំនេះដូចគ្នា។

គួរបញ្ជាក់ថា ថ្មីៗនេះ នៅក្នុងការឆ្លើយតបទៅនឹងសំណួរមួយ ដែលមានការជជែកអំពីហេតុផលដែលក្រុមហ៊ុននេះ មិនបញ្ចេញនូវស្មាតហ្វូន realme GT5 Pro នៅក្នុងប្រទេសឥណ្ឌានោះ ត្រូវបានលោក Chase និយាយថា ស្មាតហ្វូន realme GT7 Pro នឹងបង្ហាញខ្លួននៅទីនេះនៅក្នុងឆ្នាំនេះ។ គួររំលឹកផងដែរថា ស្មាតហ្វូន realme GT5 Pro គឺស្មាតហ្វូនម៉ូដែលប្រណិតមួយ ដែលមានការបំពាក់នូវបន្ទះឈីប Snapdragon 8 Gen 3។ សម្រាប់វត្តមានរបស់ស្មាតហ្វូន GT7 Pro អាចនឹងប្រើប្រាស់នូវបន្ទះឈីប Snapdragon 8 Gen 4 SoC ជំនាន់ថ្មីនេះ។

បើមើលតាមរបាយការណ៍ជាច្រើននៅពេលនេះ បាននិយាយថា ក្រុមហ៊ុន Qualcomm នឹងបង្ហាញនូវបន្ទះឈីបជំនាន់ថ្មី Snapdragon 8 Gen 4 SoC នៅក្នុងខែតុលាឆ្នាំនេះហើយនៅក្នុងនោះក៏មានការបញ្ជាក់ទៀតថា ស្មាតហ្វូនស៊េរីថ្មី GT7 Pro អាចនឹងបង្ហាញខ្លួននៅលើទីផ្សារប្រទេសឥណ្ឌានាត្រីមាសចុងក្រោយឆ្នាំនេះផងដែរ។ បន្ថែមពីនេះ ក៏មានព័ត៌មានថ្មី ដែលបានទម្លាយចេញពី realme Global ថា ស្មាតហ្វូន realme GT6 នឹងបង្ហាញខ្លួននៅក្នុងពេលឆាប់ៗនេះដូចគ្នា។

ទាក់ទងនឹងស្មាតហ្វូនជំនាន់ថ្មី realme GT7 Pro នេះ សម្រាប់ទីផ្សារសកល ក៏នឹងទទួលបាននូវស្មាតហ្វូនថ្មីនេះ នៅក្នុងខែមិថុនាខាងមុខផងដែរ។ ប្រភពកន្លងមកបាននិយាយថា ស្មាតហ្វូនជំនាន់ថ្មីនេះ គឺជាម៉ូដែលមួយដែលមានការ Rebranded ចេញពីស្មាតហ្វូនជំនាន់ថ្មី realme GT Neo6 បំពាក់នូវបន្ទះឈីប Snapdragon 8s Gen 3 ដែលបង្ហាញខ្លួននៅក្នុងប្រទេសចិនកាលពីពេលថ្មីៗនេះ។ ហើយបើតាមរបាយការណ៍មួយចេញពី SmartPrix នោះ ក៏មានការបង្ហាញថា ស្មាតហ្វូន realme GT6 នេះ នឹងមានប្រើប្រាស់នូវ  “Next AI” Tagline ហើយក៏មានការពង្រឹងទៅលើកាមេរ៉ាAI ជាច្រើនដូចជា AI Night Vision, AI Smart Loop, AI Smart Removalនិង AI Smart Search ផងដែរ៕