Samsung ដែលជាក្រុមហ៊ុនបច្ចេកវិទ្យាយក្សកូរ៉េខាងត្បូង នៅពេលនេះ ត្រូវបានគេរាយការណ៌ថា បានកំពុងតែគិតឡើងវិញអំពីយុទ្ធសាស្រ្តនៃបច្ចេកវិទ្យា AI នៅលើស្មាតហ្វូនត្រកូល Galaxy S26 Series។ ខណៈពេលនេះ ស្មាតហ្វូនជំនាន់ថ្មីនៃត្រកូល Galaxy S Series គឺមានការផ្តោតខ្លាំងទៅលើ Germini របស់ក្រុមហ៊ុន Google សម្រាប់ផ្តល់នូវភាពឆ្លាតវៃក្នុងការប្រើប្រាស់។ ប៉ុន្តែចំពោះស្មាតហ្វូន Galaxy S26 Series ដែលនឹងមកដល់នៅឆ្នាំក្រោយ គឺអាចនឹងមានភាពខុសប្លែកពីមុនជាមួយនឹងបទពិសោធន៍នៃ AI ច្រើនជាងមុន តាមរយៈនៃការឌីស្សាញជាមួយនឹងភាពឆ្លាតវៃ និងមានជម្រើសកាន់តែច្រើនសម្រាប់អ្នកប្រើប្រាស់។

នៅក្នុងបទសម្ភាសន៍មួយជាមួយនឹង Bloomberg លោក Won-Joon Choi ដែលជាប្រធានផ្នែកស្មាតហ្វូនរបស់ក្រុមហ៊ុន Samsung បានបញ្ជាក់ថា ក្រុមហ៊ុន Samsung មានគម្រោងក្នុងការបើកនូវ Ecosystem ទៅកាន់ AI ជាច្រើន។ នេះមានន័យថា Google Germini មិនមែនជាបច្ចេកវិទ្យាឆ្លាតវៃផ្តាច់មុខសម្រាប់ស្មាតហ្វូន Galaxy នោះទេ។

លោក Choi បានពន្យល់ថាក្រុមហ៊ុន Samsung បានបង្កើតនូវ framework ជាច្រើនដែលអាចទ្រទ្រង់ទៅលើ AI ជាច្រើនដែលផ្តល់នូវបទពិសោធន៍នៃការប្រើប្រាស់យ៉ាងរលូន និងសមត្ថភាពខ្លាំងក្លាបំផុត។ បច្ចេកវិទ្យានេះ ក៏អាចនឹងមានការបញ្ចូលគ្នាជាមួយនឹងក្រុមហ៊ុន AI ជាច្រើនទៀតដូចជា Perplexity ដែលក្រុមហ៊ុន Samsung វិនិយោគទឹកប្រាក់យ៉ាងច្រើន ដើម្បីបង្កើនទៅលើសមត្ថភាពរបស់ស្មាតហ្វូន Galaxy នេះ។

ខណៈពេលដែលព័ត៌មានលម្អិតរបស់ស្មាតហ្វូននេះ មិនទាន់ត្រូវទម្លាយទេនោះ ក្រុមហ៊ុន Samsung មានគម្រោងក្នុងការចែករំលែកព័ត៌មានបន្ថែមរបស់ស្មាតហ្វូននេះ នៅមុនការប្រកាសជាផ្លូវការនៅដើមឆ្នាំ 2026 នេះ។ សម្រាប់ពេលនេះ ក្រុមហ៊ុន Samsung គឺបានគិតគូរច្រើនមែនទែនទៅលើបច្ចេកវិទ្យា AI ដែលផ្តល់នូវភាពងាយស្រួលក្នុងការប្រើប្រាស់ជាងមុន និងអស្ចារ្យជាងមុន។

ការសម្រេចចិត្តរបស់ក្រុមហ៊ុន Samsung ទៅលើ AI Framework នេះ ជាមួយនឹងស្មាតហ្វូន Galaxy S26 គឺជាយុទ្ធសាស្រ្តមួយទៀតនៅក្នុងការចាកចេញពីការផ្តាច់មុខទៅលើ Google Ecosystem។ គួរបញ្ជាក់ផងដែរថា បច្ចេកវិទ្យា AI នេះគឺក្លាយជាផ្នែកមួយដ៏សំខាន់សម្រាប់ក្រុមហ៊ុន Samsung ទាំងនៅលើស្មាតហ្វូន Flagship និងស្មាតហ្វូនថ្នាក់កណ្តាលជាច្រើនម៉ូឌែលនៅក្នុងរយៈពេលប៉ុន្មានឆ្នាំនេះ៕