កាលពីខែមុននេះ មានលេចចេញនូវរបាយការណ៍ថ្មីមួយ បានអះអាងថា ស្មាតហ្វូនស៊េរីថ្មី Samsung Galaxy S25 Edge នឹងមានការបង្ហាញខ្លួននៅថ្ងៃទី 15 ខែមេសាខាងមុខនេះហើយ។ ប៉ុន្តែស្របពេលដែលមានដំណឹងនេះ ក៏មានការអាប់ដេតថ្មីមួយចេញពីសារព័ត៌មាន ET News របស់ប្រទេសកូរ៉េខាងត្បូង បានបញ្ជាក់ដែរថា ការបង្ហាញស្មាតហ្វូននេះ អាចនឹងមានការពន្យាពេលទៅកាន់ចន្លោះខែឧសភា និងមិថុនាវិញ។
នៅពេលនេះ របាយការណ៍ថ្មីមួយទៀតចេញពី SamMobile ដែលជាប្រភពជឿជាក់បាននោះ បានបញ្ជាក់ថា ក្រុមហ៊ុន Samsung បានត្រៀមខ្លួនក្នុងការប្រកាសជាផ្លូវការទៅលើស្មាតហ្វូន Galaxy S25 Edge នៅខែក្រោយនេះហើយ។ បន្ថែមពីនេះ ក៏មានការបែកធ្លាយនូវរូបភាព និងលក្ខណៈសម្បត្តិរបស់ស្មាតហ្វូននេះជាបន្តបន្ទាប់ផងដែរ។
យោងតាមការបញ្ជាក់នៅក្នុងរបាយការណ៍ថ្មីនេះ បាននិយាយថា ស្មាតហ្វូនជំនាន់ថ្មី Samsung Galaxy S25 Edge នឹងបង្ហាញខ្លួននៅថ្ងៃទី 13 ខែឧសភានេះ ដោយមានការពន្យាពេលជាង 1 ខែពីកាលបរិច្ឆេទដំបូង។ ហេតុផលនៃការផ្លាស់ប្តូរនេះនៅមិនទាន់ច្បាស់នោះទេ។ ក្រុមហ៊ុន Samsung ប្រហែលជាអាចនឹងធ្វើការប្រកាសសម្ពោធស្មាតហ្វូននេះតាមរយៈការធ្វើបទបង្ហាញអនឡាញជាជាងការរៀបចំព្រឹត្តិការណ៍ធំក្នុងការសម្ភោធន៍ស្មាតហ្វូននេះ។ ជាមួយគ្នានេះ បើតាមរយៈរូបភាពដែលចែករំលែកចេញពីអ្នកទម្លាយ CID បានអោយដឹងថា ស្មាតហ្វូន Galaxy S25 Edge នេះនឹងមានអេក្រង់ទំហំ 6.6-អ៊ីង កម្រិត 2K AMOLED display ជាមួយនឹងកម្រិតល្បឿន 120Hz refresh rate ហើយក៏មានប្រព័ន្ធស្កេនក្រយ៉ៅដៃក្រោមអេក្រង់ផងដែរ។
ស្មាតហ្វូននេះ មានកម្រាស់ 5.84mm និងទម្ងន់ 162g ដោយតួទាំងមូលគាំទ្រជាមួយនឹងការប្រើប្រាស់គែមទីតាញ៉ូម និង IP68 សម្រាប់ការពារធូលី និងការជ្រាបទឹកថែមទៀតផង។ ស្មាតហ្វូននេះ នឹងមានកាមេរ៉ាគោលទំហំ 200-Megapixel អមជាមួយនឹងមុខងារ OIS, 12-Megapixel ultra-wide ហើយនិងមានកាមេរ៉ាខាងមុខទំហំ 10-Megapixel ។ ស្មាតហ្វូននេះ នឹងប្រើប្រាស់នូវ Android 15 ជាមួយនឹង One UI 7 ដែលអាចធ្វើការអាប់ដេត Android OS និង security patch បានដល់ទៅ 7 ឆ្នាំ។
បើមើលទៅលើកម្លាំងម៉ាស៊ីនវិញនោះ ស្មាតហ្វូន Galaxy S25 Edge នេះ នឹងប្រើប្រាស់នូវបន្ទះឈីប Snapdragon 8 Elite រ៉េមទំហំ 12GB និងម៉េមូរីទំហំ 512GB Storage ។ ស្មាតហ្វូននេះ មានថាមពលថ្មទំហំ 3,900mAh និងបច្ចេកវិទ្យាសាកថ្មលឿន 25W wired fast charging។ ស្មាតហ្វូននេះ មានទំហំ 12GB+256GB និង 12GB+512GB ជាមួយនឹងពណ៌ Titanium Silver, Titanium Jetblack និង Titanium Icyblue ។ បើមើលទៅលើតម្លៃរបស់ស្មាតហ្វូននេះ នៅក្នុងទីផ្សារអ៊ឺរ៉ុបគឺ 1249 អ៊ឺរូ៕
